YEREMIA 2 - Bible en langue Bulu

Israél a bene Zambe

¹ Nti a nga kobô me na:

² kelek a kobôʼô melo me bôte ya Yérusalém na: Avale di nde Nti a jô na: Ma simesane nyeʼan wôé éyoñ ô mbe ngone minga, nkabetan ô nga kabetane ma bi too atiñ aluk, éyoñ ô mbe ô tôñe ma fé été, e vôm a ne nkôt.

³ Israél a mbe ntelan étyi asu Nti, a mbe bembômô ya akum a nga bili; ba bese be nga di di be, be nga nyoñe mekua, a bidim bi nga kui be be, nalé Nti a jô.

⁴ Vôʼôlaʼan nkobô Nti, a mia nda bôte Yakob, a mia menda me bôte mese yʼayoñ Israél!

⁵ Avale di nde Nti a jô na: ékotekot évé bʼésoo be nga yene be ma, nje be nga kee ma je ôyap, a ke lat a jôm é ne momo, a suʼulane bo bebiene momo?

⁶ Be nji sili na: Nti a ne vé, za a nga soo bia si yʼEjipte, za a nga wulu bia nkôte si, e sii aziziʼi bilé a bibé, si é nʼayet a nyôô nsisiñ awu, e si môt éziñ a ne te lôt, a vôme môt éziñ a nji tabe?

⁷ Me nga zuu mia e si é bili mefube bilé bia wume bibuma na mi di mvaé bibuma yʼété; vʼéyoñ mi soya, mi viane veñesane si jam jôm é ne te mfuban , a bo ngabe si jam jôm é nʼangôndô.

⁸ Betuni be nji sili na: Nti a ne vé? A beyeʼele metiñ be nji yeme ma, bebaʼale mintômba be nga bo ma bijabô, bekulu mejô be nga kulu mam a jôé Baal, a ke lat a ba be ne tekeʼe mvolan éziñ.

⁹ Amu ajô te me beteya bi mia ajô, nalé Nti a jô, me bili ajô a bendaé benan,

¹⁰ Kelane bikôte bi mañe ya Kitim a fombaʼan! Lômane bekatefoé e Kédar, a tukaʼane yemelan, yenan nge jam afe da funane dili!

¹¹ Ye ayoñe bikul éziñ da tyendé bezambe bé, akôsa bo na be nji bo bezambe? Ve bôte bam be folaneya étôtoʼo jap, a jôm é ne teke mvolan éziñ!

¹² A yôp! Kuu avem amu jame te; nyeñebaʼan a mane kôt, nalé Nti a jô.

¹³ Amu bôte bam be dimiya bo tañe biyoñ bibaé: be beneya ma, e ma me nʼanjeñe vevea mendim, a ke faʼa bebiene bibé mendim, bibé bi ne ntuban, te nguleya baʼale mendim.

Mintaé a ôlun

¹⁴ Ye Israél a ne ôlo be nga kus nge na wu ô nga bialé e nda ? Amu jé a vebaneya e nsaane biôm?

¹⁵ Bitoñe bengbwengbwem bia bame nye, bia ve tyiñ a futi melunga e si jé été; bôt be nji fe beta bo, e bitisone bié bi maneya diʼiban.

¹⁶ Jaʼane bone be Nôf a Tafanés, be fe ba kendé wo abôbône nlô.

¹⁷ Ye nalé a nji kui be wo, amu ô nga bene Nti, e Zambe wôé, éyoñ ébien a nga wulu wo mbamba zen ?

¹⁸ Eyoñe ji, wo bo jé e zene yʼEjipte, asu ya ke nyu mendime ya beta ôsôé, wo bo jé e zene yʼAsiri, asu ya ke nyu mendime yʼôsôé ô nʼanen?

¹⁹ Nkpwala wôé ô tame lebe wo, a beyeñeyeñe bôé be tame liti wo njuk. Yemek a yene na jame te e nʼabé a ôlune na, ô bene Nti e Zambe wôé, a bo te ko me woñ, nalé Nti ya minsamba mewosan a jô.

Be amu bôé be ne bivôlevôla

²⁰ Me buʼuya ébôñeté jôé, a té mengataʼa môé aso ayap, vʼô nga jô na: ma ye bo te beta bo bijabô; ve da a minga ébamba! Wo kute meboñe si e mone nkôl ase yôp, a élʼése é vee si.

²¹ Me nga bé wo ane mbamba ndiʼi woon, ô too atôk da so mbamba mvoñ; vʼô nga yeme tyendé aya mfaʼa wom? Mi ntoo éyoñe ji ve metôʼô me ndiʼi woone bikuu.

²² Jaʼan ô too ye sôbe womien a ékôn, ô belaʼan abui sobô, ékobe jôé é nga ye kʼôsu a yené asu dam, nalé Zambe, nyô a ne Nti a jô.

²³ Ô ne yeme jô aya na: me nji ve mamiene mvin, me nji tôñe nkañane Bebaal? Fombôʼô ane wo wulu mbiʼili! Yeme jam ô nga bo! Wo funane ngale kamel, a mate li a li.

²⁴ Wo funane ngal éjakase yʼafan, nyʼa maneya yembane mevôm me ne teke bôt; nyʼate a ke a vee jôé mfep amu nkômban ô bili nye. Teke jôm é ne telé nye, amu ayoñe nkômban e bili nye. Beyôm ba jeñe nye be se nguleya tek, ba koone nye nné anʼayôñ da bi nye.

²⁵ Tabeʼe ntyee a Israél! Amu éyoñe wo mate avôle nalé, wo ye balé womiene meveñe mebo, wo ye bo na éngoñ é bo wo nkôt! Ve wo yalane ma na: Te jañele éyoñ, ma nyeʼe bezambe bikuu ma ye lat a be!

²⁶ Avale ñwuwup wo wôʼôson, éyoñ be kulaneya wô, avale te ba ya nda bôt Israél be wuya ôson: bebien, bejô bôte bap, biwôlô bebo bisaé biap, betuni bap a bekulu mejô bap.

²⁷ Mbe ba jô élé na: Ô nʼésaa wom! A jô fʼakoʼo na: Ô nga biaé ma! Amu be nga lume ma mvuse jap, saake asu dap. A éyoñe be ntoo bidim été, be me na: Kôlôʼô si, nyiʼi bia!

²⁸ Bezambe ô nga bo, be ntoo ñhe vé? Be kôlôʼô ñhe si, nge be ne nguleya nyii wo éyoñe bidim! Amu abime bitison ô bili nde fe bezambe bôé be né, a Yuda!

Zambe a zu kee Yuda aba mejô

²⁹ Bia wo bia ye tebʼaba mejô amu jé? Mia bese mi nga bene ma, nalé Nti a jô.

³⁰ Me nga bôme bone benan e zesé; be nji ke kômbô nyoñe nyeʼelan; nkpwaté mekône wônan ô nga wôé bekulu mejô benan, avalʼane ngbwengbwem ja jian.

³¹ A mia bôte ya miaé wu, wôʼan ajô Nti! Ye me nga yené bilik e bʼIsraél, nge si é ne dibi? Amu jé bôte bam ba jô na: bi ne fili, bi nji kômbô beta bulane be wo!

³² Ye ngone minga ja vuane biôme bi nyanga bié, nge minga a luʼuban e kandé jé? Ve bôte bam be vuaneya ma aso melu me ne tʼalañé.

³³ Wo dañe fek e dulu dôé été, asu ya jeñe nyeʼan! A éyoñe jijia te, ô veñesaneya mbia ntabane wôé a bo nyeʼelan.

³⁴ Metyi ya bingôngole bi bôt bi ne te bijô, mbie ô nji dilan bi boʼo jam éziñ, me ne a kui minwôndé ya ngômesane jôé.

³⁵ Ve mfaʼa metyi mete mese, wo yalane na: yaa me nji bo bijô! Ayaa dé e kôlôʼô be ma! Ma nyô: ma zu kee wo aba mejô. Amu wo jô na: Me nji bo jôm.

³⁶ Eveves ja bo aya, ane wo tyendé bilat? VʼEjipte ja ye fe ve wo ôsone nyô anʼAsiri e nga bo.

³⁷ Wo ye fe so wé, mo me bete nlô, amu Nti a wua ba wo tabe be ndi fé, a wo ye bo te yene mvaé be be.