Yb 39 - Bible en langue Bulu

¹ Ye wo yem éyoñe bikela mefan bia biaé bon ? Ye ô ne yemelan éyoñe minkoʼo mia biaé bon ?

² Ye ô ne lañe tañe bengone ya mia beʼe mebum, nge yem éyoñ mia biaé bone bap?

³ Mia nut a biaé mvoñe jap, a kôtéban mfaʼa mintaé miap.

⁴ Bone bap ba nyoñe ngu a yaé atan atan, ba ke ôyap teke beta bulane be be.

⁵ Za a tii ékabela ya fé a ve je éto fili, a za a nga tii mengataʼa me éjakase ya fé?

⁶ Me nga bo ôzôm étabaʼa jé, a si é bili nku fe vôm é ne tabe.

⁷ E ne te bisi zôʼé ya tison, nge wôʼô miñyône mi ndutu ékalik.

⁸ Ja wulu minkôle minkô, asu ya yene bidi bié, ja ke ja jeñe jôm ése é ne nyôle mekaé bilok a nyumi.

⁹ Ye nyat ja kômbô bo wo ésaé? Ye ja bômbô e fefele éwolo bidi ya biyeme biôé?

¹⁰ Ye ô ne tiñeti nyat nkole na é faʼa nnoñ ya bé bidi? Ye ja ye dutu évôl étyé ja faʼa si e mvuse jôé e bone mimbiʼili?

¹¹ Ye wo ye ve je ndi nleme jôé amu na ngule jé é nʼanen? Ye wo ye liʼi je ébuma ya njuʼu wôé?

¹² Ye ô ne tabe nyat éte ndi nlem asu ya kôane bidi biôé a bo bie mevis e nseñe wôé ba tyaʼa bidi?

¹³ Mefabe mʼéngutu ma ndamban a mevaʼa mese, ô yeʼe jô na mefap a mesaé me jun.

¹⁴ Vʼéyoñ éngutu a liʼi metyi mé si a suu me na me wôʼô ayôñ e mbuluʼu été,

¹⁵ a vuane na abo da e ne bôé me, nge na tite jia yʼafan é ne me tibi.

¹⁶ Engutu a ne njet e be bone bé, avalʼane nge be nji bo émbé; a nji ko woñe na a nga wu njuʼu zezé.

¹⁷ Amu Zambe a nga bo nye feʼe momo, a nji ve nyʼatyeñ ane ngap.

¹⁸ Eyoñ a tebe a taté mbi, a woé ékabela a nyô a wulu je yôp.

¹⁹ Ye wo wo ve ékabela ngu nge jalé tyiñe jé a zeñ ja fôʼôsan?

²⁰ Ye wo bo na é yôô ane étandak? Mveme jé é too je ndi, ja miase woñ.

²¹ Ja fias e mone mbiʼili été, a vak amu ngule jé, ja mate mbi a ke tôbane mengaa;

²² Ja yene woñe zezé, jôm éziñ é ne te bo je na é ko woñ, nalé fe na é ne te bulane mvus éyoñ é tôbaneya nkpwaté mekôn.

²³ Nkob ô bili mekoñ mʼélaé wo duñe nye mvus, nalé fe akoñ da ngemban a ngamba akoñ.

²⁴ Ja sembe a ayôñ ese a mine ñyem.

²⁵ Eyoñe toñ é kobôya, ékabela é se fe nguleya jibi, ja vôʼôlô ényume mewosan é tele ôyap, avale te fe ja vôʼôlô ényume bivet a miñyôn.

²⁶ Eyoñ ôbam via yele a same mefabe mé mfaʼa ya nké, ye via belane feʼe jôé?

²⁷ Ye ndôé ja yele yôp a lôñe dumbaʼa dé e mevôm me ne mbetane yôp amu njôane wôé?

²⁸ Ja tabe a lôt alu e mekoʼo été, vôm a ne nyʼôlem a ne akôme yôp,

²⁹ nne ñhe ja mombô jôm ja ye bi é bete valé; mise mé ma yene je ôyap.

³⁰ Bone bé ba nyu metyi. A e vôme mimbime mi biôm mi né, vôm ate fe ndôé éte é né.