Biblia Todo Logo
Bìoball air-loidhne

- Sanasan -

Yb 37 - Bible en langue Bulu


Zambe ôyôn

1 Ajô te nde nleme wom wo fôʼôban, wo yele a kôlô vôm ô né.

2 Vôʼôlaʼan, vôʼôlaʼan éduñe tyiñe Zambe! E mvam ja so anyu dé!

3 Mvame zoʼoyañ éte ja yiane yôp ese, a feleves jé ja faé a kui mekuʼu ya si.

4 Mvus éte tyiñ jé ja bam: Zambe a bam a beta tyiñe wé; éyoñ a boya na tyiñe jé é wôʼé, a nji beta bi feleves.

5 Eyoñe Zambe a bam a tyiñe jé, nalé a ne étua mbamba jam; a bo beta be mam mbe bia kate yemelan.

6 A jô metaʼa na: Kpwaʼane si! Avale te fe a jô ékoʼo mveñ, jaʼane mveñe metaʼa.

7 A fete wo ététéa ése é ne môt a sitam , nalé bese ba ye yeme na be ne ésaé jé.

8 Tite yʼafan ja bulan étabaʼa jé, a bômbô mfule wé.

9 Olendé a so mfaʼa ya nké, a avep e bivuñulu yʼakôé.

10 Zambe a bo bibañe mendim a mvebe wé, a ngum ôsôé wo mane wôn.

11 A futi émumun e minkut été, a mialane minkute mia faé.

12 Mia yaé aval émien a liti mie zen , asu ya bo jam ese a bendé mie e si bi too émo va;

13 avalʼane ôlé a bibi e si jé, nge avalʼane ndeme ya mvame jé, nne a bo na biôme bite bi yené nalé.


Zambe ésep
( Yb 36:22 akk; Sam 104:24 ; 139:17 ; 145:3 )

14 A Yob keʼe alo dôé mfaʼa mam mete, tebeʼe a yemelane bitua bi mame Zambe!

15 Ye wo yem ane Zambe a wulu bie a bo fe na éfufube minkute mié é faé?

16 Ye wo yem amu jé minkut mia bo te ku? A yeme fe bitua bi mame ya Nyô ñyemane mame wé ô ne nya mvoʼé ?

17 E wo mengômesan me nʼayôñ abui éyoñe si ja woʼon a évuñulu ya nké.

18 Ye ô ne nyiʼi minkut ékulaʼa ane Zambe, minkute mite mi too ayet ane ngobé be nga bo a nyeman étyé?

19 Boʼo na bi yeme jam bia yiane jô Nye; bia ye bo te beta jô jam amu dibi ya ñyemane wongan.

20 Ye ba ye kate nye na ma ye kobô? Ve ye môt a ne nguleya jô na a kômbô wu?

21 Eyoñe ji be nji fe yen éfufup, amu minkut mi maneya dibe je, a évuñulu é lôteya a mane vaa mie,

22 a éfufube mvot ja so akôé. Ejijine ya ko woñ ja bômane.

23 Bi se nguleya ke a kui be Nyô A ne Ngul Ese, Nyô a nʼanen amu ngule jé, zôsôô wé! A ne teke tibili nyô a ne njalan a zôsôô !

24 Ajô te bôt ba yiane ko nye woñ; Ve Nye a nji fombô wua ya ba ba buni na be ne mimfefek.

© LʼAlliance Biblique du Cameroun, 2009

Bible Society of Cameroon
Lean sinn:



Sanasan