YEREMIA 3 - Bible en langue Bulu

Ekangekange mbo ébamba

¹ E nga jôbane na: nge fam ja suu minga wé a minga ate a kôlô be nye a boo nyô môte mfe, fam éte ja ye beta bulane be minga ate aya? Ye si éte ja ye bo te beʼe mvin abui? Ke wo ô maneya bo ébamba a abui bibon, éyoñe te wo kômbô beta bulane be ma! Nalé Nti a jô.

² Beteʼe mise môé e mebôbône minkôle yôp a fombôʼô! E vé nye ô nji samele womien? Ô nga too e mezen asu dap, avalʼane mon Arabe e nkôte si, a ô nga ve si jenane mvin, a bibamba biôé a ézezame jôé.

³ Ajô te me nji fe noo mveñ bikoʼo bi mveñe ya suʼu ésep bi nga bobane momo. Ve mvom asu jôé é mbe nyô minga ébamba, ô nga bene wôʼôson.

⁴ Ye e se nalé na: ataté éyoñe ji, wo yône be ma na: a ésaa wom! Mvôé jam aso mongô!

⁵ Ye a ye yaa melu mese? Ye a ye baʼale ôlun nnôm éto? Nne ô mbe ô jôʼô nalé. Ve ô nga bo abé a ô mbe ô bili ngul éte.

Nloon asu nkôñelane nlem

⁶ Nti a nga jô ma melu njô bôte Yôzias na: Ye ô yeneya ane Israél a ne tyabetyabe? A keya e beta nkôl ase a ne mbetan a élé ése é ne nyumi si, a keya bo ébamba wé.

⁷ Nde me nga jô mamiene na: Éyoñ a maneya bo mam mete mese, a ye bulane be ma. Ve a nji ke bulan. A kale jé, Yuda, nyô a ne njoñ, a nga yene nye.

⁸ Akôsa bo me nga suu tyabetyabe Israél amu mejiane mé mese a ve nye kalate ntyaman aluk, me nga yene na kale jé, Yuda, nyô a ne njoñ, a nji ko woñ, a nye fe a nga ke bo ébamba.

⁹ Israél a nga ve si jabe mvin a ézezame jé, a nga bo mejian baa akok a élé.

¹⁰ Vʼakôsa bo mam mete mese, Yuda, nyô a ne njoñ, kale jé, a nji bulane be ma a nleme wé ôse; a nga bo meduʼan, nalé Nti a jô.

¹¹ Nde Nti a jô me na: Israél, nyô a ne tyabetyabe, a ne zôsôô a dañe Yuda, nyô a ne njoñ.

¹² Kelek, yôtaʼane mejô mana, mfaʼa yʼakôé na: bulaʼan, a Israél nyô a ne tyabetyabe! Nalé Nti a jô. Ma ye bo te beta bi asu njete be mia, amu me ne mvam , nalé Nti a jô. Me ne te baʼale ayaa dam nnôm éto:

¹³ yeme ve nkobane wôé, amu Nti, e Zambe wôé, nye ô nga ben. O nga bo ézezam a bikuu élé ése é ne nyumi si, a mi nji ke vôʼôlô tyiñe jam, nalé Nti a jô.

¹⁴ Bulaʼan mia betyabetyabe be bon , nalé Nti a jô, amu ma me ne masa wônan. Ma ye nyoñe mia, wua e tisone nyô, bebaé e nlame wu, a ma ye bulane mia e Sioñ.

¹⁵ Ma ye ve bebaʼale mintômba, a ba nleme wom wo yene mvaé, a ba ye ve mia bidi a atyeñ, a mbamba mfasan.

¹⁶ Eyoñe mi maneya fôé a bo abui e si jenan melu mete, nalé Nti a jô, ba ye bo te beta kobô ajô éwolo élate Nti; ba ye bo te beta simesane je, nge tot ajô yʼété, nge yemelane na é ne momo, a éfe ja ye bo te fe boban.

¹⁷ Melu mete, ba ye loone Yérusalém na: éto njôane Nti; meyoñ me bôte mese ma ye ke wé, ma ye ke Yérusalém a jôé Nti, a ma ye bo te beta tôñe mbane ya mbia minleme miap.

¹⁸ Melu mete, nda bôte Israél a nyô Yuda ba ye wulu nsamba; a ba ye so si yʼakôé nsamba wua, be zaʼak e si me nga ve bʼésoo ane ngap.

¹⁹ Ma me mbe me jôʼô na: ma ye futi wo aya e bone bam été, a ma ye ve wo si mefok, ngab élik, jôm ja dañ abeñ, e meyoñ été aya? Me mbe me jôʼô na: wo ye loone me na: Ésaa wom! A wo ye bo te lume ma mvus.

²⁰ Yaa! Avalʼane minga a joñôlô fam a nyeʼe, nalé mi joñôleya ma, a nda bôt Israél, nalé Nti a jô.

²¹ Tyiñ ja wôʼé e mebôbône minkôle yôp é ne du a miñyône mi bone bʼIsraél; amu be maneya zametane ntabane wop, be maneya vuane Nti e Zambe wop.

²² A betyabetyabe be bon , bulaʼan, ma ye saé mia beyeñeyeñe benan. Bia ba bia zu be wo. Amu wo ô ne Nti e Zambe wongan.

²³ Yaa, bone minkô a éduñ ja so beta minkôle yôp bi ne momo jam; yaa, nyian Israél ô ne foʼo ve be Nti, e Zambe wongan.

²⁴ Oson ô maneya di bibuma yʼésaé bʼésaa bangan aso bongô: bone a beta mimbame biyeme miap, bobefam a bobebinga bap.

²⁵ Osone wongan ñwô ô nʼéjôʼôba jangan, meyate mangane ki, mfinga bia vute nyô, amu bi boya Nti, e Zambe wongan abé , biabebien a bʼésaa bangan, aso bongô a kui môse ya den, a bi nji vôʼôlô tyiñe Nti e Zambe wongan.