Yb 41 - Bible en langue Bulu

¹ Tame yen, éyoñ ba yange nye, ateʼe da viane bo wo nyô; Amu ve ñyenane wo yene nye, ngʼateʼe da bi wo nyô?

² Teke môt a ye bo ayoʼo ya soñe nye; za a ne ngule ya zômbô asu dam?

³ Za a nga ve ma bikôla, ane ma ye bulane nye bie? E jôbe si, biôm bise bi nʼémbiam.

⁴ Ma ye bo te tabʼévô amu ajô ya bibuʼa bié, ngule jé, abeñe dé a ntaʼane nyôle wé.

⁵ Za a nga vaa nye ngômesane jé? Za a ye nyiin e zañe mintyetyeʼe mié été?

⁶ Za a nga dii mimbé yʼanyu dé? Eko woñ é ne nye mbômaʼane mesôñ.

⁷ Mebun a ngule bibene bié bi ne nlatan ne ta ane nge sitam nye a late bie;

⁸ ba latan jia a ji évok, a évuñulu é se nguleya lôt e zañe jap.

⁹ Be ne nlatan jia a ji évok, be tele a be se nguleya kandan.

¹⁰ Bezeseme bé ba bo éfufube na é faé; mise mé me ne avalʼane biyakolô ya melendé me tyé.

¹¹ Mengôé ma vame nyʼanyu, a bengeké be nduane fe ba vam été.

¹² Otita wo so nye mimbile mi jôé, avalʼane minkeñe a kundi, a ane mbômeyô a nʼayôñ.

¹³ Mvebe wé wo boʼé nduan e daʼa, nkabaʼa nduan wo vame nyʼanyu.

¹⁴ Ngul é ne nye tyiñ , a woñ wo yôô nyʼôsu.

¹⁵ Biôme ya nyôle jé bi ne nlatane bise, bi ntoo nyʼayete nyô, te kʼakôlô.

¹⁶ Nleme wé ô nʼayet anʼakok, ayet anʼakoʼo ya si ba koʼo de bidi.

¹⁷ Eyoñ a tebe tetele, ba ba dañe biwôlô ba ko woñ, ba saʼale ntyaʼan a woñ

¹⁸ asu nyô a subu nye bebé. Nkpwaté mekôn ô nji volô jôm, toʼo nya akoñe, nge ngamba akoñ, nge ében.

¹⁹ A yen étyé ane minkôte bilok, mvot anʼélé é maneya boé.

²⁰ Akoñ élaé é nji bo nye na a tup, bone mekoʼo ba futi toloo, bene asu dé ve minkôte bilok.

²¹ A yene mbeñ ane nkôt élok, a woé éyoñe ngamba akoñ ja nyé.

²² Minsoñetane mesen mi ne nye si, ô yeʼe jô na étyé ba faʼa si, nje a ke a dutu mbotoʼété.

²³ A bo na bidoʼo ya si bi kundi ane viek. A veñesane mañ me bo vʼôyôm ésua ba diʼi ôlobinda.

²⁴ A liʼi zene ja faé e mvuse jé. Edoʼo yee é ntoo ane ésile nnôme môt.

²⁵ Jôm éziñ é nji bo ma wé e si nyô; a nga kômbane na a bo te ko woñ.

²⁶ A fombô e jôm ése é ne mbetane yôp. A ne njôô ya betite bese ba dañe mebun.