Yb 38 - Bible en langue Bulu

Zambe a yalane Yob, éyalane yʼôsu

¹ Ane Nti a nga yalane Yob a too beta évuñulu été a jô na:

² Za a ne nyô a bo mefeʼe mam évindi a nkobô wo jembane ñyemane mam?

³ Tiñetiʼi ases angeteñ dôé, avalʼane éwôlô môt; ma ye sili wo minsili a wo ye yeʼele ma.

⁴ O mbe vé éyoñ me nga té si? Katek, nge wo yeme de a atyeñe dôé.

⁵ Ye wo yeme môt a tyiʼi minté yʼété? Nge veʼe ndam yʼété?

⁶ Mimbôkaʼa yʼété mi ne mbemane vé? Nge na za a nga bôôé akoʼo jua yʼété,

⁷ valé ateté ya mametyé é yiʼa bia nsamba wua, bone be Zambe ki be kute mefas?

⁸ Za a nga fete mendim me mañe mbé , éyoñe me nga vam me soʼok e bidoʼo ya si?

⁹ Ke ma! A me nga jalé me minkut ane ngômesan, me nga vute me afibe nkut été.

¹⁰ Me nga telé nkean ôsu wé a ve nné éyoñe me nga telé mbé bityé ôsu vié.

¹¹ Me nga jô me na: Wo ye suʼu va, te beta ke ôsu abui; yaa, mendime môé me ne mebun ma ye suʼu va.

¹² Nté ane ô tabe, ye ô veya tyé atiñ éziñ? Ye ô boya mélendé me tyé na me yem été jap;

¹³ Ane me ne bi mekuʼu ya si, ane bebo abé ba ye tébane si amu jame te?

¹⁴ Jôm ése ja tyendé ñhe éyoñe te, avalʼane metek ma nyoñe ndem éyoñe ba nnambe me, a ma yené avalʼane nge me beʼe ngômesan.

¹⁵ Ve bebo abé be nji fe bi éfufube jap, a wo wo betebane yôp ô buʼiya.

¹⁶ Ye ô keya a kui vôme mañ ma téé? Ye ô keya wo wulu e bidoʼo ya yee?

¹⁷ Ye mimbé yʼawu mi nga litibane be wo? Ye ô nga yene mimbé mi nsisiñ yʼawu?

¹⁸ Ye ô tameya foʼo simesan ane si nyô é ne anen? Kobôʼô nge wo yeme mam mete mese.

¹⁹ Ye wo yem e zen ja ke suan e vôm éfufup é too? Nne dibi é too vé

²⁰ ane ô ne nguleya bi de vôm da suʼu a yeme mezene me étabaʼa te?

²¹ Ke wo yiane yeme de! Wo ô bialéya a ayap!

²² Ye ô nga ke a kui e vôme bibañe mendim bi ne nnaan? Ye ô nga yene vôme metaʼa me ne nnaan,

²³ mme me nga baʼale asu mbia biyoñ asu môse mewosan a bita?

²⁴ Ye wo yem éfufup ja tulan a kui be bia, a vôme évuñulu ya jôp da tôô ja mialan e si nyô?

²⁵ Za a nga yooé bikoʼo bi mveñe zen ? A tene zene feleves a zoʼoyañ?

²⁶ Za ya bo na mveñ é ne noñ e si é ne teke bôt, e nkôte si vôme bitétéa bi ne bôt bi ne momo,

²⁷ asu ya ve mevôm me ne biliʼi mendim, a bo na biloʼo bi vam a faa?

²⁸ Ye mveñ é bili ésaa? Za a bo na metoé me mfô mendim me bialé?

²⁹ Ñwônane mendim ô nga bialé e be nyia mbé ? A za a nga biaé ñwônane mendime ya yôp?

³⁰ Eyoñe metaʼa ma ku, mendim ma bo ayet ane mekok , a ngum ôsôé ô ne veñesane beta ébañ mendim.

³¹ Ye ô ne tiñeti metiñ ma lat ékoé bengon, nge tii minkole mi Nkel ôvôn?

³² Ye ô ne bo na nsamba yʼateté da yené éyoñe jia é yené éyoñe jap, a ye wo wo liti tôlô ba nsamba wé zen ?

³³ Ye wo yem ane mame ya yôp me ne ntaʼan? Ye wo tuʼa yemelane si, a ntaʼane mame wé?

³⁴ Ye ô ne bete tyiñe jôé a kui minkut asu ya na atôñe mendim e yandane wo?

³⁵ Ye wo lôme feleves na é wulu? Ye ja jô wo na: Me nyô?

³⁶ Za a nga futi fek nsolane nlem été, nge na za a nga ve nsisim atyeñ?

³⁷ Za a ne lañe minkut a fek, a vite mendeʼe ya yôp,

³⁸ asu ya na mbuluk ô wôn, a na bibañe metek bi lat?

Zambe Masa betit

³⁹ Ye wo bo nsôm asu ngale ngbwengbwem, a ye wo jeʼe zaé bitoñe bengbwengbwem,

⁴⁰ éyoñe be bôʼô mimfule miap, éyoñe be too bisaé si be yabeʼe biôm?

⁴¹ Za a yam éngbwañ bidi éyoñe biyele bié bia yône be Zambe bia ke bia ndeñ, teke jôme ya di?