YEREMIA 14 - Bible en langue Bulu

Ebubua mfum

¹ Ajô Nti, di e nga kui be Yérémi éyoñe mfum ô mbe:

² Yuda a ne e ñyôn été, bitisone bié bi teʼeya, dibi a nkuane si, a miñyône ya Yérusalém mia bet.

³ Bemasa ba lôme bebo bisaé be jeñe mendim, bebo bisaé ba ke menjeñ, ve teke koone mendim, ba bulane minkaʼa miabe bikôkoé; ôsone wob été a ôsame wob été, ba buti minlô.

⁴ Yaa, si é maneya salé, amu mveñ é nji fe beta noñ e si jenan, ajô te besenane si, ôsone viab été, ba buti minlô.

⁵ Toʼo na nkok, afan été, wo biaé a liʼi mon, amu biloʼo ya di momo.

⁶ Bijakase ya fé bia tebe mebôbône minkôle yôp, bi nyumuluʼu mfep ane bemvu ya fé; mise map ma tek amu biloʼo momo.

⁷ Nge bikobe biangan bia ve bia bijô, a Nti, boʼo jam éziñ, amu jôé dôé! Amu beyeñeyeñ bangan be nʼabui, bi boya wo abé .

⁸ Wo, ndi nlem Israél, e nyii wé, éyoñ yʼôlun, ô ne yené aya ane nneñ a lôt e si jangan? Ane ñwulu dulu a lame nda éndelé jé asu ya jôʼôbô meyôa?

⁹ O ne yené aya ane môt a ne ngule momo, ane mbene môt wo kate nyii? Ve e too ke na ô nʼézezañe jangan a Nti, a jôé dôé da loban e nyôle jangan: te liʼi bia!

Ntyiʼan ajô ô ne te kʼasôan

¹⁰ Avale di nde Nti a kobô ayoñe bôte di: Yaa, ba nyeʼe ba ndeñendeñ. Be ne teke tabe vôme wua. Nti a nji yene be mvaé. A simesane bikobe biap éyoñe ji a a yaa abé dap.

¹¹ A Nti a nga jô me na: te yeʼelan asu bôte ba, asu mvaé jap.

¹² Nge ba tyi bidi, ma ye bo te vôʼôlô miñyône mi ôlune miap; nge ba ve metunaʼa ba diʼi ngumba, a mimveane ya mefup, ma ye bo te kañese bie; amu ma ye mane be a nkpwaté mekôn, mfumbale zaé a bim.

¹³ Nde me nga yalane na: a Zambe nyô a ne Nti! Tame yen, bekulu mejô ba jô be na: mia ye bo te yene nkpwaté mekôn, mfumbale zaé a ye bo te kui be mia, ve ma ye ve mia e vôme nyô, jaʼane nya mvoʼé .

¹⁴ Ane Nti a nga jô me na: minsos mmie bekulu mejô ba kuli a jôé dam, me nji lôme be, me nji ve bʼabendé éziñ, me nji kobô be; miñyenane mite mi ne minsos, bemviʼi a nkañane bengunemelan, menduʼane ya minleme miap mmie ba kuli mia.

¹⁵ Amu ajô te Nti a kobô bekulu mejô ba kuli mejô a jôé dam me te lôme be a be jôʼô na: teke nkpwaté mekôn nge mfumbale zaé bia ye kui si nyô na: bekulu mejô bete ba ye wu a nkpwaté mekôn, a mfumbale zaé.

¹⁶ A ba ya bôt mbe ba kuli mejô, ba ye wuabane minjoñe ya Yérusalém, amu mfumbale zaé a nkpwaté mekôn. Te ke môt a ye ve be vôme ya jambe, toʼo bebien, toʼo binga bap, toʼo bobefame bap, toʼo bobebinga bap; ma ye bo na nkpwala wop ô ku be yôp.

¹⁷ Wo ye jô be ajô dina na: mise mam ma kui milik alu a amôs te kʼatebe; amu éndune ngon, e ngon ayoñe bôte dam, e bibaneya a beta éndaman, a ébubua ja dañe mintaé.

¹⁸ Nge ma ke afan, bôte nkpwaté mekôn wo te jii mbe ba; nge ma nyiin e tison été, ô lôô bôt ba kon amu zaé. Toʼo na nkulu mejô a ntuni fe, ba bômane si nyô, befe, fek é ne be njañan.

¹⁹ Ye ô suʼulaneya foʼo wua Yuda fé, ye nsisime wôé ô nga vini Siôn? Amu jé wo bibi bia, nsaéban ô too te fe nguleya yené be bia? Bi nga yange mvoʼé , ve teke jam é ne mvaé; bi nga yange ñyetan, ve tame yene nkul akoñ ñwô ô vianeya so!

²⁰ A Nti, bia yem évô jangan, évô bʼésaa bangan; amu bi boya wo abé .

²¹ Amu jôé dôé te bo abé nge biasé éto njôane ya duma dôé! Simesaʼan, te tyam élate jôé a bia!

²² E bemomo bengunemelane ya meyoñ , ye bevoʼo yʼété be ne bo na mveñ é noñ? Nge na ye yôp nde da ve mendim? Ye sa wo Nti, e Zambe wongan? Bi too wo ndi, amu wo wo bo mam mete mese.