YEREMIA 4 - Bible en langue Bulu

Tyiʼibane metyele ya minleme mienan

¹ A Israél nge wo bulan, nge wo bulane be ma, nalé Nti a jô, nge wo vaa bʼangôndô be mame bôé e vôm me né, nge wo bo te beta ndeñendeñ,

² nge wo kane ngana na: Nti a vee, e bebela été, e nya njôan été, e zôsôô été, éyoñe te meyoñe bikuu ma ye nyoñe bibotane be nye, a ma ye wume be nye.

³ Amu avale di nde Nti a jô bôte ya Yuda a Yérusalém na: liane mfefé afup, ve te béane bidi e biyo été.

⁴ Tyiʼibane metye asu Nti, tyiʼibane metyele ya minleme mienan, a bôte ya Yuda a ba be too Yérusalém, ayaa dam e za kalan ane nduan, e za yôñé ane nkabaʼa nduan, bôt be too te nguleya dime wô, amu nkpwala ya mimboone mienan.

Kpwatôla besiñe yʼakôé

⁵ Katane foé nyô e Yuda, boʼone na é wôʼé e Yérusalém, kobaʼane de! loñane toñ e si jenan! Yôtaʼane metyiñe ngu a jô na: sulaʼan a nkean e bitison bi bili alem!

⁶ Betaʼane nyungu mfaʼa ya Sioñ, mataʼan, te teban! Amu ma soo bidim a beta éndaman mfaʼa yʼakôé

⁷ Ngbwengbwem é sembeya, é kôlôʼô vôm ja bôô, ntyame meyoñ me bôt a tatéya dulu, a so jale dé, amu na a zuu bidim e si jôé; bitisone biôé bia ye bo bilik; bôte ba tabʼété ba ye bo momo.

⁸ Ajô te jaane minkuta ane kandé, jaane meyep a yôn; amu ayaa Nti e nʼayôñ e nji saʼale bia.

⁹ Môs ôte, nalé Nti a jô, ayoʼo nleme njô bôt a biwôlô bebo bisaé bié da ye man. Betuni ba ye ko woñ, a bekulu mejô ba ye tebe feʼe ne vema.

¹⁰ Nde me nga jô na: A Zambe nyô a ne Nti, ô nga tuʼa foʼo duʼu bôte ba a Yérusalém, vôm ô nga jô be na: Mia ye tabe mvoʼé ! Ve da nkpwaté mekôn wo jii a kui zoñe nlem .

¹¹ Melu mete, ba ye jô bôte bete a Yérusalém na: évuñulu ja diʼi ja vuñ, e mebôbône minkôle ya nkôte si, e zene ngone yʼayoñe bôte dam, saake asu ya seʼese nge tyaʼa mvoñ.

¹² Evuñulu te é ne ngu, ja so wé a kui be ma. Eyoñe ji bia be be bia ye kobô ajô ntyiʼane mejô.

¹³ Nye le a bet ane minkut! Bevagoñe bé be ne anʼôlende, bikabela bié bi nʼéveves a dañe bendôé. Ngoʼo bia, amu bi jañeya!

¹⁴ Sôbe nleme wôé mfaʼa yʼabé a Yérusalém, nalé wo ye nyiiban! Mbia minsimesan mia ye tabe be wo a kui éyoñ évé?

¹⁵ Amu zôʼé ja bo, ataté Dañ, ja kate foé bidim, ja mialane je ataté minkôle mi Efrayim.

¹⁶ Wômôlôʼô jame di e be meyoñe bikuu, boʼone na be yeme de Yérusalém, nsamba nkpwatôla wo so si é nʼôyap, tyiñe jap ja wosane bitisone ya Yuda.

¹⁷ Ba bômane Yérusalém, ane ba ba baʼale afup, amu a nga bene njôane wom, nalé Nti a jô.

¹⁸ Asuʼulane ya mboone wôé a ntabane wôé nde le, nkpwala wôé ñwô le; nalé a ne foʼo ayô, a jame te da tulan a kui nlem .

Yérémi a kon amu mbia jam a ye kui

¹⁹ Abum da boʼo ma! Minkañe mise ya nleme wome fe mia taé! Nlem wo kumetane ma, me se nguleya tabʼévô; amu wo wôk, a nlem , tyiñe toñ, zôʼé bita.

²⁰ Endaman ja tôñ éndaman, nalé foé ja kateban; amu si ése é maneya ndaman. Menda bindelé mam me maneya tyamé atemetem, avale da te bitabaʼa bindelé biam bi keya éyoñe jijia.

²¹ Ma ye yene nyungu a kui éyoñ évé, a wôʼô fe tyiñe toñ?

²² Yaa, e bôte bam be ne mekut, be ne teke yeme ma; Be ne bon be ne teke fas, atyeñ da jeñebane be; be ne fek vʼasu ya bo abé , ve be ne te yeme bo mvaé

²³ Me fombôya si a yene na é ne ne zametazametan, a teke jôm été; me fombôya fe yôp, a yene na éfufube jé é nji beta bo.

²⁴ Me fombôya beta minkô, a yene na be maneya bulekan, a bone minkôle bese ba ndeñetan.

²⁵ Me fombôya a yene na, môt a nji fe bo; a anon ese ya yôb e maneya tup.

²⁶ Me fombôya: si é mbe afube bilé bia wume bibuma é ntoo nkôté si a bitisone bié bise bi maneya diʼiban a mboone awu ayôñe ya ayaa dé.

²⁷ Amu avale di nde Nti a jô na: si jenan ése ja ye bo ndaman; ve ma ye bo te mane jiane je ése,

²⁸ amu nalé, si é ne meyeb été, a minkute ya yôp mi maneya vin; amu me jôya de a ôsimesane viame le, a me nji ke jôban de.

²⁹ Tison ése ja tup, a éduñe bewulu bikabela, a bewua bilaé; bôt ba nyiine bisaé si, bevok ba bete mekôme yôp; tison ése é ntoo bilik, môt a nji fe bo été.

³⁰ Ve wo, éyoñ ô ntoo ndamane ji wo ye bo aya? Ye wo ye jalé womien évele ngômesan, a jaé biôm bi ne mboon a or, ye wo ndamé mise môé a meyañ? Wo bo nyanga e zezé; bibone biôé bia biasé wo. Ba jeñ ényiñe jôé.

³¹ Amu ma wôʼô miñyôn ane mi minga a kôʼôlô mie, miñyône biyebe ane mi ya abiaé ôsu. Tyiñe ngone Sioñ nje le; ja vebe abuk, a same mo na: za éngôngole me ne di, me kuya e mo bewôé bôt été.