YEREMIA 23 - Bible en langue Bulu

Ajô mbia bebaʼale mintômba

¹ Ngoʼo bebaʼale mintômba ba jañele, a tyamelane mbame yʼôbute viam! Nalé Nti a jô.

² Ajô te Nti e Zambe Israél a jô ajô bebaʼale mintômba ba ve bôte bame bidi na: mi maneya tyamelane mintômba miam, mi maneya titane mie, mi nji wu mie njuk, mi lôô ma ye wosane mia amu évô ya mimboone mienan, nalé Nti a jô.

³ A ma ye kôane mebukaʼa ya mintômba miam, me soʼo mie mesi mese me nga mane mialane mie, a ma ye bulane mie abemba dap, mia ye fôé a bo abui.

⁴ Ma ye telé bebaʼale mintômba e be mie, ba ba ye ve be bidi; mia ye bo te beta ko woñ, nge fôʼôban, a teke wua wo ye jemban, nalé Nti a jô.

⁵ Tame yen, melu ma zu, nalé Nti a jô, mme ma ye bo zôsôa éfaʼalé a faa asu David; a ye jôô mbamba njôan, a ye belane metiñ a zôsôa ntyiʼane mejô e si a ye jôô été.

⁶ Yuda a ye nyiiban éyoñe jé, a Israél a ye tabe mvoʼé e vôme wé; ba ye loone nye jôé na: Nti, e zôsôô wongan.

⁷ Ajô te ô lôô, melu ma zu, nalé Nti a jô, mme ba ye bo te beta jô na: Nti a vee, nyô a nga soo bone bʼIsraél Ejipte!

⁸ Ve ba ye jô na: Nti a vee nyô a nga beta soo mvoñe ya nda bôt Israél e si yʼakôé. A soo fe be mesi mese me nga mialane be! A ba ye tabe si jap.

Ajô bekulu mejô be ne minsos

⁹ Ma kobô bekulu mejô na: nleme wom ô ne ntyaʼan abume dam été. Bivese biame bise bia tyibelan; me nʼane môt a biliya bilam, e nyô bilam bi biya, amu Nti a amu mejô mé me nʼétyi.

¹⁰ Amu si é ne njalan a mejian , si é nʼôlun été amu biyoʼé; ôbute ya fé ô maneya kôt. Ba mate mbile ya bo abé , ayok e ne vʼasu ya bo ékotekot.

¹¹ Bekulu mejô a betuni be maneya kuseban; me kooneya évô jap jaʼane nda jam été, nalé Nti a jô.

¹² Ajô te zene jap ja ye sendé a bo dibi, ba ye sôʼôlô be a ba ye ku; amu ma ye zuu bidime be be mbu ma ye wosane be, nalé Nti a jô.

¹³ Me yeneya bʼangôndô be mam e be bekulu mejô ya Samari; be kuluya mejô a jôé Baal, be keya Israél, ayoñe dame zene fe.

¹⁴ Ve me yeneya mam ma dañ angôndô e be bekulu mejô ya Yérusalém; be ne mejian , ba wulu ékotekot été; ba yemete mo me bôt ba bo abé na wua éziñ a bo te bulane mvus évô jé été; bese be ne e mise mam ane Sodom, a bôte be too Yérusalém ki ane Gômor.

¹⁵ Ajô te Nti ya minsamba mewosan a kobô ajô bekulu mejô avale di na: tame yen ba ye ve bʼôvuta be di, a ma ye nyuu be mendim me bili nsu; amu éboteze é Yianeya si jenan ése, é soʼo be bekulu mejô ya Yérusalém.

¹⁶ Avale di Nti ya minsamba mewosan a jô na: te vôʼôlane mejô bekulu mejô ba kulu mia mejô! Ba duʼu mia, ba kañete mia miñyemane ya minleme miab mibien, saake jam da so anyu Nti.

¹⁷ Be bili ayoʼo nleme ya kôme jô ba ba biasé ma na: Nti a jôya na: mia ye tabe mvoʼé . A ba jô môt ase a tôñe ntibe ya nleme wé na: bidime biziñ bia ye bo te kui be wo!

¹⁸ Beza ñhe be tabeya ésoʼo Nti asu ya yen a wôʼô nkobô wé? Zʼa tabeya ntyele ya wôʼô ajô dé, zʼa vôʼôlôya nye?

¹⁹ Tame yene ôkôs Nti: ayaa e vameya atan, ékoʼo mveñ ñhe ji, ja tyiñelan e nlô bebo abé .

²⁰ Ayaa Nti da ye bo te kôlô akekui e jaléya, e boya nkômbane ya nleme wé. Asuʼulane ya biyoñ, nde mia ye tuʼa yeme de.

²¹ Me nji lôme bekulu mejô bete, ve be mateya mbi; me nji kobô be, ve be maneya kulu mejô.

²² Nge be too ye tabʼésoʼo jam, be nga ye bo bekalane nkobô wom e be bôte bam, a bo be na be bulane mvus e mbia mezene map, évô jap a mimboone miap.

²³ Ye me ne foʼo ve Zambe a ne bebé, nalé Nti a jô, ngaa me ne fe Zambe a nʼôyap?

²⁴ Ye môt éziñ a ne sobô e vôm éziñ me te yene nye? Nalé Nti a jô. Ye me nji bo nyô a jalé yôp a si? Nalé Nti a jô.

²⁵ Me wôʼôya jame bekulu mejô ba jô, mbe ba kulu minsos a jôé dam be jôʼô na: me yemeya biyeyem! Me yemeya biyeyem!

²⁶ A kui éyoñ évé nje bekulu mejô bete ba ye bi jame te minleme na, be kulu minsos, be kulu meduʼane ya minleme miap.

²⁷ Ba simesane bo bôte bam na be vuane jôé dam amu biyeyeme biap, ba kañete, wua e be nyô mbok, avale bʼésaa bap be nga vuane jôé dam amu Baal.

²⁸ Nkulu mejô a bili biyeyem, a kañeteʼe biyeyeme bite. A nyô a bili nkobô wom, a kañeteʼe wô aval ô né. Bikumbaʼa a nya fônô be bili jé fufulu? Nalé Nti a jô

²⁹ Yʼajô dam e nji bo ane nduan, nalé Nti a jô, a avalʼane vamak ja bôé akok?

³⁰ Ajô te nde me ne bekulu mejô ngame yat, nalé Nti a jô, mbe ba wube mejô mam, wua e be nyô mbok!

³¹ Me ne bekulu mejô ngame yat, nalé Nti a jô, mbe ba belan ayeme dap asu ya kate ajô Nti.

³² Me ne ba ba kuli biyeyem bi ne minsose ngame yat, nalé Nti a jô, mbe ba kañete a yale bôte bame zene fe, a minsose miap a évuvuʼu nkobe jap. Ve ma me nji lôme be, me nji ve bʼabendé éziñ, a be nji volô ayoñe bôte dina jôm éziñ, nalé Nti a jô.

Ye nkobô Nti ô ne mbeʼe

³³ Nge bôte bana, nge nkulu mejô éziñ, nge ntuni ba sili wo na: ayaa Nti e ne jé? Wo ye kate be jôm ayaa te e né: ma ye wua mia fé, nalé Nti a jô.

³⁴ A nkulu mejô, ntuni nge môte yʼayoñ a ye jô na: Ayaa Nti; ma ye ke nye ngame yat a nda bôte jé.

³⁵ Mia ye jô, môt ase e be nyô mbok, môt ase e be monyañ na: Nti a te yalan aya? Nti a te jô aya?

³⁶ Ve mia ye bo te beta kobô ajô ayaa Nti; amu nkobô môt émien ñwô wo ye bo ayaa e be môt ase. Mia vite mejô me vevea Zambe, Nti ya minsamba mewosan, e Zambe wongan.

³⁷ Wo ye sili nkulu mejô na: Nti a te yalane wo aya? Nti a te jô aya?

³⁸ A nge mia beta jô na: ayaa Nti! Eyoñe te Nti a jô avale dina: amu mia jô éfia te na: ayaa Nti, akôsa bo me nga lôm be kate mia na: te mia beta jô na ayaa Nti!

³⁹ Amu ajô te, mi lôô, ma ye foʼo suu mia, a ma ye wua mia ôyap asu dam, miabebien a tisone me nga ve mia, a bʼésoo benan.

⁴⁰ Ma ye futi ôsame a tabe nnôm éto be mia, ôson wo ye tabe nnôm éto, a ô too te kʼavuan.