YEREMIA 22 - Bible en langue Bulu

Nti a ne ndaa njô bôte ya Yuda ngame yat

¹ Avale di Nti a jô na: Kele nda njô bôt a nee Yuda a kobô ajô dina wé;

² wo ye jô na: Wôʼô ajô Nti a jô wo njô bôte ya Yuda ô too éto njôane David, wo, bebo bisaé bôé, a ayoñe bôte dôé, mia mia nyiin e mimbé mi!

³ Avale di Nti a kobô na: Boʼone zôsôô a tyiʼi mejô ane da yian; kôtaʼane nyô ba diane nye e mo me ntibili bôt; te kpweʼelane ntabe , monenyui a nkuse minga; te boon évô, a te kulane metyi me ne te bijô e vôme nyô.

⁴ Amu nge mia bo foʼo ane nkobô wuna ô né, wôna bejô bôte be too éto njôane David ba ye nyiin e mimbé ya nda nyô be bete bevagoñ a bikabela, be, bebo bisaé bap a ayoñe bôt.

⁵ Ve nge mia bo te vôʼôlô mejô mete, ma kane mamiene ngana, nalé Nti a jô na, nda nyô ja ye bo bilik.

⁶ Amu avale di Nti a jô nda njô bôt a nee Yuda na: Ô ne ane Galad mfaʼa wom, anʼabôbône nkôle Libañ; vʼe ne bebela na ma ye bo wo bilik, tison é ne teke bôt.

⁷ Me tobeya betyam be wosane wo, môt ase a mengale mé. Ba ye tyiʼi bilé bi sédre biôé bia dañ abeñ a wua bie e nduan.

⁸ Jama meyoñ a ye lôte bebé tisone nyô, a jô dina e be di avoʼo na: amu jé Nti a nga bo beta tisone nyô ana?

⁹ Eyalan ja ye bo na: amu be nga liʼi élate Nti, e Zambe wop, Amu be nga kute bezambe befe meboñe si a kañe be.

¹⁰ Te yônane nyô a ne ñwuan, nge sañelan amu ajô dé; ve yônan, yônane nyô a ke minkôm, amu a ye bo te beta so, a ye bo te beta yene si a nga bialé.

¹¹ Amu avale di Nti a kobô ajô Salum, e mone Yôzias, njô bôte ya Yuda, nye a nga Jôô éjiane Yôzias, ésaa wé, a nye a nga kôlô vôme nyô, a a ye bo te beta zu été;

¹² vʼa ye wu e vôme be nga kee nye minkôm, a a ye bo te beta yene si mi too nyô.

Ajô Yôyakim

¹³ Ngoʼé môt a lôñe nda jé a biaséʼé nya ntyiʼane mejôô, a lôñe bitune menda bié ya yôp a biaséʼé metiñ; nyô a bo na môte mbok a saane nye zezé, teke ve nye maʼane mé;

¹⁴ nyô a jô na: Ma ye lôñe mamien anene nda , bitune bi nda bi too ndam, a tube bevundi été be bili sédre a ndubane bivele meyañ.

¹⁵ Ye wo jôô amu wo dañe nyeʼe sédre? Yʼésoo a mbe te di nge nyu? Vʼa nga baʼale metiñ a nya ntyiʼane mejôô, ajô te mam mese me nga wulu nye mvoʼé;

¹⁶ a mbe a kobôʼô ajô éngôngole môt a nzôzoé , ajô te mam mese me nga wulu nye mvoʼé; ye sa ñyemane ya yeme ma ñwô le? Nalé Nti a jô.

¹⁷ Ve mise môé a nleme wôé bi lôô foʼo ve mvaé jôé, asu ya kuli metyi me môt a ne te bijô, a asu ya belan étibelaʼa ja koʼo bôte bevok.

¹⁸ Ajô te Nti a jô avale di, ajô Yôyakim mone Yôzias, njô bôte ya Yuda na: ba ye bo te bo nye ésulan awu be jôʼô na: ngoʼo mojañ! Ngoʼo bekale bam! Ba ye bo te bo nye ésulan awu be jôʼô na: zʼajô di a Nti, zʼajô di a njô bôt!

¹⁹ Ejamembime jé ja ye bo ji éjakas, ba ye dutu nye si a wua nye mimbé ya Yérusalém atan.

Ôson a ôsame asu Yérusalém

²⁰ Betek e Libañ a yôtan! Vaʼa tyiñ e Basañ! Yôtaʼan ô betʼabarime yôp! Amu ba bese be mbe be nyekeʼe wo be ntoo ntyamban.

²¹ Me nga kobô wo éyoñe mam mese me mbe wo mvoʼé : nde ô mbe ô jôʼô na: Ma ye bo teke wôʼô wo. Fulu jôé, aso mongô, e nje le; ô nji wôʼô tyiñe jam.

²² Bebaʼale mintômba bôé bese ba ye bo bidi bi évuñulu, a ba ba nyeʼe wo ba ye ke minkôm; éyoñe te ôsame a ôson bia ye bi wo, amu évô jôé ése.

²³ Wo ô too Libañe yôp, wo ô bili dumbaʼa e besédre été, abim avé wo ye tat éyoñe mintaé mia ye kui be wo, minyimelan ane mi minga a kôʼôlô mie!

²⁴ Ane me vee! Nalé Nti a jô, toʼo Kôniahu, e mone Yôyakim, njô bôte ya Yuda, a nga ye bo élondo e mbo nnôme wom, me nga ye vaa wo.

²⁵ Ma ye kee wo e mo me ba ba jeñ ényiñe jôé, e mo me ba wo tyibelan ôsu viap, e mo me Nébukatnétzar, njô bôte ya Babilôn, e mo Bekaldééñ.

²⁶ Ma ye wua mia, wo a nyua a nga biaé wo, e si fe, nje mi nji bialé, a mia ye wu wé.

²⁷ Ve ba ye bo te bulan e si ba ye kômbô bulan;

²⁸ môt ate, kôniahu, a ne jé, ye mbôlane beʼe ô ne te fe volô jôm, vieʼe étek ñwô môt a nji fe kômbô? Amu jé be nga wua be, nye a bone bé, a wua be si be ne te yem?

²⁹ A si jam, si jam, wôʼô nkobô Nti!

³⁰ Avale di Nti a jô na: tilaʼane môt ate ane nyô a ne teke bon , ane môte mam me nji wulu mvoʼényiñe jé. Amu teke môt a ye kui e mvoñe bôte jé na a tabʼéto njôane David, a jôô Yuda.