YEREMIA 34 - Bible en langue Bulu

Nkulane mejô ajô asuʼulane Sédékias

¹ Ajô Nti e nga litibane be Yérémi, éyoñe Nébukatnétzar, njô bôte ya Babilôn a nkane bita wé, a bijôé bise ya mesi me nga too éjôé jé si, a meyoñ me bôte mese, be mbe be boʼo bita Yérusalém a bitisone bise bi mbe bi wôʼôk a Yérusalém na:

² Avale di Nti, e Zambe Israél, a jô na: Kelek, kobôʼô Sédékias, njô bôte ya Yuda: wo ye jô nye na: Avale di Nti a jô na: Ô lôô, ma kee tisone nyô e mo me njô bôte ya Babilôn a a ye diʼi je a nduan.

³ A wo ye bo te fame mo mé, ve wo ye bili mbilane njet, a keebane mo mé, mise môé ma ye yene njô bôte ya Babilôn.

⁴ Ve da, vôʼôlô ajô Nti a Sédékias, njô bôte ya Yuda! Avale di Nti a kobô ajô dôé na: Wo ye bo te wu a nkpwaté mekôn.

⁵ Wo ye wu mvoʼé; a avale be nga diʼi beôlobinda asu bʼésoo, minnôme bejô bôt mi mbe wo ôsu, avale te ba ye diʼi be asu dôé, a ba ye yi wo be jôʼô na: Hui, a monti! Amu me toteya éfia te, nalé Nti a jô.

⁶ Ane nkulu mejô Yérémi a nga kate Sédékias, njô bôte ya Yuda mejô mete mese.

⁷ Nkane bita njô bôte ya Babilôn ô nga wosane Yérusalém a bitisone bivoʼo bise ya Yuda, Lakis a Azéka, amu bitison bi bili alem e bitisone ya Yuda mbie le.

Eto fili alo; ve Bemasa bap ba beta be nyoñ

⁸ Ajô Nti e nga litibane be Yérémi éyoñe te njô bôte Sédékias a maneya bo élat a bôte ya Yérusalém, asu ya yôtane be éto fili jap,

⁹ na môt ase a suu ôlo vié a mbo ésaé wé a ne minga, fam a minga be mbe Beyude.

¹⁰ Bivete bise a bôte bese be nga too be nga bo abendé e nga veban mewôʼô na, môt ase a suu ôlo vié a mbo ésaé a ne minga, nalé fe be bo te beta bi be éto belo, be nga bo mewôk a suu be.

¹¹ Mvuse valé, be nga beta tyendé ntyiʼan, a bo na alo a bebo bisaé be mbe binga be nga suu be bulan, a yemete be na be beta bo alo a bebo bisaé.

¹² Eyoñe te ajô Nti e nga litibane be Yérémi, e soʼo be Nti na:

¹³ avale di Nti, e Zambe Israél a jô na: Me nga bo élat a bʼésoo môse me nga vaa bʼEjipte nda belo, a me nga jô be na:

¹⁴ mvuse mimbu zamgbwa, môt ase ya be mia a suu monyañ a ne mone Beyude a kuan émiene be nye; a ye saane wo mimbu misaman, mvus éte, wo ye suu nye fili a kôlô nda jôé. Ve bʼésoo be nji wôʼô ma, be nji kee alo dab mfaʼa wob.

¹⁵ Mia, éyoñ mi soya den, mi taté mboone mam me ne zôsôô e mise mam a ñyôtane éto fili, môt ase mfaʼa môt a ne nye bebé, mi boya élat ôsu viam, e Nda, vôme jôé dam da loban.

¹⁶ Ve mi beteya tyendé ntyiʼane wônan a ndaman jôé dam, mi bulaneya nyoñ, môt ase, alo a bebo bisaé be ne binga a yemete be na be beta bo alo a bebo bisaé benan.

¹⁷ Ajô te Nti a jô na: Mi nji wôʼô ma éyoñe mi nga yôtan, môt ase, éto fili monyañ nge môt a ne nye bebé. Tame yen: ma yôtan, me too mia ngame yat, éto fili nkpwaté mekôn, ji bim a ji mfumbale zaé, a ma ye kôñelane mia jôme woñ asu bijôé bise ya si.

¹⁸ Ma kuane bôt be nga tyam élate jam, mbe be nji jalé mam ma siliban mboon élate te, nje be nga bo ôsu viam mme me ne na: Ntyiʼane étoñe nyaʼafus a nlôtan e zañ afuse te.

¹⁹ Bivete ya Yuda a bi ya Yérusalém, bemiak, betuni a bôte bese be too si jenan be nga lôt e zañ afuse étoñe nyak,

²⁰ ma ye kalane be e mo besiñe bap, e mo me bôt ba jeñ ényiñe jap, a mimbime miap mia ye bo bidi bi anone ya yôp a betite ya fé.

²¹ Ma ye kalane Sédékias, njô bôte ya Yuda a bivete bié e mo besiñe bap, e mo me bôt ba jeñ ényiñe jap, e mo me nkane bita njô bôte ya Babilôn, nye a tyam nlatane ya lat a mia.

²² Ô lôô: ma ye ve mebendé mam, nalé Nti a jô, a ma beta zuu be na be wosane tisone nyô; ba ye wosane je, ba ye nyoñe je a diʼi je nduan. A ma ye bo bitisone ya Yuda melunga teke bôt.