YEREMIA 15 - Bible en langue Bulu

Melep me ne te kʼavaa

¹ Nti a nga jô me na: toʼo Môze a Samuel ba tebʼasu dam, nleme wom wo ye bo te fulan a bôte ba. Titaʼane be, be ke ôyap asu dam, be kelek!

² Wôna nge ba jô wo na: bia ye ke vé? Wo ye yalane be na: Nti a jô avale di na: nyô a ne asu awu a woʼok! Nyô a ne asu nkpwaté mekôn, nkpwaté mekôn ô bii nye! Nyô a ne asu mfumbale zaé, zaé é kele nye! Nyô a ne asu minkôm, a kele minkôm!

³ Ma zu wosane be a bibubua binyin nalé Nti a jô: nkpwaté mekôn asu ya wôé, bemvu asu ya lalé bifus, anone ya yôp a betite ya si asu ya min a tyam.

⁴ Ma ye bo de jam éko woñ asu bijôé bise ya si, amu Manasé, mone Ezékias njô bôte ya Yuda, amu mam mese a nga bo Yérusalém.

⁵ E ne nalé na, zʼa ye nyii wo, a Yérusalém, za a ye yône wo? Za a ye kôñelan a sili na ye ô ne mvoʼé ?

⁶ Ô liʼiya ma, nalé Nti a jô, ô bulaneya mvus; ve ma same wo wome be wo, ma tyame wo. Me teʼeya a mejôbaʼan.

⁷ Ma seʼese be e mimbé ya si jenan, ma liʼi be teke bon , ma bo na bôte bam be wôéban, mbe be nji lume mezene mabe mvus.

⁸ Me boya, minkuse mi binga miab abui a dañe nseleʼe ya mañ; ma zuu mvamban e zañe môs e be nyia ésoé mone bezimbi, me boya na woñ a mfôʼôban bi ku nye yôp atemetem.

⁹ Nyô a nga biaé bobefame zamgbwa a teʼeya, a nga suu mvebe; jôbe dé da dim éyoñe môs ô ngenan; a ne njalan a ôson, a kate betʼasu amu nalé. Ma ye ve mebukaʼa mfaʼa nkpwaté mekôn ôsu ya besiñe bap, nalé Nti a jô.

Nkulu mejô a tat

¹⁰ Ngoʼo ma, a nyia wom, amu ô nga biaé ma môta bisô a mewôman, asu si jangan ése! Me nji ve ékôla nge kôlé jôm, ve da, bese ba yoʼé ma.

¹¹ Ane Nti a nga jô me na: ma bele na, jôm é liʼiya be wo é ne asu mvaé jôé; ma bele na ma ye bo na nsiñ a yi wo éyoñe bidim a éyoñ ôlun.

¹² Ye môt a ne buʼu étyé, étyé ja so akôé, nalé fe mvot?

¹³ Ma ve biôme biôé a akume dôé e nsa, maʼane ya bikobe biôé e si jôé ése

¹⁴ Ma futi wo éjôé besiñe bôé si, e si ô nji yem, amu nduane yʼayaa dam é kabeya, ja yôñe mia nyô.

¹⁵ A Nti, wo yeme mam mese, ô simesaʼane ma, kamaʼane ma, kune ma e be bôt ba kpweʼele ma! Te kañese na me tôbane njuk, amu njibane wôé mfaʼa besiñe bam. Yeme na ma jibi ôsame amu wo.

¹⁶ Mejô môé me yenéya ôsu viam, a me mineya me. Mejô môé me boya nkañesan a avaʼa ya nleme wom; amu jôé dôé da looban e nlô wome yôp, a Nti, Zambe ya minsamba mewosan!

¹⁷ Me nji tabe nsamba bôte ba wôé bevok, asu ya bo fianga e zañe jap; me nga tabʼétam e wo wôé ô ne ngule si, amu ô nga jalé ma a ayaa.

¹⁸ Amu jé mintaé miam mia ke ôsu? Amu jé fôle jam ja kate saéban, a é nji kômbô yet? Ye e ne foʼo na ô ne mfaʼa wom ane anjeñ ôsame, ane mendime môt a se nguleya tabe me ndi?

¹⁹ Amu ajô te Nti a jô na: nge wo bulane be ma, ma ye bo na ô bulan été jôé ôsu viam; nge wo kandé jôm é nʼédima baa ji é ne zezé, wo ye bo anʼanyu dam. Mbe ba yiane bulane be wo, ve sa wo wo yiane bulane be be.

²⁰ Ma ye bo wo mfine mvot ô ne nyemetan asu bôte ba; ba ye bo wo bita, ve ba ye bo te dañe wo; amu me ne be wo, mfaʼa ya nyii wo, a kôté wo, nalé Nti a jô.

²¹ Ma ye kôté wo e mo me mbia be bôt, ma ye vaa wo e mo betibili bôt.