YEREMIA 20 - Bible en langue Bulu

¹ Pasur, e mone Imér, ntuni a évete bebaʼale Nda Nti, éyoñ a nga wôʼô ane Yérémi a kulu mam mete,

² a nga bibi nkulu mejô Yérémi a futi nye e bibom été mbie bi mbe mbé Bényamin ô mbe mfaʼa yʼakôé, e nda Nti été.

³ Ve mametyé, Pasur a nga vaa Yérémi bibom. Ane Yérémi a nga jô nye na: Saake jôé Pasur nde Nti a yôlé wo, ve di Magog-Misabib

⁴ Amu avale di nde Nti a jô na: Me futiya wo e woñ été, wo a bemvôé bôé bese; nkpwaté mekône besiñe bap wo ye kpwé be, a mise môé ma ye yene jame te. Ma ye fe ve Yuda ase e mo me njô bôte ya Babilôn, a ye kee be minkôme Babilôn, a wôé be a nkpwaté mekôn.

⁵ Avale te fe ma ye ve biôme bise ya tisone nyô bi ne mbaʼalan, bibuma bise yʼésaé jé, e biôme bise bi nʼété bi too bidima, ma ye ve akume bejô bôte ya Yuda ese e mo besiñe bap, mbe ba ye bo de biôme biabe ya nsa, ba ye vaa bie a kee bie Babilôn.

⁶ Wôna wo, Pasur a ba bese be too nda jôé, mia ye ke minkôm; wo ye ke Babilôn, wo ye wu wé a jambe fe wé, wo a bemvôé bôé bese ô nga kulu mam mese me ne minsos.

Yérémi a yône be Nti

⁷ A Nti, ô nga dutu ma a me nga jôʼé na ô dutu ma; ô nga bi ma a ô nga dañ. Môs ôse me tele ôsame été, bôte bese ba kpweʼele ma,

⁸ amu biyoñe bise ma kobô, da sili na me yôn. Toʼo ma yôtane na: Évô a éndaman. A ajô Nti e nʼasu dam jam ôsame a éwovioé ngumba môs .

⁹ Nge ma jô na: ma ye bo te beta tote jam éziñ e nambeʼe nye, ma ye bo te beta kobô a jôé dé, nleme wom wo bo vʼane vôme nduan ja yôñ é dikiʼi ma bives, ma wôʼ ateʼe nyôle ya bi de nkôm, a me se nguleya bo nalé.

¹⁰ Amu ma wôʼô mbia minkobô yʼabui bôt: ba yôlé me na «woñe mimfaʼa mise». Kañetaʼan! Nkañetaʼane de! Ba bese be mbe be too me mvoʼé ba fombô nge ma tek be jôʼô na: éyoñ éziñ a ye jôʼé be dutu nye, a éyoñe te bia ye dañe nye, a bia ye suʼulane kune biabebiene be nye!

¹¹ Ve Nti a ne be ma anʼéwôlô mben; amu ajô te nde bekpweʼele bam ba ye kolé ôbak a bo te dañ. Ba ye foʼo wôʼôson amu jam be nga kômbô bo e nji wulu mvoʼé : ôsone te wo ye bo wu ya nnôm éto, ô too te kʼavuan.

¹² Nti ya minsamba mewosan a veʼele nyô a ne zôsôô , a yen asimesan a minlem. Ma ye yen akunaʼa dôé be be amu wo ma kee ajô dam.

¹³ Yiʼane Nti bia, kañane Nti! Amu a kôté ényiñ éngôngole môt e mo me ba ba bo abé .

¹⁴ Môse me nga bialé ô boʼo biyoʼé! Môse nyia wom a nga biaé ma ô boʼo te ébotan!

¹⁵ Biyoʼé bi boʼo be môt a nga soo mbamba foé bʼésaa wom na: monafam a bialéya wo a nyʼ ate a nga jalé nye a mevak!

¹⁶ Môt ate a boʼok ane bitisone Nti a nga mane bulekan teke mejôbaʼan! Nti a wôʼô miñyône mametyé a abui zôʼé awolo ya zañe môs !

¹⁷ Amu nye a nga bo na me bo te wu abume nyia wom été, éyoñe te nyia wom a nga ye bo soñe jam a a nga ye beʼe abum nnôm éto!

¹⁸ Amu jé me nga kui abume nyia wom asu ya yene njuk a mintaé a asu ya diʼi melu mam ôson été?