Yb 9 - Bible en langue Bulu

Yob a yalane Bildad

¹ Nde Yob a nga yalane na:

² Ma yene bebela na e ne nalé; nalé a ne nguleya bo zôsôô aya asu Zambe?

³ Nge a too ye kômbô doon a nye, e biyalane toyini, a nji ye bo nguleya ve nye jia.

⁴ Fek a Ngulʼése bi nʼémbié; za a tameya liti ngul asu dé a too te nyoñe melep ?

⁵ A vaa minkô e vôm mi né mibien teke yem. A bulekane mie ayaa dé été;

⁶ a bo na si é fôʼôsan e mbôkaʼa wé yôp, a beta mekône bé ba mane téé si.

⁷ A kobô jôp, de ve jañ te fe yené. A futi sitam ateté.

⁸ A ndamé yôp vʼétam, a wulu e mevôme ya mañ me nʼôyabe yôp.

⁹ A nga té Tôla Zok a Nkel Ôvôn, Ekoé bengon a bitune menda ya nké,

¹⁰ a bo beta be mam me too ayaé ya yemelan, mam ya semé tekʼalañé.

¹¹ O lôô a lôte fefele jam me teke yene nye, toʼo na a jañe me mis, me teke yemelane nye.

¹² Nge a bi jôm, za a ye kame nye, a za a ye jô nye na: Wo bo jé?

¹³ Zambe a ne teke vaa ayaa dé; bevolô be Rahab ba kumbu vôm a too.

¹⁴ A ma me ne yalane nye aya? Za mejôô me ne tot asu dé?

¹⁵ Toʼo me nga ye bo zôsôô , me nji ye yalan; me nga ye sili mvame ntyiʼi mejô wom.

¹⁶ Nge me nga ye loon a nye ki a yalane ma, me nji ye buni na a nga ye kee alo dé e tyiñe jam.

¹⁷ Nyô a jimbi ma ane ôkôs, nyô a bo meveñe mam abui abui tekʼétom,

¹⁸ teke me jôʼé na me beta vebe. Amu a boya me na me jaé a ôlun.

¹⁹ Nge ma jeñe mvolan a ngule minsôn, nye ñhe a nʼéwôlô. Nge ma jeñe wu ya ntyiʼane mejô, za a ye telé ma aba mejô?

²⁰ Nge me nga ye bo zôsôô , anyu dam ebien e nga ye ve ma mekua; a nge me too ye bo te jame ya vebane mekua, anyu dame mamien e nga ye ve ma mekua.

²¹ Ye me ne te jame ya vebane mekua? Ye mamien me nji yeme de? Ma biasé ényiñe jam.

²² Jé ébien é nʼété? Ajô te ma jô na: Nti a jiane môt a ne zôsôô avale fe ane nyô a ne abé .

²³ Eyoñ ébubua éziñ ja wôé môt atemetem! A woé meveʼele ya bôt be ne te bijô.

²⁴ Si é ntoo e mo bebo abé; a solé asu betyiʼi mejô. Nge sake nye a bo jame te, za mfe ñhe?

Zambe a nji bo môt

²⁵ Melu mam ma mate avô, a dañe mmate mbi; ma tup te na me yene mvom;

²⁶ ma lôt ane besitima ba wulu avô, avalʼane ndôé ja ku jôm a bi yôp.

²⁷ Nge ma jô na: Ma zu vuane ntate wom, ma zu jôʼé ôlune viam, a beta nyoñe nguleya nleme wom.

²⁸ Ma ko minjuʼu miam mise woñ. Ma yeme na wo ye bo te nyoñe ma ane nyô a ne te bijô.

²⁹ Ma me nga ye bo mekua! Amu jé ma yiane wu njuʼu zezé?

³⁰ Toʼo me nga ye woban e mendim me ne éfumulu été, toʼo me nga ye sôbe mo a sobô,

³¹ ô nga ye fe note ma ébé été, a mengômesane mam me nga ye vini ma.

³² A nji bo môt ane ma, ane me ne yalane nye, ane bi ne ke vôm ba tyiʼi mejô bebaane nsamba wua.

³³ Ntyiʼi mejô a nji bo zañe jangan, nyô a beté wo e be bia bebaé.

³⁴ A tame vaa nkasa wé be ma; angôndô wé a boʼo te ndeñele ma nsisim :

³⁵ éyoñe te ma ye kobô, a ma ye bo te ko nye woñ. Nalé momo wôna me nji bo mamien.