YEREMIA 19 - Bible en langue Bulu

Mbôlane vieʼékon a ntyamane Yérusalém

¹ Avale di nde Nti a nga kobô na: Kelek, kusuk nkaʼa ékon e be mmé meviek, nyoñe bemvendé yʼayoñ a bemvendé ya betuni.

² Kele mfaʼa ya mbiʼili Bén-Inom, ñwô ô nʼanyiine ya nda ba mé meviek; a valé nye wo ye yôtane mejô ma ye kate wo.

³ Wo ye jô na: Vôʼôlaʼan ajô Nti, a mia bejô bôte ya Yuda, nalé fe mia bôte be too Yérusalém! Avale di nde Nti ya minsamba mewosan, e Zambe Israél a jô na: ma nyô, ma zuu bidim e vôme nyô a kui na, melo ma ye nyamelan be môt ase a wôʼô be kobôʼô de.

⁴ Amu be liʼiya ma, be boya vôme nyô adimi; be diʼiya bezambe befe ôtu, bezambe, mbe bete toʼo bebien, toʼo bʼésaa, toʼo bejô bôte ya Yuda, be mbe te yem. A be jaléya metyi ya bôt be ne te bijô e vôme nyô;

⁵ be lôñeya Baal bito ya bikôndôʼô yôbe na be diʼi nye bone babe nduan, ane bityiʼa bia diʼibane ngumba, e jam me nji ke bendé be, e jam me nji ke kobô, e jam e nji tame zu mʼôsimesan.

⁶ Ajô te, tame yen, melu ma zu, nalé Nti a jô, éyoñe vôme nyô a ye bo te beta lobane na Tôfét a mbiʼili Bén-Inom. Ve na: Mbiʼili awu.

⁷ Ma ye bo émoʼo bebôndé mefeʼe ya Yuda a Yérusalém momo e vôme nyô; ma ye bo na be ku a nkpwaté mekôn ôsu ya besiñe bap; wo ya ba ba jeñ ényiñe jap wo ye bo jame te; ma ye ve mimbime miab ane bidi e be anone ya yôp a betite ya fé.

⁸ Ma ye bo tison éte jôme ya bi ébuʼanyu a mo, a jôm éwovioé; ba bese ba ye lôte je bebé, ba ye bo feʼe ne vema, a ba ye woé je, amu bibubua bié bise.

⁹ Ma ye bo na be di minsône mi bobefame bap, a minsône mi bobebinga bap; a ba ye di, môt ase, minsône mi môt a too nye bebé e joʼojoʼo été a ôlune été ya besiñe bap, mbe ba jeñ ényiñe jap.

¹⁰ Mvus éte, wo ye bôé nkaʼa ékon, mise me bôte mia be be mia ye ke me lôô, a wo ye jô be na:

¹¹ avale di nde Nti ya minsamba mewosan a jô na: Avale di nde ma ye bôé ayoñe bôte di a tisone nyô, avale ba bôé nkaʼa mmé meviek, ñwô ô se nguleya beta kômban, a ba ye jame mimbim e Tôfét, amu njemban afôla ya jame mimbim vôme mfe.

¹² Nalé ate ma ye bo vôme nyô, a bôte be too été, nalé Nti a jô, a ma ye bo tisone nyô ane Tôfét.

¹³ Menda ya Yérusalém a menda bejô bôte ya Yuda, ma ye bo mvin ane vôme ya Tôfét, avale te fe menda mese be mbe be dikiʼi ateté ese ya yôp ôtu a sôôé bezambe befe binyunyui e mendile mabe yôp ma ye bo mvin.

Ba futi Yérémi mimbôk

¹⁴ Ane Yérémi a nga so Tôfet, vôme Nti a nga lôme nye na a ke kulu mejô. Wôna a nga tebe nseñe ya Nda Nti a jô bôte bese na:

¹⁵ avale di nde Nti ya minsamba mewosan, e Zambe Israél a jô na: Mi lôô ma zuu bidim bise me nga jô bie e tisone nyô a e bitisone bise bi nʼéjôé jé si, amu be nga bo metyiñe mabe ñyemelane na be bo te wôʼô mejô mam.