Biblia Todo Logo
Bìoball air-loidhne

- Sanasan -

Yb 5 - Bible en langue Bulu


Vôm abé da téé
( Mink 3:33 ; Yb 4:7 ; 14:1-4 )

1 Loʼone ñhe éyoñe ji! Ye môt éziñ a ye yalane wo? Wo ye kobô ôvé ya mimfufup?

2 Amu ñwôʼan ôlun wo wôé môt a ne akut, a aban da wôé nsusuk.

3 Me nga yen akute môt e biaé minkañ, vʼatemeteme na me nga yoʼé étabaʼa jé.

4 Bone bé ba ke zene ya nyian ôyap; ba nyoñe mekua aba mejô teke môt a kôté be.

5 Bewôʼô zaé ba ye mine bidi bié a ba ye zu vaa nye a kui vôm biyo bi né. Bôt ba wôʼô évé ba ye min akume dé,

6 bidim bi nji ke so mbuluʼu été, a njuk ô nji ke faa aso ya si.

7 Môt a nga bialé asu minjuk avale fe ane bityakaʼa bia yele yôp.


E ne mvaé ya loone Zambe
( Yb 8:5-7 ; Sam 107:40-43 ; Lk 1:51-53 )

8 Mfaʼa wom, ma ye jeñe Zambe Zambe nye ma ye liti ajô dam,

9 a bo beta be mam me ne tekʼayemelan, bitua bi mam tekʼalañé

10 a noo mveñ e si, a lôme mendim e mefup,

11 ba be ne nsilane si a bete be yôp, ba be nʼôlun été, a kuli be e nyian.

12 Mam mimvômvôle mi bôt mia bôndé, a bo me momo, nalé fe na mo map me se nguleya bo na, e mame map me ke ôsu.

13 A bi mimfefek, e mvôle jab ébien été, a feʼe bôt be ne mvô teke tabe,

14 mbe ba tôbane dibi e bizôña môs ba ke ba bôp e zañe môs ane a alu.

15 Ve Nye a nyii éngôngole môt; nkpwaté mekôn wo so anyu dap a e wo ngungu;

16 Ajô te ndi é ne mfaʼa ntetek, vʼékotekot môt ja dib anyu.


Ngakaʼa mimfefeʼe mi bôt
( Sam 94:12-13 ; 34:7-23 ; Oz 6:1 )

17 Ajô te môte Zambe a yaa nye a yiane vak! Te bene melebe me Nyô a ne ngul ése

18 amu nye a balé aveñ a saé fe de; a tibi, a mo mé ma yete

19 a ye kôté wo ôlun biyoñ bisaman a abé da ye bo te kui be wo biyoñe zamgbwa.

20 Melu me mfumbale zaé, a ye kôté wo awu; melu bita, a ye kôté wo mfaʼa meveñ me nkpwaté mekôn.

21 Oyem wo té ntañete wo ye bo te nnambe wo, éyoñe jam da jiane bôt da ye so wo ye bo teke ko woñ.

22 Wo ye woé jam da jiane bôt avale fʼane zaé; te ko betite ya si woñ,

23 amu mia be mekoʼo ya mefup mia ye bo élat, a mia be betite ya fé mia ye tabe mvoʼé .

24 Wo ye yeme na mvoʼé ja ye bo e nda éndelé jôé; wo ye ke wo jom e mevôme mimbame miôé mia di, a jôm ja ye bo te jembane wo;

25 wo ye yeme na mvoñe bôte jôé ja ye bo abui, a na bifaʼalé biôé bia ye bo ane biloʼo ya si.

26 Wo ye nyiine soñ, valé ô ntoo nnôm abui, avale ba bo avis mimbom mi nlisi éyoñ ja yian.

27 Jam bia te yen nde le; nne é ne nalé! Wo yiane wôʼô de a yeme de.

© LʼAlliance Biblique du Cameroun, 2009

Bible Society of Cameroon
Lean sinn:



Sanasan