Yb 40 - Bible en langue Bulu

Nkobô Yob a éyalane baa Zambe

¹ Nti a nga beta jô Yob na:

² Ye nyô a nyeʼe bisô e zezé a ye bo Nyô A ne Ngul Ese mejô? Ye nyô ba Zambe ba sôane bisô a bili éyalan éziñ été?

³ Nde Yob a nga yalane Nti na:

⁴ Ô lôô me ne ôyôme jôm, jé ma ye yalane wo? Ma buti wo anyu dam.

⁵ Ma te kobô éyoñe jia, ma ye bo te beta yalan; ma te kobô jaʼane biyoñe bibaé, ma ye bo te beta beté jôm éfe.

Ye Yob a ye nyoñ émien ane Zambe

⁶ Ane Nti a nga yalane Yob a too ôkôs été a jô na:

⁷ Tiñetiʼi ases angeteñe dôé aval anʼéwôlô môt; ma ye sili wo minsili, a wo ye yeʼele ma.

⁸ Ye nkômbane wôé ô ne foʼo na ô tyame ntyiʼan ajô wom? Ye wo ye ve ma mekua asu ya kale womien?

⁹ Ye ô bili wo ô funaʼane wu Zambe, e tyiñ ja bam anʼénjé?

¹⁰ Jaléʼé womiene mebun a duma ane ngômesan, a jalé fe womien mfaéan a étôtok!

¹¹ Boʼok ayaa dôé na e lôt ane mendim, fombôʼô ba bese be ne mebun a sili be si!

¹² Fombôʼô ba bese be ne mebun, a viti be si! Tame koʼo bebo abé vôm be tele,

¹³ soléʼé be bese nsamba e mbuluʼu été, futiʼi be, môt ase, e mbôʼawu!

¹⁴ Eyoñe te ñhe mamien ma ye kañe wo. Amu mbo nnôme wôé ñwô wo ye bo nyiane wôé.

Ngup

¹⁵ Tame yene ngup me nga bo fe ane wo! Ja di bilok ane nyak.

¹⁶ Tame yen! Ngule jé é ne angeteñe dé, a éwôlô jé é ne minsône yʼabume dé;

¹⁷ ja telé njeme jé ane élé Sédre, minsise ya mebé mé mi ne ndiñetan;

¹⁸ bivese bié bi ne minkoñ mi mvot, nkpwangbwa bivese wé ô ne ane minkoñ bityé.

¹⁹ A ne ésaé ôsu ya bisaé bi Zambe; nyô a nga bo nye a nga jalé nye nkpwaté mekôn.

²⁰ Minkô mia ve nye bidi bié, e vôme betite bese ya fé ba bo bivôé.

²¹ A bômbô e mingum bilé si, asoé dé e ne ndene si, a e bilobé;

²² bilé bite bia buti nye éjijine jap, bone bilé yʼôtôñ ba bômane nye.

²³ Nge beta ôsôé a nto nden abui, a ye bo te tyelé nleme yôp; nge Yordan a nyine nyʼanyu été; a ye tabe teke ko jôme woñ.

²⁴ Ye ba ye bi nye éyoñ a bili mis me yoo? Ye ba ye bi nye a ôlam, asu ya tub anyu dé?

Nkômengan nge na beta dragoñ

²⁵ Ye wo ye bi nkômengan a nnop? Ye wo ye kaʼa ôyeme vié a nkol?

²⁶ Ye wo ye som ôlé anyu dé? Ye wo ye tube nye nkek a ôkop?

²⁷ Ye a ye bo wo ayabe meyeʼelan? Ye a ye kobô wo bivôvoé bifia?

²⁸ Ye a ye bo élat a wo? Ye wo ye nyoñe nye ane ôlo melu mese?

²⁹ Ye wo ye bo nye bivôé ane nyô a vôé ônon? Ye wo tiñeti nye asu ya ve bobebinga bôé jôme ya bo je fianga?

³⁰ Ye bôte ba kui tyiñe mame ya minkuan ba ye kuane nye? Ye ba ye kabane nye zañe bekuan abom?

³¹ Ye wo ye jalé nyôle jé a biyo, a jalé fe nlô wé a mekoñ ba wôé me kos?

³² Betéʼé wo wôé be nye. Eyoñ wo simesane mewosan, wo ye bo te beta bo nalé.