YEREMIA 32 - Bible en langue Bulu

Yérémi a kus afup, ndeme mebulane bekee minkôm

¹ Mbu awômô Sédékias, njô bôte ya Yuda a nga jôô ñwô ajô Nti e nga litibane be Yérémi, mam ya mbu awôm a muame, éjôé Nébukatnétzar.

² Nkane bita njô bôte ya Babilôn ô nga dili Yérusalém bita, a nkulu mejô Yérémi ki a mbe mfetan e nseñe ya nda mimbôk é mbe e nda njô bôte ya Yuda.

³ Sédékias njô bôte ya Yuda a nga bo na be fete nye a jôʼô na: Amu jé wo kulu mejô ô jôʼô na: Avale di Nti a jô na: Ô lôô ma ve tisone nyô e mo me njô bôte ya Babilôn a a ye nyoñe je;

⁴ Sédékias njô bôte ya Yuda, a ye bo te fam e mo Bekaldééñ, vʼa ye foʼo keeban e mo me njô bôte ya Babilôn, a ye kobô nye, a ba ye yenane mesu;

⁵ njô bôte ya Babilôn a ye kee Sédékias e Babilôn, vôm a ye tabe akekui ma ye zu jome nye, nalé Nti a jô; nge mia wosane Bekaldééñ mia ye bo teke dañ.

⁶ Ane Yérémi a nga jô na: Ajô Nti e litibaneya be ma avale di na:

⁷ tame yen Hanamél e mone ndôme nyua wôé Salum, a ye zu be wo a jô wo na: Kuse afube dam e ne Anatot, amu ô bili ngule ya kôté de na ô nyoñe de.

⁸ A Hanamé e mone ndôme nyia wom a nga zu be ma, e nseñe nda mimbôk, avale Nti a nga jô, a jô me na: Kuse afube dam e ne Anatôt, e si Bényamin, amu ô bili nguleya nyoñ a kôté de, kuse de! Nde me nga yeme na, e mbe foʼo ajô Nti.

⁹ Ane me nga kus afup be Hanamél, mone ndôme nyia wom, nde e mbe Anatôt. Me nga ve nye moné besikel be argent awôm a zamgbwa.

¹⁰ Me nga tili kalate nkusane si, a futi sitam été. Me nga nyoñe bengaa a veʼe moné kop.

¹¹ Me nga nyoñe kalate nkusane si, nyô me nga futi sitam avale metiñ a éyem bi né,

¹² me nyoñe fe nyô a mbe a yoo me nga kee Baruk, e mone Nériya, ndaé Maséya kalate nkusane si Hanamél, mone ndôme nyia wom a lôô. Bengaa be nga sane kalate nkusane si fe be too. Beyude be nga too nseñe nda mimbôʼô fe be too.

¹³ Nde me nga bendé Baruk, be too bengaa na:

¹⁴ avale di Nti ya minsamba mewosan, e Zambe Israél a jô na: Nyoñe bekalate be nkuane tyiñ , nyô nkusane si, nyô a bili sitam a nyô a yoo, a futi be e vieʼe étek été, nalé ba ye tabe ayap.

¹⁵ Amu avale di Nti ya minsamba mewosan, e Zambe Israél a jô na: Menda mefup a mindiʼi mi woon bia ye beta kuseban e si jenane nyô.

Yérémi a yeʼelane Zambe

¹⁶ Eyoñe me maneya kee Baruk, e mone Nériya kalate nkusane si, nde me nga yeʼelane Zambe ana:

¹⁷ a Zambe, Nyô a ne Nti, tame yen, ô nga bo yôp a si, a beta ngule wôé a wo wôé ô ne nsaman; teke jam e ne wo ayaé.

¹⁸ Wo liti mvam a kui miaé toyini; jame da so amu ékobe bʼésaa wo bulane de bon mvuse bʼésaa. O ne Zambe a nʼanen a ngu, nyô jôé dé e ne na: Nti ya minsamba mewosan.

¹⁹ O nʼanen mfaʼa ya fek a éwôlô mfaʼa ya mimboon; mise môé me yoo e mezene me bone be bôt bese na ô bulane môt ase ane mezene mé me né.

²⁰ O nga liti mendem a bitua bi mam e si yʼEjipte a kui môse wu Israél été a émo jina été; a ô nga nene jôé dôé ane é né e môse wu.

²¹ O nga vaa bôte bôé yʼIsraél si yʼEjipte a mendem a bitua bi mam, a éwôlô wo, a wo ô ne nsaman, a dutu beta woñe be bôt.

²² Ô nga ve be si nyôna, nje ô nga kane bʼésaa ngana na wo ye ve be je, e si menyañ a wôé bia len.

²³ Be nga zu a nyoñe si éte, ve be nji wôʼô tyiñe jôé, be nji wulu ane metiñe môé me né, be nji bo jam ese ô nga jô be na be bo. Ajô te ô nga zuu bidime bi be be!

²⁴ O lôô, mevise me tyia ma bômane tison ane ba ye nyoñe je. Tison ja ye keeban e mo Bekaldééñ mbe ba soñe je bita. Tisone nyô é dañebaneya a nkpwaté mekôn, mfumbale zaé a bim. Ajô ô nga kobô e bobaneya, womien ô lôô de.

²⁵ Ve da, a Zambe, nyô a ne Nti, ô nga jô me na: Kuse afup a moné, nyoñe bengaa. A tison é keebaneya e mo Bekaldééñ.

Yérusalém a ye tyamban

²⁶ Ajô Nti e nga litibane be Yérémi na:

²⁷ ô lôô! Me ne Nti, Zambe minsône mise. Ye jam éziñ é ne mʼayaé?

²⁸ Ajô te nde Nti a jô na: Ô lôô, ma kalane tisone nyô e mo Bekaldééñ, a e mo Nébukatnétzar njô bôte ya Babilôn a a ye nyoñe je.

²⁹ Bekaldééñ ba wosane tisone nyô ba ye nyiin, ba ye futi nduane tisone nyô a diʼi je, a menda, mme be nga ve Baal ôlobinda e mendile yʼété, a sôé bezambe befe binyunyui na me wôʼôlun.

³⁰ Amu bone bʼIsraél a bone be Yuda, aso bongô, ba zu ba bo foʼo ve mam me nʼabé mise mam; bon bʼIsraél ba zu ba bo ma ve na me wôʼôlun, amu mimboone ya mo map, nalé Nti a jô.

³¹ Amu tisone nyô é ne ma vʼanjeñ ayaa a ôlun, ataté môse be nga lôñe je a kui den: ajô te ma zu vaa je asu dam,

³² Amu abé ese bone bʼIsraél a bone be Yuda be nga bo na me wôʼôlun, bebien, bejôô bap, bivete biap, betuni bap, bekulu mejô bap, bôte ya Yuda a bôte be too Yérusalém.

³³ Be nga lume ma mvus sa asu; be nga yeʼele be, be nga yeʼele be ataté mametyé; ve be nji vôʼôlô na be nyoñe nyeʼelan.

³⁴ Be nga telé bengunemelane bap e nda ba loone jôé dam na be ve je mvin.

³⁵ Be nga lôñe Baal bito e bikôndôʼô yôp, e mbiʼili Bén-Hinom, asu ya diʼi Molok bobefame bap a bobebinga bap; dili e too jam me nji ke bendé be, jam e nji zu mʼôsimesan: a bo avalʼangônda jame te, asu ya bo Yuda na a bo abé !

Ba ye bo bôte bam a ma ye bo Zambe wop

³⁶ Amu ajô te éyoñe ji, Nti, e Zambe Israél a jô tisone nyô, nje mia jô na: Ja ye keeban e mo me njô bôte ya Babilôn éyoñe nkpwaté mekôn, mfumbale zaé a bim bi dañeya je:

³⁷ tame yen: ma ye kôane be me soʼo be mesi mese me nga jiane be ayaa dam été, ayoʼo dam été a beta ôlune wom été; ma ye beta soo be vôme nyô; ma ye bo na be tabʼété tee jôm ja tyelé be nleme yôp.

³⁸ Ba ye bo bôte bam, a ma ma ye bo Zambe wop.

³⁹ Ma ye ve be nleme wua a fulu jia, nalé ba ye ko me woñe nnôm éto, asu mvome jab a nyô bone bab mvuse jap.

⁴⁰ Ma ye bo élate ya nnôm éto a be, ma ye bo te beta lume be mvus, ma ye bo be mvaé, a ma ye futi nkoone woñ e mfaʼa wom e minleme miab été, na be bo te kandane ma.

⁴¹ Ma ye vaʼajô dab asu ya bo be mvaé, a ma ye telé be nya ntelan e si nyô, a nleme wom ôse a nsisime wom ôse.

⁴² Amu avale di Nti a jô na: aval ane me nga zuu bidime bina bise be bôte ba, avale te ma ye zuu be mvaé ése ma kobô ajô dap.

⁴³ Ba ye kuse mefube si nyôna nje mia jô na: é ne melunga teke bôt nge betit, é keebaneya e mo Bekaldééñ.

⁴⁴ Ba ye kuse mefub a moné, bekalate be nkuan ba ye tiliban. Ba ye futi besitam été a nyoñe bengaa e si Bényamin a mefôla ya Yérusalém, e bitisone ya Yuda e bitisone ya beta nkô, e bitisone ya Séféla a bitisone ya Négéb, amu ma ye beta soo minkôme miap, nalé Nti a jô.