YEREMIA 29 - Bible en langue Bulu

Kalate Yérémi a tili beke minkôm

¹ Mana me ne mejô ya kalate nkulu mejô Yérémi a nga lôme mebukaʼa bemvendé ya minkôm a too Yérusalém, a be betuni, bekulu mejô a bôte bese Nébukatnétzar a nga kee be minkôme Babilôn be soʼo Yérusalém

² éyoñe te Yékônia, njô bôt a nyia a mbe njôô bemiak, bivete ya Yuda a Yérusalém, mintyetyeñ a belui be kôlôya Yérusalém,

³ (a nga lôme nye e) mo me Eléasa, e mone Safan a Gemaria e mone Hilkiya, mbe Sédékias, njô bôte ya Yuda, a nga lôme Babilôn e be Nébukatnétzar njô bôte ya Babilôn a jôʼô na:

⁴ Avale di nde Nti ya minsamba mewosan, e Zambe Israél, a jô minkôme mise me nga kee mie minkôme Babilôn, mi soʼo Yérusalém na:

⁵ lôñane menda a tabʼété; béane mefup a di bibuma yʼété.

⁶ Luʼane binga a biaé bobefam a bobebinga; luʼane bobefame benane binga a keane bengone benane meluk na be biaé bobefam a bobebinga; fôan e vôme mi né a te nyolan.

⁷ Jeñane mvoʼé ya tisone me keya mia minkôm a yeʼelane Nti asu mvaé ya tison éte, amu mvoʼé jenan é tii énjé.

⁸ Amu avale di Nti ya minsamba mewosan, e Zambe Israél a jô na: Te kañesane na bekulu mejô be ne mia zañ be duʼu mia, nge mimvimviʼi mienan; te vôʼôlane biyeyeme mia yem!

⁹ Amu ba kulu mia minsos a jôé dam; me nji lôme be, nalé Nti a jô.

¹⁰ Vʼavale di nde Nti a jô na: Éyoñe mimbu 70 mi lôteya mfaʼa Babilôn, ma ye zu volô mia, ma ye tôé mbamba nkobô wom mfaʼa wônan, éyoñe ma ye beta zuu mia e vôme nyô.

¹¹ Ma ma yem asimesane me bili ajô denan, nalé Nti a jô, asimesane mvoʼé saake di bidim, nalé ma ye ve mia akiti e bili mam mia ye tabe me ndi.

¹² Eyoñe te ñhe mia ye loone ma, a mia ye bo nguleya ke; mia ye yeʼelane ma, a ma ye yalane mia,

¹³ mia ye jeñe ma a mia ye yene ma, amu mia ye jeñe ma a nleme wônan ôse.

¹⁴ Ma ye bo na mi yene ma, nalé Nti a jô, a ma ye beta soo minkôme mienan; a kôane mia mi soʼo meyoñ mese a mevôm mese me nga jiane mia, nalé Nti a jô, a ma ye beta soo mia e vôme nyô me nga vaa mia nyô a kee mia minkôm.

¹⁵ Ve da, mia jô na: Zambe a veya bia bekulu mejô e Babilôn.

Bidim bia yange mebukaʼa me bôt me ne Yérusalém

¹⁶ Avale di Nti a kobô njô bôt a too éto njôane David, a bôte bese be too tisone nyô, e bobenyoñe benan mia be be mi nji ke minkôm;

¹⁷ Nti ya minsamba mewosan a jô na: Ô lôô ma lôme nkpwaté mekôn, mfumbale zaé, bim e be be, a ma ye bo be be funane bibole befig mbie bi se nguleya diban, amu bi nʼétua abé .

¹⁸ Ma ye tôñe be a nkpwaté mekôn, mfumbale zaé a bim, ma ye bo be jôme ba ko woñ asu bijôé bise ya si nyô, jôme biyoʼé, jôme feʼe ne vema, jôm éwovioé, jôm ôson e meyoñ ma ye jiane be été.

¹⁹ Amu be nji vôʼôlô mejô mam, nalé Nti a jô, mbe me nga lôme bebo bisaé bam be ne bekulu mejô, me nga lôme be be ataté mametyé; mi nji vôʼôlô, nalé Nti a jô.

²⁰ Ve mia, vôʼôlaʼan ajô Nti, mia bese, bekee minkôm me nga lôme Babilôn be soʼo Yérusalém!

²¹ Avale di Nti ya minsamba mewosan, e Zambe Israél a jô Akab e mone Kôlaya, Sédékias e mone Maaséya, mbe ba kulu mia mejô ajô dame na: Tame yen ma ve be mo me Nébukatnétzar, njô bôte ya Babilôn, a a ye wôé be mi lôô a mis.

²² Ba ye bo nkana biyoʼé e bekee minkôme ya Yuda be ne Babilôn été be jôʼô na: Nti a boʼo wo ane Sédékias a ane Akab, mbe njô bôte ya Babilôn a nga bo na be diʼi be nduan!

²³ Amu be nga bo jam e nji tame boban Israél été. Be nga bo mejian a binga be bôte ba be be be too bebé, a laa minsos a jôé dam, te na me nga bendé be jam éziñ. Ma yeme de a me ne ngaa, nalé Nti a jô.

Kalate Semaya Yer 20:1-6; 28; 2 P 2:1

²⁴ Wo ye jô Semaya môte ya Néhélame na:

²⁵ avale di Nti ya minsamba mewosan, e Zambe Israél a jô na: Ô nga lôme bekalate a jôé dôé e be bôte bese ya Yérusalém, be Sôfôni e mone ntuni Maaséya, a e be betuni bese be too ntilane na:

²⁶ Nti a teléya wo ntuni éjiane ntuni Yôyada na ô bo ésaé Nda Nti, ji ya fombô môt ase a ntoo ane mbili bilam a a nyoñ émiene nkulu mejô, nalé wo ye futi nye bibome mebo a bibôñeté.

²⁷ Eyoñe ji, amu jé ô nji bo Yérémi môte yʼAnatote nalé, nye a yené ane nkulu mejô be mia, a nye a nga lôme bôt be kate bia Babilône na:

²⁸ lôñane menda a tabʼété; béane mefup a di bibuma yʼété!

²⁹ Ntuni Sôfôni a nga lañe kalate ate nkulu mejô Yérémi a too.

³⁰ Eyoñe te ajô Nti e nga litibane be Yérémi na:

³¹ lôme bôt be kate bekee minkôme bese na: Avale di Nti a jô Semaya môte ya Néhélame na: Amu Semaya a kulu mia mejô te na me lôme nye, a amu a ve mia ndi nlem é ne minsos,

³² jame Nti a jô nde dina na: Ô lôô, ma ye wosane Semaya môte ya Néhélam a mvoñe bôte jé; teke môte ya bôte bé a ye tabʼézezañe ya bôte ba, a a ye bo te yene mvaé ma ye bo bôte bam, nalé Nti a jô; amu nkobô wé wo wosane Nti.