YEREMIA 36 - Bible en langue Bulu

Yôyakim a diʼi kalate minkulane mejô Yérémi

¹ Mbu nyini Yôyakim, e mone Yôzias njô bôte ya Yuda a nga jôô, ñwô ajô di e nga litibane be Yérémi e soo be Nti na:

² nyoñe mvulekane kalate, a wo ye tili mejô mese me nga jô wo ajô Israél, ajô Yuda a meyoñ mese, ataté môse me nga kobô wo, melu Yôzias a kui môse wu.

³ Ndôʼôtô nda bôte Yuda ja ye tabe ntyel mfaʼa ya abé ese ma simesane na ma bo je, ane be ne bulan môt ase mbia zene wé; éyoñe te ma ye jamé ékobe jap a abé dap.

⁴ Ane Yérémi a nga loone Baruk e mone Nériya; a nga bo na Yérémi a kobôʼô, Baruk ki a tiliʼi e mvulekane kalate été, mejô mese Nti a nga jô Yérémi.

⁵ Eyoñe te Yérémi a nga bendé Baruk na: Me ne mbilan, me se nguleya ke nda Nti.

⁶ Womien wo ye ke, a lañe mvulekane kalate ô maneya tili mejô me Nti ba te lañe wo e nda Nti été bôt be too, e môse ba tyi bidi; wo ye fe lañe me, bôte bese ya Yuda be nga so bitisone biab be too.

⁷ Ndôʼôtô na, minjaʼane miab mia ye kui asu Nti a bo nguleya bulan, môt ase mbia zene wé; amu ayok a ayaa Nti a maneya tot mfaʼa bôte ba e nʼanen.

⁸ Nde Baruk, e mone Nériya, a nga bo jam ese nkulu mejô Yérémi a nga bendé nye, e nda Nti été. A nga lañe mejô me Nti e kalatʼété.

⁹ Mbu tane Yôyakim, e mone Yôzias, njô bôte ya Yuda, ngon ébulu, be nga kate foé môse ntyiane bidi, asu Nti asu bôte bese ya Yérusalém, a asu bôte bese be nga so bitisone ya Yuda a Yérusalém.

¹⁰ Baruk a nga lañe mejô me Yérémi e kalate été, bôte bese be too nda Nti été; a mbe étune nda Gemaria, e mone Safan, ñyeme bekalate, mame ya nseñe ya yôp, anyiine mfefé mbé ya Nda Nti.

¹¹ Miké, e mone Gemaria, e mone Safan a nga wôʼô mejô me Nti mese me nga too e kalate été,

¹² a nga sis, a ke nda njô bôt, étune nda ñyeme bekalate, vôme bivete bise bi mbe bi sulaʼan, Elikama, ñyeme bekalate, Delaya e mone Semaya, Elnatañ e mone Agbor, Gemaria e mone Safan, Sédékias e mone Hanania a bivete bivoʼo bise.

¹³ A Miké a nga kate be mejô mese a nga wôk éyoñe Baruk a mbe a lañe kalate, bôt be too.

¹⁴ Eyoñe te bivete bise bi nga lôme Yehudi e mone Nétania, e mone Sélémia, e mone Kusi be Baruk asu ya jô nye na: Mvoñe mvulekane kalate, ñwô wo te lañe mo bôt be too, ô zu! Nde Baruk, e mone Nériya a nga nyoñe mvulekane kalate mo a ke be be.

¹⁵ Be nga jô nye na: Tabeʼe si ô lañe bia wô. Ane Baruk a nga lañe be wô.

¹⁶ Eyoñe be nga wôʼô mejô mete mese, be nga fombane mis a woñ ôse, a jô Baruk na: Bia ye kate njô bôt mejô mete mese.

¹⁷ Be nga sili Baruk minsili na: Kate bia avale wo te tili mejô mana mese Yérémi ki a kobôʼô.

¹⁸ Baruk a nga yalane be na: A te tote mejô mese mana tyiñe yôp, ma ke me tiliʼi me e kalate nyô a mendim ba tilane me.

¹⁹ Bivet bi nga jô Baruk na: Kelek, a sobôʼô a môt éziñ a boʼo te yeme vôm mi né.

Yer 26; 22:13-19; Eza 30:8-14

²⁰ Ane be nga ke nseñ mfaʼa njô bôt a nga too be liʼi kalate a bôô étune nda Elikama, ñyeme bekalate, nde be nga kate njô bôt mam mese ya kalatʼate.

²¹ Njô bôt a nga lôme Yehudi na a ke nyoñe mvulekane kalate, nde Yehudi a nga ke étune nda Elikama, ñyeme bekalate a a nga lañe nye njô bôt, bivete bise bia tabe fefele jé bi too.

²² Njô bôt a nga too nda jé ya melu mʼôyôn, ngon ébulu, éndumé yoñe ôsu vié.

²³ E mbe na Yehudi a lañe minnoñ mila nge minyin njô bôte ki a tyiʼi mie a ôtyenjeñe ñyeme bekalate a wua mie nduan é mbe éndum été akekui mvulekane kalatʼôse ô nga mane dik.

²⁴ Ajô te njô bôt a bivete bié bise bi nga wôʼô mejô mete be nga bo teke ko woñ, nge nyabe mengômesane map.

²⁵ E too ke na, Elnatañ, Delaya a Gemaria be nga yeʼelane njô bôt mbane na, a bo te diʼi mvulekane kalate; ve a nga bo teke vôʼôlô be.

²⁶ Ane njô bôt a nga bendé Yeramél e mone njô bôt, Seraya e mone Azriél a Sélémia e mone Abdéél na be bi Baruk ntilimam a nkulu mejô Yérémi. Ve Nti a nga solé be.

²⁷ Ane ajô Nti e nga litibane be Yérémi éyoñe te njô bôt a maneya diʼi mvulekane kalate a mejô Baruk a nga tili, mme Yérémi a nga tote nye e jôʼô na:

²⁸ nyoñe mvulekane kalatʼôfe, a wo ye tili mejô mese me mbe mvulekane kalatʼôsu, ñwô Yôyakim, njô bôte ya Yuda a nga mane diʼi.

²⁹ Wo ye wosane Yôyakim njô bôte ya Yuda ô jôʼô na: Avale di Nti a jô na: Wo ô nga mane diʼi mvulekane kalate ô jôʼô na: Amu jé ô nga tili mejô mana été na: Njô bôte ya Babilôn, a ye zu teke selan, a ye tyame si jenan, a bo na bôt a betit be mane jañ?

³⁰ Ajô te Nti a jô Yôyakim njô bôte ya Yuda, nyô Nti a wosane nye avale di na: Teke wua ya bôte bé a ye tabʼéto njôane David a mbime wé wo ye bômbô ayôñ été amôs, a aveb été alu.

³¹ Ma ye wosane nye, mvoñe bôte jé a bebo bisaé bé, amu ékobe jab; ma ma ye zuu bidim bise me nga kate be, be te wôʼô ma ye zuu bie be be, be bôt be too Yérusalém a be bôte ya Yuda.

³² Nde Yérémi a nga nyoñe mvulekane kalatʼôfe, a kee wô Baruk, e mone Nériya, ntilimam Baruk a nga beta tili été, Yérémi a totôk, mejô mese ya kalate Yôyakim njô bôte ya Yuda a nga diʼi, mejô mefe avale te, me mbe mfuban été abui.