YEREMIA 11 - Bible en langue Bulu

Ntyaman élat

¹ Nkobô Nti a nga kobô Yérémi:

² vôʼôlaʼane mejô yʼélate ji, a katane me bôte ya Yuda a ba be too Yérusalém!

³ Wo ye jô be na: avale di nde Nti, e Zambe Israél a jô na: biyoʼé a môt a bo te vôʼôlô mejô yʼélate ji,

⁴ nje me nga bo bʼésoo, môse me nga vaa be Ejipte mbeʼe nduan étyé me jôʼô na: vôʼôlaʼane tyiñe jam, a boʼone jam ese ma jô mia; éyoñe te mia ye bo bôte bam, a ma ye bo Zambe wônan.

⁵ Nalé ma ye tôé ngana me nga kane bʼésoo na ma ye ve be si menyañ a wôé bia len, avale mi lôô de môse wu. Nde me nga yalane na: E boʼo nalé a Nti!

⁶ Ane Nti a nga jô me na: yôtaʼane mejô mana mese e bitisone ya Yuda, a e minjoñe ya Yérusalém, jôʼô na: vôʼôlaʼane mejô yʼélate ji, a bo me!

⁷ Amu e ne bebela na, me nga too ngaa bʼésoo, ataté môse me nga kôlô bʼEjipte, a kui môse wu, nné ane tyé é nga lendé, me nga kate bôte na: vôʼôlaʼane tyiñe jam!

⁸ Ve be nga bote ke vôʼôlô, be nji kee alo, be nga tôñ, môt ase, ve ntibe ya mbia nleme wop; ajô te me nga tôé mejô mese yʼélate ji e nyôle jap, mme me nga bendé be na be bo, ve be nga bo te bo me.

⁹ Nde Nti a nga jô me na: njoñ ô ne zañe bôte ya Yuda, a ba be too Yérusalém.

¹⁰ Be bulaneya bo bikobe mintôle bʼésaa bap, mbe be nga bene vôʼôlô mejô mam, a ke lat a bezambe befe, asu ya kañe be: nda bôt Israél a nyô Yuda, be tyameya élate jam me nga bo a bʼésaa bap.

¹¹ Ajô te Nti a kobô avale di na: ô lôô! Ma zuu bidime be be. Be se nguleya fam. Ba ye yône be ma, ve ma ye bo te wôʼô be:

¹² bitisone ya Yuda, a bôte be too Yérusalém, ba ye ke loone bezambe ba diʼi ôtu, ve be too foʼo te ngule ya nyii be, éyoñe bidime biap bia kui be be.

¹³ Azezambe dôé e ntoo fe abui abim ane bitisone biôé a Yuda! O lôñeya metaʼa metunaʼa mʼôson abime fe ô bili minjoñ a Yérusalém, yaa metaʼa metunaʼa asu ya diʼi Baal ôtu;

¹⁴ ve wo (a nkulu mejô), te yeʼelan ajô bôte ba, te bete tyiñ , nge yeʼelan ajô dap, amu me nji wôʼô be éyoñ ba loone ma, amu bidime biap;

¹⁵ Jé nje nyô ma nyeʼe a beta bo e Nda jam? Ba bo asone mam tee alañé! Be tame vaa tite ba ve ngunemelane be wo, amu éyoñe wo bo mbia mboon, nje wo fôn!

¹⁶ Nyumi ôlivié, nyô miñyené, amu abeñe yʼébuma jé, e jôé Nti a nga yôlé wo nde le. Vʼézezañe ya beta éduñ, a boʼé nduan e mekaé mé, a mintyaé mié mi maneya tyiʼiban.

¹⁷ Nti ya minsamba mewosan a nga bé wo, a zuu bidime be wo, amu abé nda bôt Israél a nyô Yakob, be nga bo bebien, éyoñe be nga soñe ma me yaa a éyoñe be nga diʼi Baal ôtu.

Esoʼo ya bo Yérémi abé

¹⁸ Nti a nga kulane ma jame te, a me nga yeme de. O nga bo na me yene mimboone miap.

¹⁹ Me mbe ane mone ntômba a nji yeme jôm, a nye ba kee nye vôme ba tyiʼi betit. A me mbe te yem asimesane be mbe be bindiʼi. Mbakaʼan élé a bibuma bié! Zaʼane bi vaane je e sii bevevee, a bôt be bo te beta simesane jôé dé!

²⁰ Ve Nti ya minsamba mewosan a ne ntyiʼi mejô a ne zôsôô , nyô a yemelan asimesan a minlem. Ma ye yen akunaʼa wo ye bo be be, amu wo me keeya ajô dam.

²¹ Amu ajô te, Nti a kobô bôte yʼAnatot, mbe ba jeñ ényiñe jôé a jô na: te kulu mejô e jôé Nti, ô za wu e mo mangan.

²² O lôô! Me ne be ngame yat. Bisoé bi bôt bia ye wu a nkpwaté mekôn, bobefame bap a bobebinga bap ba ye wu mfumbale zaé.

²³ Teke môte ya be be a ye liʼi; amu ma ye zuu bidim e be bôte yʼAnatot, e môse ma ye wosane be.