Yb 4 - Bible en langue Bulu

Nkobô Elifaz

¹ Eyoñe te Elifaz, Môte ya Téman a nga nyoñe nkobô a jô na:

² Nge môt a veʼele tot éfia, ye jame te da ye ndeñele wo? Ve za ki a ne nguleya tabe évô?

³ Tame yen ô maneya ve abui bôt miñyeʼelan, ô maneya ve mo me ne nteʼane ngu.

⁴ Nkobô wôé ô maneya bete nyô a nga ye ku si. O yemeteya meboñ me nʼatek,

⁵ vʼéyoñ éyoñ jôé é kuiya, ô nga bili atek! Amu jame te da nnambe wo éyoñe ji, fek é jañeya wo.

⁶ Ye nkoone woñe ya Zambe wôé ô nji fe bo ésukaʼa jôé? Ye ndi nleme jôé, é nji fe bo zôsôô ya mezene môé?

⁷ Womiene tame fas, zôsôa môte mbé a nga tôbane njuk? A vôme mbé nye bezôsôô be bôt be nga jañ?

⁸ Avale me yeneya e ne na: Ba ba senan ékotekot a bé njuk, bebien ba kôane minjuʼu yʼété.

⁹ Evuñulu Zambe ja wôé be, a évuñulu yʼayaa dé ja diʼi be.

¹⁰ Mvam ngbwengbwem, ñyôn étoñe ñyôyoʼo tite ya fé a mesôñe bitoñ bi ngbwengbwem bia buʼi;

¹¹ ngbwengbwem ja wu amu teke jôme ya bi a bone be ngale ngbwengbwem ba mane tyamelan.

Ñyenan yʼalu

¹² Efia éziñ ja te sendé a kui be ma a alo dam da te wôʼô bone biduñ yʼété.

¹³ Eyoñ asimesan da tyelé bôte minleme yôp e soʼo miñyenan yʼalu, éyoñ ôyo melom wo bi bôt,

¹⁴ woñ a benyeñenyeñ ba te bi ma, a bivese biam bise bia te fôʼôban,

¹⁵ évuñulu é nga lôte ma asu, a mimvote ya nyôle jam mi nga tebe.

¹⁶ Môt éziñ a nga tele valé, ve me nji bo nguleya yeme nye; nsisiñ ô mbe ma ôsu a me nga wôʼô tyiñ é kobôʼô ôfôfoé;

¹⁷ ye nyô a ne mbialane na a yiane wu a ne bo zôsôô e mise me Zambe? Ye môt a ne bo mfuban e mise me nyô a nga kôme nye?

¹⁸ Nge Zambe a nji tabe bebo bisaé bé ndi nlem , nge a yene minkoban e be beéngele bé,

¹⁹ kô fé a ye dañe yene mie e be ba be too menda me tyia, mbe mimbôkaʼa miap mi ne mbuluʼu été, a ba fite be ane évulebebas.

²⁰ Ba jiane be mametyé a mamengôʼé, ba jañe nnôm éto, te môt a fombô be;

²¹ Nkol yʼényiñe jap ô ntoo ntyiʼan, ba wu, ve sa ñhe a fek.