YEREMIA 25 - Bible en langue Bulu

Mimbu mewôme zamgbwa e minkôm Babilôn a meyoñe mese ba tôbane melep

¹ Mejô Nti a nga kobô Yérémi ajô bôte bese ya Yuda mbu nyini Yôyakim e mone Yôzias njô bôte ya Yuda a nga too a mbu ôsu Nébukatnétzar njô bôte ya Babilôn a nga jôô,

² nkulu mejô Yérémi a nga yôtane mejô mete e be bôte bese ya Yuda a bôte bese be nga too Yérusalém:

³ ataté mbu awôm a wua Yôzias e mon Amon, njô bôte ya Yuda, a kui môse wu, nalé a ne na, tañe mimbu mewôm mebaé a mila, Nti a kobôʼô ma, a me nga kobô mia teke kat, ve mia teke wôʼô ma.

⁴ Nti a nga lôme mia bebo bisaé bé bese, bekulu mejô, teke kat ve mia teke wôk, teke kee alo na mi vôʼôlô.

⁵ (Bekulu mejô bete) be mbe be jôʼô na: Bulaʼane ñhe môt ase, mbia zene wônan a évô ya mimboone mienan, nalé mia ye tabe e si Nti a nga ve mia a bʼésoo benan nnôm éto a nnôm éto.

⁶ Te boon élat a bezambe befe na me wôʼôlun a mbaane jôme ya mo menan éyoñe te ma ye bo teke bo mia abé éziñ.

⁷ Ve mi nji wôʼô ma, nalé Nti a jô, asu ya bo me na me wôʼôlun amu mbaane jôme ya mo menan, asu bidime bienan.

⁸ Ajô te Nti ya minsamba mewosan a kobô avale di na: Amu mi nji vôʼôlô mejô mam, me nyô,

⁹ ma ye lôme na be jeñe meyoñ bikule mese yʼakôé, nalé Nti a jô, a Nébukatnétzar, njô bôte ya Babilôn, mbo ésaé wom, ma ye zuu be na be wosane si jenan a bôte be too été a meyoñ mese ma bôman, nalé ma ye jiane me a bo me jôme ya feʼe ne vema, éwovioé a bilik nnôm éto.

¹⁰ Mame mana ma ye man e zañe jab: bia mefôn a mevak, bia bi ndôman ja luk a bi ngon ja ke aluk, éduñ akoʼo ba koʼo bidi a éfufube lambe.

¹¹ Si nyôna ése ja ye bo bilik, jôm ôlun, a meyoñe bikule ma ma ye saane njô bôte ya Babilôn tañe mimbu 70.

¹² Vʼéyoñe mimbu 70 mite mi kpwaneya, ma ye wosane njô bôte ya Babilôn a ayoñe bôte di, nalé Nti a jô, amu bikobe biap. Ma ye wosane fe si Bekaldééñ a bo je jôme melunga nnôm éto.

¹³ Mam mese me nga kate na ma ye boban be si jenan, ma ye bo na me kui éte, jam ese e ne ntilan e kalate nyô a jame Yérémi a nga kulu meyoñe bikule mese ngame yat.

¹⁴ Amu meyoñ me ne biwôlô a beta bejô bôt ba ye tibili be, be fe, a ma ye bulane be ane mimboone miap a anʼésaé ya mo map bi né.

Minkulane mejô ajô meyoñ

¹⁵ Amu avale di Nti, e Zambe Israél, a kobôya me na: Nyoñe élaé é ne njalan a woon ayaa ji e wo wom été, nyuʼu je meyoñ mese mfaʼa ma lôme wo.

¹⁶ Be nyaʼak, be kele ba ndembe, a be boʼo mekut éyoñe ba ye yene nkpwaté mekôn, ñwô ma lôm ézezañe jap.

¹⁷ Nde me nga nyoñ élaé e mo me Nti a me nga nyuu je meyoñ me bôt, mfaʼa Nti a nga lôme ma.

¹⁸ E Yérusalém a bitisone ya Yuda, e be bejô bôte bé a biwôlô bebo bisaé bié, asu ya bo bie bilik, jôme feʼe ne vema, éwovioé a jôme biyoʼé, avalʼane môse wuna ôbien;

¹⁹ e be Faraoñ njô bôte yʼEjipte, e be bebo bisaé bé, bivete bié a bôte bé bese.

²⁰ E si jôb da dim ése, e be bejô bôte ya si Uts, e be bejô bôte bese ya si Befilisteñ, e Askalôn, Gaza, Ekroñ a e be mebukaʼa me liʼiya Asdôd;

²¹ e bʼEdom, Môab a Beamônit;

²² e be bejô bôte bese ya Tir, e be bejô bôte bese ya Sidoñ a e be bejô bôte yʼékôte mañ é ne mañe yat;

²³ e be Dedan, Téma, Buz, e ba bese ba tyeñebane mekuʼu me ze;

²⁴ e be bejô bôte yʼArabi a e be bejô bôte bese ya jôbe da dim, mbe be too nkôte si;

²⁵ e be bejô bôte bese ya Zimri, e be bejô bôte bese yʼElam a bejô bôte bese ya Médi;

²⁶ e be bejô bôte bese yʼakôé, toʼo bana be ne bebé ngʼôyab a ba bevok, a e be bijôé ya si bi ne si nyôna yôp a njô bôte ya Sésak a ye suʼulane nyu mvuse jap.

²⁷ Wo ye jô be na: avale di Nti ya minsamba mewosan, e Zambe Israél a jô na: nyaʼan, mi sok a yô, kpwaʼane si te beta tebe tetele, éyoñe mia ye yene nkpwaté mekôn ma ye lôme zañe jenan!

²⁸ Nge ba bene nyoñ élaé wo wôé été na be nyu je, wo ye jô be na: avale di Nti ya minsamba mewosan a jô na: Nyaʼan, nyaʼan!

²⁹ Amu tame yen: nne ma taté zuu bidim e tisone ba loone jôé dam; ye mia buni na mia ye fame nga? Mia ye bo te fam, amu ma loone nkpwaté mekôn e be bôte bese be too si nyô, nalé Nti ya minsamba mewosan a jô.

³⁰ A wo wo ye kulu be mam mete mese a wo ye jô be na: Nti a bame yôb été, a ve tyiñ a too éto jé é nʼétyi; a kuli memvame mé ngame yate ya vôm a nʼéñwé; a bam ane ba ba tyaʼa bisañ bi woon, e ngame yate ya bôte bese be too si nyô.

³¹ Eduñ ja kui susuʼa si; amu Nti a bili ajô a meyoñ , a tyiʼi nsôn ôse ajô; a kee nkpwaté mekôn e bôt be nʼévô nalé Nti a jô.

³² Avale di Nti ya minsamba mewosan a jô na: tame yen bidim bia ke bia kalan ataté ayoñe di a kui di avok, a beta ôkôs a vuñ e susuʼa mekuʼu me si.

³³ Ba Nti a ye wôé môs ôte ba ye yené wé. Ataté akuʼu si di a kui di avok; ba ye bo teke bisulane mewu, teke môt a ye nyoñe be; ba ye bo te soñ ya jambe je, ba ye bo akun e si nyôna yôp.

³⁴ Yônan a bebaʼale mintômba, betaʼane tyiñe yôp! Bumane tyia a beyaʼale mimbame biyem! Amu mimôse mia ye tyiʼibane tyiñ a tabe mmialan mi kpwaneya. Mia ye ku avale jôm é ne tañ anen é ne bo.

³⁵ Teke fʼasoé asu bebaʼale mintômba! Teke fʼasoé asu beyaʼale mimbame biyem!

³⁶ Wôʼane ñyône bebaʼale mintômba, du beyaʼale mimbame biyem, amu Nti a ndamane ôbute viap.

³⁷ Bivôvoé mebemba bi ne ne mieññ amu ayôñ ayaa Nti.

³⁸ A liʼiya étabaʼa jé anʼétoñe ngbwengbwem abôʼa dé, amu si jap é ntoo melunga, amu ayaa mbôé minlam, a amu ayôñ ayaa dé.