YEREMIA 39 - Bible en langue Bulu

Yérusalém a nyoñeban

¹ Ngon awômô ya mbu ébulu Sédékias njô bôte ya Yuda a nga jôô, ñwô Nébukatnétzar njô bôte ya Babilôn a nga so a nkane bita wé ôse asu Yérusalém, a dili nye bita.

² Ngone nyini é too melu ébu ya mbu awôm a wua, Sédékias njô bôte ya Yuda a nga jôô, ñwô beta nsalan a nga bobane tisone Yérusalém.

³ Eyoñe te bivete bi njô bôte ya Babilôn bi nga zu a bômane mbé yʼézezañ bi too môé na: Nergal-Saretser, Samgar-Nebou, Sarsekim évete bemiak, Nergal-Saretser évete beyememam a bivete bi njô bôte ya Babilôn bivoʼo bise.

⁴ Nné ane Sédékias njô bôte ya Yuda a bôte mewosan bese be nga yene be, be nga tup, a kôlô tison alu be tyiʼi zen afube njô bôt, mbé ô ne zañe mimfine mibaé, a be nga kuu zene yʼAraba.

⁵ Ve nkane bita Bekaldééñ ô nga tôñe be a koone Sédékias njeʼese Yérikô. Be nga nyoñe nye, a bete nye be Nébukatnétzar, njô bôte ya Babilôn e Ribla e si Hamat a nye a nga tyiʼi ajô dé.

⁶ Njô bôte ya Babilôn a nga wôé bone be Sédékias Ribla émien a lôô. Njô bôte ya Babilôn a nga wôé fe benya bôte bese ya Yuda.

⁷ Wôna a nga bo na be tube Sédékias mis, a bo na be kaʼa nye a bibom bi mvot, asu ya kee nye Babilôn.

⁸ Bekaldééñ be nga diʼi nda njô bôt a nduan a menda me bôte yʼayoñ, wôna be nga kpwé fe mimfine ya Yérusalém.

⁹ Mfaʼa mebukaʼa me bôt me nga too tison, ba be nga kee bebiene be nye, a mebukaʼa me bôt me nga liʼi, Nébuzaradañ, évete bebaʼale, é nga kee be minkôm.

¹⁰ Ve mimbubua mi bôte yʼayoñ, ba be mbe tekeʼe jôm, Nébuzaradañ évete bebaʼale, a nga ve be nguleya liʼi be too si ya Yuda a a nga ve be mindiʼi mi woon a mefube môs ôte.

¹¹ Nébukatnétzar, njô bôte ya Babilôn, a nga ve abendé di ajô Yérémi be Nébuzaradañ évete bezimbi na:

¹² nyoñe nye a fombô nye, te bo nye jam éziñ e nʼabé, ve boʼo nye avalʼa ye wo jô.

¹³ Nébuzaradañ évete bezimbi, Nébukazbañ évete bemiak, Nergal-Saretser évete beyememam a bivete bi njô bôte ya Babilôn bise,

¹⁴ be nga lôme bôte na be nyoñe Yérémi nseñe bebaʼale mimbôk a kalane nye be Gedalia e mone Ahikam, ndaé Safan, na a kee nye nda jé. A a nga tabe ézezañe bôte yʼayoñ.

Ebéd-Mélék a nyiiban

¹⁵ Ajô Nti e nga litibane be Yérémi nté a nga too mbôk nseñe bebaʼale mimbôʼô na:

¹⁶ kelek a kobô Ebéd-Mélék, môte yʼEtiôpi, a jô nye na: Avale di Nti ya minsamba mewosan, e Zambe Israél a jô na: Ô lôô, ma ye zuu jam me nga kobô ajô tisone nyô, asu bidim, saake asu mvaé; jame te da ye kui môs ôte mise môé me lôô.

¹⁷ Ve môs ôte ma ye nyii wo nalé Nti a jô, a wo ye bo te keeban e mo me bôte wo ko woñ.

¹⁸ Ma ye bo na ô tup, a wo ye bo te ku a nkpwaté mekôn; ényiñe jôé ja ye bo jôme jôé ya nsa, amu ô nga tabe ma ndi, nalé Nti a jô.