YEREMIA 27 - Bible en langue Bulu

Melebe me Yérémi: Yuda a kañeseʼe nyiin ébôñeté Babilône si

¹ Atataʼa éjôé Yôyakim, e mone Yôzias, njô bôte ya Yuda, nkobô wu ô nga litibane be Yérémi ô soʼo be Nti na:

² Avale di Nti a jô na: Boʼo womiene mengataʼa a bibôñeté, futiʼi bie e tyiñe jôé.

³ Lôme bie njô bôte yʼEdom, nyô ya Môab, nyô Beamônit, nyô ya Tir a nyô ya Sidoñ, ô Kalaʼane bie minlôman mi ne nsoone Yérusalém be Sédékias, njô bôte ya Yuda.

⁴ A wo ye kalane mie mebendé mam asu masa wop ô jôʼô na: Avale di Nti ya minsamba mewosan, e Zambe Israél a jô na: Jam mia ye jô bemasa benan nde di:

⁵ Ma me nga té si, bôt a betit be ne si nyô a beta ngule wom a wo wom ô ne nsaman, a ma ve si e be môt ma yene mvaé.

⁶ Eyoñe ji, ma ve mesi mese ma e mo me Nébukatnétzar, njô bôte ya Babilôn, mbo ésaé wom; ma ve fe nye betite ya fé na be saane nye.

⁷ Meyoñ me bôte mese ma ye saane nye, émien, mone wé a ndaé jé, akekui éyoñe ya si jé fe ja ye kpwaan a na, meyoñ me nʼéwôlô a beta bejô bôte ba ye futi nye éjôé jabe si.

⁸ Nge ayoñ éziñ, nge éjôé ja bo te saane Nébukatnétzar, njô bôte ya Babilôn, a bo te ve tyiñe jé ébôñeté njô bôte ya Babilôn, ma ye wosan ayoñe te a nkpwaté mekôn, mfumbale zaé a bim, nalé Nti a jô, akekui ma ye mane jiane de a wo wé.

⁹ Mfaʼa wônan (Yuda) te vôʼôlane bekulu mejô benan, mimvimviʼi mienan, biyeyeme bienane miabebien, bebo mesimba benan, mingbwengbwele mienan mbe ba jô mia na: Mia ye bo te saane njô bôte ya Babilôn!

¹⁰ Amu ba kulu mia minsose na mi ke si jenan ôyap, nalé ma ye jiane mia a mia ye mane wu.

¹¹ Vʼayoñ da ye kee tyiñe jé ébôñeté njô bôte ya Babilôn a saane nye, ma ye ve be nyʼawoʼon e si jé, nalé Nti a jô, na a bé biôm a tabʼété.

Akum e nga liʼi Nda Nti da ye ke Babilôn

¹² Avale te ebien nde me maneya kobô Sédékias, njô bôte ya Yuda na: Keʼane tyiñe jenan ébôñeté njô bôte ya Babilôn, boʼone nye bisaé, émien a bôte bé, éyoñe te mia ye nyiñ.

¹³ Amu jé mia yiane wu wo, a bôte bôé, a nkpwaté mekôn, mfumbale zaé a bim, avale Nti a maneya jô, ayoñ ese da ye bo te saane njô bôte ya Babilôn?

¹⁴ Te vôʼôlane mejô bekulu mejô ba jô, mia na: Mia ye bo te saane njô bôte ya Babilôn! Amu jam ba kulu mia e ne minsos.

¹⁵ Me nji ke lôme be, nalé Nti a jô. A ba kulu minsos a jôé dame na me jiane mia a na, mi mane wu, mia, a bekulu mejô ba kulu mia mejô:

¹⁶ Me kobôya betuni a bôte bana bese na: Avale di Nti a jô na: Te vôʼôlane mejô bekulu mejô benan ba kulu mia mejô be jôʼô na: Yenan éyoñe jina na, biôme ya Nda Nti bia ye so Babilôn anaʼana! Amu jam ba kulu mia e ne minsos.

¹⁷ Te vôʼôlane be, ve boʼone njô ya Babilône bisaé éyoñe te mia ye nyiñ. Amu jé tisone nyô ja yiane liʼi bilik?

¹⁸ Nge be ne bekulu mejô, a ngʼajô Nti e ne be be, be yeʼelaʼane ñhe Nti ya minsamba mewosan asu biôme bi liʼiya Nda Nti, nda njô bôte ya Yuda a e Yérusalém na bi bo te ke Babilôn.

¹⁹ Amu avale di Nti ya minsamba mewosan a jô ajô mekône, ajô Mañ, metiñ a biôme bivok bi nga liʼi e tisone nyô,

²⁰ mbie Nébukatnétzar, njô bôte ya Babilôn a nji nyoñ éyoñ a nga kee bôte bana minkôme Babilôn a soʼo be Yérusalém: Yékônia e mone Yôyakim, njô bôte ya Yuda a benya bôtô bese ya Yuda a Yérusalém;

²¹ avale di Nti ya minsamba mewosan, e Zambe Israél a jô ajô biôm bi ngenane Nda Nti, nda njô bôte ya Yuda a e Yérusalém.

²² Bia ye keebane Babilôn a bia ye tabe wé, akekui môse ma ye yaa asu dap, nalé Nti a jô, éyoñe ma ye bo na bi bet a beta kui e vôme nyô.