Yb 6 - Bible en langue Bulu

Yob a yalan Elifaz

¹ Ane Yob a nga yalane na:

² Ngoʼé nge ba tame ke veʼe adite ya ôlune viam a ngoʼé nge ba tame ke beté minjuʼu miam mise kop,

³ ba ye yene mi too adit éyoñe ji a dañe nseleʼe ya mañ: jame te nde bôt ba biasé nkobô wom.

⁴ Amu mekoñ mʼélaé ya Nyô a ne Ngul ése me tulaneya me nyô, a nsisime wom ô nga nyu nsule yʼété. Beangôndô be mame Zambe be ne me ngame yat.

⁵ Ye éjakase ya fé ja ye tat e fefele élok é ne nteʼan? Ye nnôme nyak a tat e fefele bidi bié?

⁶ Ye be ne di jôm é nʼéyôs teke nku? Ye jôb atyi kup da wôʼé anyu?

⁷ Jôm me mbe me bene nnambe, é ntoo bidi biam, toʼo na é nʼabé!

⁸ Ngoʼé nge jam ma sili e ne boban, a nge Zambe a ne tôé ndi ya nleme wom!

⁹ Zambe a tame ke yene mvaé ya fite ma, a tame njaʼa ke same wo wé, a man ényiñe jam!

¹⁰ Nalé a ye volô ma nlem , ma ye fôn a mevak, akôsa bo mintaé miam mi ne te akobô, nalé a ne na me nji ke sôane mejô me Nyô a nʼétyi.

¹¹ Ngule jam é ne jé na me yange? A asuʼulane dam da ye bo aya ane ma yiane wôñôlô ényiñe jam?

¹² Ye ngule jam é ne ngul akok? Ye minsône miam mi ne mi mi mvot?

¹³ Ye me nji bo nyô a nji bi mvolan, nga ñyeman ôse ô maneya ke mʼôyap? Yb 16:1-5,20; 19:1-6,19-22; Mink 17:17

Amvôé e ne momo jôm

¹⁴ Môt a bili njuk, môt mbok a yiane volô nye, nalé momo wôna a ye liʼi woñe ya Nyô a ne ngul ése.

¹⁵ Bobejañ be maneya joñôlô ma ane ôtôñ mendim, ane mvelane yʼatôñe mendim da mane kôt.

¹⁶ Mendim map me ne njuʼulan amu Glas, Glas a solô été;

¹⁷ Eyoñ ayôñ e né atôñe te da mane vele, da mane kôt a vian.

¹⁸ Minsamba bebeʼe mimbeʼe mia fuʼu fé, mia nyiin afan été a jañ.

¹⁹ Minsamba ya Téman mia ke jeñe be mi ya Saba ki mia yange be zesé.

²⁰ Ngoʼo ôson éyoñ ô maneya ve ndi nleme jôé e be minsamba mite! Jaʼana ô yeneya vôm be né, vʼôson wo liʼi wo nyô éyoñ be soya

²¹ jôm mi né éyoñe ji nje le; mi lôô njuʼu wom, a mia ko woñ!

²² Ye ma te jô mia na; vaʼane ma jôm éziñ, nge na vaʼane ma bifaʼé yʼakume denan,

²³ nge na nyiʼane ma e mo me nsiñe wom, nge na kôtaʼane ma e mo bewôé bôt?

²⁴ Yeʼelaʼane ma na me tabe évô; litaʼane ma me yem e vôme me jañeya fé.

²⁵ Miabebien mia yem ane minkobô mi ne zôsôô mia tooé môt évô! Ve bijô mia ve ma bia liti jé?

²⁶ Ye mia kômbô ve nkobô wom bijô a wua minkobô ya môt a ne nteʼan e ñyem?

²⁷ Ke me lôô mia ye do monenyui abia, a kuane mvôé jenan émvos!

²⁸ Eyoñe ji tama fombane ma ye ma ye laane mia minsos bi lôane mesu?

²⁹ Tama bulane mvus, ma yeʼelane mia, te boon ékotekot; bulaʼane mvus, amu zôsôô wom a ngenan!

³⁰ Yʼékotekot é ne mʼôyem, a ye anyu dam é nji yemelane minjuk?