YEREMIA 18 - Bible en langue Bulu

Vieʼe ékon a môt a bo wô

¹ Nti a nga kobô Yérémi na:

² kôlôʼô si, kele ndaa mmé meviek; e wé, ma ye bo na ô wôʼô mejô mam.

³ Ane me nga ke ndaa mmé meviek, me koone na a boʼo éveʼelaʼa vieʼe wua.

⁴ Vieʼe a mbe a boʼok ô nga ndaman, aval e wôʼô boʼo e kuik ékon e mo me mmé meviek. Ndʼ a nga beta bo ôfe, aval a nga yene mvaé ya bo wô.

⁵ Ane ajô Nti e nga zu be ma na:

⁶ ye me se nguleya bo mia ane mmé mvieʼe nyô a nda bôt Israél? Nalé Nti a jô. Tame yen: aval ékon é ne wo mmé meviek, nde mi né e wo wom a nda bôt Israél!

⁷ Anaʼana ma kobô ajô ayoñ ngʼéjôé na: be té, be baʼé a be wôé;

⁸ ve ngʼayoñe te, di me maneya kobô ajô dé, da bulane mvus mfaʼa yʼévô jé, ma jôban abé me nga kômesane na ma bo de.

⁹ Eyoñ éfe me ne kobô ajô ayoñ, ngʼéjôé na, be lôñ a bé;

¹⁰ ve ngʼayoñe te e boo jam e nʼabé e mise mam, teke wôʼô tyiñe jam, éyoñe te ma jôbane mvaé me nga bi ôsimesan ya bo de.

¹¹ Kobôʼô bôte ya Yuda, a bôte be too Yérusalém éyoñe ji a jô na: avale di nde Nti a jô na: mi lôô ma kômesane bidim asu denan, ma bindi ôvañ ya wosane mia. Bulaʼan môt ase mbia zene wé, kômane mezene menan a mimboone mienan!

¹² Ve ba jô na, ndi nlem éziñ é nji bo! Amu bia ye tôñ asimesane dangan, bia ye bo, môt ase, ane melo ya mbia nleme wé me né.

¹³ Ajô te Nti a jô na: silaʼan e meyoñ été! Zʼa tameya wôʼavale jame te? Endune ngon yʼIsraél é dañeya minné mi ne beangôndô.

¹⁴ Ye be wôʼô liʼi akôn e tem afup, e vôme metaʼa ya Libañ me né? Ye be wôʼô kandan évôvoé mendime ma lôt, me soʼo ôyap?

¹⁵ Ve da, bôte bam be vuaneya ma, ba ve bengunemelan ôtu; a nga litibane zene na a kolé ôbak e mezene mé été, e minjoñe mié ya melu kôa, asu ya tôñ asozen a mimfaka mi nji bo mfaʼan.

¹⁶ Be nga veñesane si jab jôme ya feʼe ne vema, jôm éwovioé nnôm éto; belôtane bese be nʼanyu ndiban a ba siʼisi minlô.

¹⁷ Ma ye tyamelane be ôsu besiñe bap anʼ evuñulu ya jôb da tôô; e môse ya bidime biap, ma ye lume be mvus sa kʼasu.

Emoʼo ya jeñe Yérémi abé

¹⁸ Be jôya na: zaʼan, mbôndaʼane feʼe ya wosane Yérémi! Amu metiñ ma ye bo te wu amu betuni momo, nge ékôane bebôndé mefek amu beyeme mam momo, nge nkulane mejô amu bekulu mejô momo. Zaʼan, mbibaʼane nye a ôyem, te bia vôʼôlô minkobô mié mise!

¹⁹ Vôʼôlôʼô ma, a Nti! Wôʼô tyiñe bôt be ne me ngame yat!

²⁰ Yʼabé da ye butane mvaé? Amu be faʼaya ébé na be wôé ma. Ô simesaʼane na me nga tebʼasu dôé na, me jeñe mvaé jap, a vôôn ayaa dôé e bo te nambe be.

²¹ Ajô te vaʼa bone bap e mo me mfumbale zaé, sôʼôlôʼô be e meyo me nkpwaté mekône si; e binga bap be boʼo tee fe bon , a be likiʼi minkus; a awu e bii beyôme bap, Nkpwaté mekôn ô wôék bendômane bap. éyoñe bita!

²² Be wôʼôk miñyôn mi soʼo menda map, éyoñe wo ye zuu beze mimfaka be wosane be atemetem! Amu be nga faʼa ébé na be bi ma, be nga solé mevote mebo mame si.

²³ A wo Nti, wo yeme mefeʼe mabe mese ba bôndé na me wu; te kañese étyiʼa asu njaman yʼékobe jap, te tyam abé dap ôsu viôé! Woñ ô bii be e vôm ô né! Eyoñe yʼayaa dôé, wosaʼane be.