YEREMIA 17 - Bible en langue Bulu

¹ Abé Yuda e ne ntilan a nkôs étyé, a nsoñe diamañ; e ne nkpwelan akoʼo ya minleme miap a e minlaʼa ya metaʼa metunaʼa menan.

² Eyoñe te bone bap ba ye simesane metaʼa metunaʼa map, a mekône bezambe bap bebé a nyumi bilé, a e bone minkôle be ne mbetane yôp.

³ E beta nkôle wome ya fé, akume dôé a mefoʼo môé, ma ve bie ane biôme ya nsa, nalé fe mevôme môé me ne mbetane yôp, amu abé dôé e minné miôé mise.

⁴ Womien wo ye jôʼé ngabe si me nga ve wo; ma ye bo wo ôlo ya nsiñe wôé, e si ô nji tame yem, amu mi boʼéya nduane ya ayaa dam, a ja ye yôñe nnôm éto.

⁵ Avale di Nti a jô na: biyoʼé a nyô a tabe ndi be môta binam, nyô a yeʼebe be minsôn, a vaa nleme wé be Nti!

⁶ A funane mon élé ya nkôte si, a a nji yen ane mvom ja zu; éto jé é ne mevôme ya nkôte si. me ne ndiʼan, sii nku, a teke bôt be too été.

⁷ Ebotan é boʼo be nyô a tabe ndi nleme be Nti, a nye Nti a ne étabe mebune jé!

⁸ A funan élé é ne mbéan mfôme mendim; nje ja mialane minkañe mié mfaʼa ôsôé wo lôt; ayôñe vian e nji jô je jôm, a mekaé mé me ne te viele; é ne te tyelé nleme yôp mbu mfum, é beʼe bibuma éyoñ ése.

⁹ Jôm éfe é nji bo meduʼan ane nleme môt, a be se nguleya bo wô mvoʼé , nge yeme jame wo kômbô.

¹⁰ Ma Nti, ma veʼele nlem , ma yemelan asimesan, asu ya yaʼane môt ase ane mezene mé me né, ane bibuma ya mimboone mié bi né

¹¹ aval ôkpwa wo bôʼôbô e metyi ô nji biaé yôp, avale te nyô a nyoñ akum ékotekote yôp a né; akume te da kôlô be nye éyoñ a ngenan a vee, a a yené vʼakut amané yʼényiñe jé.

¹² Eto njôane ya duma é ne aso atataʼa, vôme wongan a ne étyi le.

¹³ A Nti! Wo ô ne ndi nlem Israél. E ba bese ba liʼi wo ba ye wôʼôson. Ba ba kandane ma ba ye tilibane môé map e mbuluʼu été, amu ba liʼi Nti, anjeñe vevea mendim.

Meyeʼelan me Yérémi

¹⁴ Saé ma, a Nti, a ma ye bo mvoʼé; nyiʼi ma a ma ye nyiiban; amu wo ô ne duma dam!

¹⁵ Ô lôô ba jô me na: ajô Nti e ne vé? E tôébaʼan ñhe!

¹⁶ Ve mfaʼa wom me nji tindi wo na ô zuu minjuk, a Nti, me nji tame môse mintaé wu na ô kui, wo yeme nalé. E jam e nga so anyu dam e nʼôsu viôé.

¹⁷ Te bo na me fôʼôban amu wo, a wo ô nʼasoé dam e môse bidim!

¹⁸ Boʼo na bekpweʼele bam be bili ôson, ve ma, me bo te wôʼôson; boʼo na be fôʼôban, ve ma me bo te fôʼôban! Boʼo na, môse bidim ô kui be be. Bôme be a éndaman mebime mebaé.

Ntelane Sabat étyi

¹⁹ Avale di Nti a nga kobô me na: kelek a tebeʼe mbé bone be bôt e vôme bejô bôte ya Yuda ba nyiin a kui; tebeʼe fe mimbé mise ya Yérusalém.

²⁰ Wo ye jô be na: Vôʼôlaʼan ajô Nti, a mia njô bôte ya Yuda a Yuda ase, a mia bese mi too Yérusalém, mi nyiʼine mimbé mi!

²¹ Avale di, nde Nti a jô na: baʼalaʼane miabebien; te beʼane mbeʼe môse Sabat, a te lôtane wô e mimbé ya Yérusalém.

²² Te kuiane mbeʼe atane ya menda menan e môse Sabat, a te boon ésaé éziñ; ve telaʼane môse Sabat étyi avale me nga bendé de bʼésoo.

²³ Be nji vôʼôlô, be nji kee alo dap; be nga bo tyiñe jabe ñyemelan asu ya bo te vôʼôlô a bo te nyoñe nyeʼelan.

²⁴ Nge mia bo foʼo ma mewôk, nalé Nti a jô, nge mia bo te tulane mbeʼe e mimbé ya tisone nyô môse Sabat, nge mia telé môse Sabat étyi, a bo te bo ésaé éziñ môs ôte,

²⁵ éyoñe te bejô bôt, a bone bejô bôt be too éto njôane David ba ye nyiine mimbé ya tisone nyô, be bete bevagoñ a bikabela yôp, bebien a bone bap, bôte ya Yuda a ba be too Yérusalém, a tisone nyô ja ye bi bôt nnôm éto.

²⁶ Bôt ba ye so bitisone ya Yuda a mefôla ma bômane Yérusalém, e sii Bényamin a e Seféla, e beta nkô, a e Négéb, asu ya soo metunaʼa ba diʼi ngumba, bityiʼa , mimveane ya mefup a ôtu, asu ya soo bityiʼa ya mvean akéva e ndaa Nti.

²⁷ Ve nge mia bo te wôʼô ma, asu ya telé môse Sabat étyi, a mboone te beʼe mbeʼe éziñ, a mboone te nyiine mimbé ya Yérusalém, e môse Sabat, éyoñe te ma ye futi nduan e mimbé ya tison, ja ye diʼi biwôlô menda ya Yérusalém a ja ye bo te beta dim.