Yb 7 - Bible en langue Bulu

Biyoñ ya njuk

¹ Ye asuʼulane môt e si nyô e nji bo di mon bezimbi, a melu mé ki avalʼane melu me nyô a saé amu tañ?

² Avalʼanʼôlo wo vebe éyoñ ô wuya, avale fe ane mbo ésaé a yange maʼane mé,

³ avale te nde ngabe jam é ne mintaé ya bengon bengon. Ngab é nʼénjam é ne minjuk melu melu.

⁴ Eyoñ ma bômbô si ma jô na: Ma ye kôlô si éyoñ évé? A éyoñe ma kôlô si ma simesane na: Ngôʼé ja yange jé na é bo? Asimesane mevale mete da ndeñele ma nsisim akekui mamengôʼé.

⁵ Nyôle jam ja jaé bitum a tyia ane ngômesan, ékôbe jam ja tui mefô a boé.

⁶ Melu mam ma lôt avôl a dañe mvé ntiñe biyé. Ma jañ, ndi ése ve man.

⁷ Simesaʼane na ényiñe jam é ne mvebe! Mise mam ma ye bo te yene mvaé.

⁸ Dis da fombô ma da ye bo te fe yene ma; mise môé ma ye jeñe ma a kooé na me ntoo momo.

⁹ Minkut mia jañ a ke, avale te nyô a ke vôme ya miñwuan a ye bo te beta so;

¹⁰ a ye bo te beta zu e nda jé a nda jé ja ye dimi nye.

¹¹ Ajô te ma ye bo te fe tabʼévô, ôlun été ma ye kobô ajô nsisime wom, éyôé été ma ye tat ajô ya nyôle jam

¹² ye me ne mañ nge beta tit éziñe ya mañ, ane wo telé bemombô be bômane ma?

¹³ Eyoñ ma jô na: Enoñe jam ja ye volô me nlem , vôm ma bômbô a jeʼé ñyône wom,

¹⁴ éyoñe te wo sisi ma a biyeyem, wo bo na me ko woñ a mam ma yen.

¹⁵ Me ne yene mvaé na me wu abuk, ya, awu e ne me mvaé a dañe bivese bi!

¹⁶ Me nji bisi! Ma ye bo te nyiñe nnôm éto. Jôkéʼé ma, amu melu mam me ne foʼo ve momo.

¹⁷ Môt a ne jé ane wo yene nye anen, ane wo nyoñe njuk ajô dé,

¹⁸ ane wo jome nye metyé mese ane wo veʼele nye biyoñ bise?

¹⁹ Wo ye jôʼé fombô ma éyoñ évé? Wo ye ve ma éyoñ ya mine mendene mam éyoñ évé?

²⁰ Nge me boya abé , jé me mbe nguleya bo wo, a mbaʼale bôt? Amu jé ô nyoñeya ma ane jôme wo sôñ? Amu jé me beʼe mbeʼe wome mamien?

²¹ Amu jé ô nji vaa mbia mboone wom, a amu jé ô nji jamé ékobe jam? Amu na éyoñe ji ma zu bômbô mbuluʼu été; Wo ye jeñe ma a kooé na me ntoo momo.