YEREMIA 13 - Bible en langue Bulu

Asese ndombo, ndeme nkeane minkôm

¹ Nti a nga jô me na: Kelek, wo ye kus asese ndombo a wo ye tiñeti de angeteñe dôé; ve wo ye bo te dube de mendim.

² Ane me nga kus ases, aval ane nkobô Nti ô mbe, a me nga tiñeti de angeteñe dam.

³ Ajô Nti e nga zu be ma éyoñ baa na:

⁴ nyoñ ases ô nga kus, nde e tii wo angeteñ; kôlôʼô si, kelek mfaʼa yʼôsôé Efrat a, e wé, soléʼé asese te mbamele akoʼo été.

⁵ Nde me nga ke, a me nga solé de bebé ôsôé Efrat, avale Nti a nga bendé ma.

⁶ Ayab éyoñ é lôteya, Nti a nga jô me na: Kôlôʼô si, kele mfaʼa yʼEfrat a, e wé, nyoñ asese me nga bendé wo na ô ke solé.

⁷ Nde me nga ke mfaʼa yʼEfrat, me nga jeñ a beta nyoñ ases e vôme me nga solé de; ve me nga koone na ases e maneya ndaman. E mbe te fe nguleya volô jôm.

⁸ Ane ajô Nti e nga zu be ma na:

⁹ avale di Nti a jô na: aval ebiene ma ye tyame mebune me Yuda nde le, beta mebune me Yérusalém.

¹⁰ Ayoñe bôt e ne nkpwala di, nde da bene wôʼô mejô mam, nde da wulu avalʼane mbane melo ya nleme wob ô né, a da lat a bezambe befe na be kañe be a kute meboñe si ôsu viap. Ajô te be boʼok anʼasese di, nde e ntoo te fe nguleya beta volô jôm!

¹¹ Bebela na, avale ba tiñeti ases angeteñ môt, avale te me nga tiñeti nda bôt Israél ése, a nda bôte Yuda ése e be mamien, nalé Nti a jô. Nalé ate ma (menda me bôte mete mebaé) ye bo ayoñe bôte dam, e jôé dam, duma dam, nyanga jam. Ve be nji ke wôk.

¹² Wo ye jô be ajô di na: avale di Nti, e Zambe Israél a jô na: mendeʼe mese ma yiane jaléban a woon, a ba ye jô wo na: ngaa bia yeme na mendeʼe mese ma yiane jaléban a woon?

¹³ Eyoñe te ñhe wo ye jô be na: avale di Nti a kobô na: tame yen, ma ye jalé bôte bese be too si jenan mbilane bilam: bejô bôt be too éto njôane David, betuni, bekulu mejô a bôte bese be too Yérusalém.

¹⁴ Ma ye bo be bifus, bana be wosaʼane ba bevok, bʼésaa a bone nsamba wua, nalé Nti a jô; ma ye bo teke señele jam, éngôngole momo, mvañe momo, teke jôm ja ye kamane me na me mane jiane be.

Ayemé a ayok

¹⁵ Vôʼôlaʼan a keʼan alo! Jôkaʼane mbia anyu! Amu Nti a kobô.

¹⁶ Vaʼane Nti, e Zambe wônane duma, nté a ngenane te soo dibi, nté mebo menan me ngenane te kolé ôbak, e minkôle alu e maneya yandan. Mia yange éfufup, ve a ye viane veñesane je nsisiñ awu, a kôñelane je évindi nkut .

¹⁷ Nge mia bo te vôʼôlô jame di, ma ye yi asoé, amu mia dañe buni miabebien; ma ye sôôé milik, a mise mam ma ye kuli milik, amu mbame Nti wo ye keebane minkôm.

¹⁸ Jôʼô njô bôt a nyia wé na: tabaʼane tyia! Amu ékate duma jenan é kuya.

¹⁹ Bitisone ya Négéb bi fetebaneya, a teke môt a dii bie. Yuda ase a maneya ke minkôm, ase a maneya ke minkôm.

²⁰ Beteʼe mis a yene ba ba so akôé. mbame biyem be nga ve wo ô ne vé? E mone mbame biyem a mbe duma dôé?

²¹ Wo ye jô aya éyoñe ba ye tebe wo ngame yat? Womien ô nga yeʼele be na be belane wo ane bemasa bôé. Ye mintaé mia ye bo te bi wo ane mi minga a kôʼôlô mie?

²² Nge wo jô e nleme wôé été na: nalé a kui be ma amu jé? Amu jama bikobe wôé, ajô te nde be veseya wo éyé, a bitimekili biôé bi juʼuya a beduʼi.

²³ Ye môte yʼEtiôpi a ne tyendé ékôbe jé, a ye ze é ne tyendé metone mé? Avale te fe mia, ye mi ne nguleya bo mvaé, e mia mi maneya yéʼé mboon abé ?

²⁴ Ma ye tyamelane be ane ôsôé évuñulu ya nkôte si ja kee wô.

²⁵ Asuʼulane dôé nde le, ngap me veʼeya asu dôé: nalé Nti a jô, amu ô vuaneya ma, a futi ndi nleme jôé e minsos.

²⁶ Ma ye vese ézingi jôé e mvom asu jôé, nalé ba ye yene soé jôé.

²⁷ Me yeneya mejiane môé, a mintabe bisôʼô mienan, ébamba ôsame jôé, e beta minkôle yôp a mefan. Me yeneya beangôndô mimboone bôé, ngoʼo wo a Yérusalém, e wo ô nji kômbô tune womien! Wo ye beta yange a kui éyoñ évé?