YEREMIA 10 - Bible en langue Bulu

Bengunemelan a Nti

¹ Vôʼôlaʼane nkobô ya ngame yate Nti a kobô mia a nda bôt Israél!

² Nti a kobô na: te vuane dulu meyoñ me ne te yeme Zambe ma wulu, a te koone mendeme ya yôbe woñ, amu meyoñ me ne te yeme Zambe ma ko me woñ.

³ Amu mefulu me bôt me ne momo jôm. Môt a baʼé élé afan été; wo mbo ésaé wo baʼé je a ôvôn;

⁴ ba kôme je abeñ a argent a or, ba yemete je mesen a vamaʼa na, é bo te beta fôʼôsan.

⁵ Bezambe bete ba funane betetele mekôn be ne nkpwelan, be ne teke kobô; ba beʼe be, yaa ba beʼe be, amu be se nguleya daa vʼabo da: te koone be woñ, amu be se nguleya bo môt mbia jam éziñ. Avale fe be se nguleya bo mvaé éziñ.

⁶ Teke mfe a funane wo a Nti! Ô nʼanen, jôé dôé e ne ngu é too fe anen.

⁷ Zʼa ne bo te ko wo woñ, a njô bôte meyoñ ? Ba yiane ko wo woñ, amu e mimfefeʼe ya meyoñ été a e bijôé bise été, teke mfe a funane wo.

⁸ Bese, mfulaʼan, be nʼasuk a mekut; ndeme ya momo wop é ne élé!

⁹ Ba soo bibab bi argent Tarsis, a bi bi or Ufaz, ésaé mboo biôm, nsoon e mo me nlui or; ba jalé azezambe mengômesan me veleves a too évindi a évele, ése é ne ésaé mboo biôm.

¹⁰ Ve Nti a ne Zambe e bebela été, nye, e Zambe a vee a njôô ya nnôm éto. Si ja fôʼôsan ôsu yʼayaa dé, a meyoñ me bôt me nji zômbô ayaa dé:

¹¹ mia ye kobô be na: Bezambe be nji té yôb a si, ba ye jañe si nyô, a e yôbe si.

¹² A nga bo si a ngule jé, a nga té émo a feʼe jé, a nga same yôp a atyeñe dé.

¹³ Eyoñ a ve tyiñ , mendim ma kôane yôp. A bo na minkut mi bet, mi kôlôʼô akuʼu ya si; a bo feleves asu mveñ, a soo évuñulu e vôm a naane je.

¹⁴ Môt ase a ntoo nsusuk e ñyemane wé été; nlui or ase, a wôʼô éveʼela jé é ne nkpwelan ôson; amu bengunemelane bete be ne ve meduʼan, mvebe ô nji bo be be.

¹⁵ Be ne ve be momo be biôm, ésaé minsos, ba ye jañ, éyoñe melep ma ye so.

¹⁶ Nyô a ne ngabe Yakob, a nji funane be; amu nye a bo biôm bise, a Israél a nʼayoñe ya ngabe jé, jôé dé e ne na: Nti ya minsamba mewosan.

Befôʼôfôʼô e Yérusalém

¹⁷ Tokéʼé mvaé jôé é bôô si a wo besiñ be bômaneya nye!

¹⁸ Amu Nti a jô avale di na: ô lôô éyoñe ji ma zu wua bôte be too si nyô ane ba wua toloo; ma zu bametane be bebé, nalé ba ye nnambe be.

¹⁹ Ngoʼo ma! Me buʼuya! Fôle jam é ne mintaé! Ngoʼo ma me mbe me jôʼô na: mintaé miame le, ma ye jibi mie.

²⁰ Nda éndelé jam é maneya tyamban, minkole miam mi maneya téé, bone bam be kôlôya be ma; be nji beta bo; me nji bi môt a ne beta limi nda éndelé jam, nyô a ne beta bete menda bindelé mam;

²¹ Amu bebaʼale mintômba be nga yené minsusuk, be nji ke jeñe Nti. Ajô te mfasan ô ne momo e be be, a mimbame biyeme miab mise mi maneya wu.

²² O lôô éduñ ja zu, beta éngôngôm a soʼo mfaʼa si yʼakôé, asu ya bo bitisone ya Yuda melunga, a éjôʼôbaʼa bemvu ya fé.

²³ A Nti, ma yeme na zene môta binam é nji bo jôme jé émien; saake môt e nye a liti medaa mebo mé zen éyoñ a wulu.

²⁴ A Nti, lebe ma, e zôsôô été, ve saa ayaa dôé été, ô za veñesane ma momo jôm.

²⁵ Sôʼé ayaa dôé e be meyoñe bikuu me ne te yeme wo, a e be bôt be ne te loone jôé dôé! Amu ba di Yakob. Ba di nye, ba jiane nye, a bo vôme wé jôme melunga.