Yb 36 - Bible en langue Bulu

Ane Zambe a yeʼele bôt

¹ Eliwu a nga kee nkobô ôsu a jô na:

² Tame yange, ma ye kate wo, amu me ngenane me bili bifia biziñ asu ajô Zambe.

³ Nyemane wom wo ye so ôyab abui, a ma ye kale nyô a nga té ma.

⁴ Amu e ne bebela na nkobô wom ô nji bo meduʼan, môt a ne nya mvoʼé e ñyemane wé été, nye mia nye mi né!

⁵ Zambe a ne ngu, a a nji bene môt éziñ; a nʼéwôlô amu ngule ya ñyemane wé.

⁶ A nji jôʼé mbo abé na a nyiñ, ve tyiʼi bingôngole bi bôte mejô zôsôô .

⁷ A nji vaa mise be zôsôa môt, A tooé bejô bôte bito, A tooé bʼété nnôm éto, nalé ate ba ye betebane yôp.

⁸ Nge be ne nkaʼan a bengôkop, nge mengataʼa ya njuk ma bi be,

⁹ éyoñe te a ve mimboone miabe mekua, a ntyamane metiñe wob, éyoñ ba bo wô mebun;

¹⁰ a bemene be, asu ya yeʼele be, a kate be na be jôʼé ékotekote jap.

¹¹ Nge ba vôʼôlô a bo mewôk, ba mane melu map ébotan été, a mimbu miap mefoʼo été.

¹² Nge ba bo te wôk, ba ye jañ a nkpwaté mekôn, ba wu e ndimane wob été.

¹³ Bebo abé ba kuane bebien e ayaa, be nji loone Zambe a volô be, éyoñ a kaʼa be ngataʼa;

¹⁴ Nsisime wob wo jañ be too bisoé, a ényiñe jabe fe ja jañ e bebo ébamba été.

¹⁵ Ve Zambe a kôté éngôngole môt ve a njuʼu wé ôbien. A a bemene nye a mintaé.

¹⁶ Melu mvus Zambe a nga bo na ô bo te wôʼôlun, éjiane yʼété a nga ve wo abui afok. Tawôlô wôé a mbe njalan a afuse tit da dañe mvaé.

¹⁷ Akôsa bo nalé mekua me biya wo, a meleb me bibiya wo me ne teke abulane mvus.

¹⁸ Ayaa e boʼo te tindi wo a dañe nné! Nge wone wo a ôsimesane wuna na: Ô ne nguleya kuse Zambe a mveane nye bifaʼé.

¹⁹ Toʼo akume dôé nge mvote jôé bi nji bo abime da yian, nge abui mveane ngule dôé

²⁰ de fe teke lañeban alu meyoñ me bôt ma jañ.

²¹ Tabeʼe ntyele ya kôñelan mfaʼa abé e né, amu na jame te nde ô nee de e minjuʼu été.

Zambe a dañ

²² E ngule Zambe a bili ja bete nyʼôyabe yôp; za a ne nguleya yeʼele ane Nye?

²³ Za a lebe Nye mezene mé? Zʼa ne nguleya jô nye na: Ô boya abé ?

²⁴ Simesaʼane wumulu ésaé jé, nje bôt ba sek e bia biab été.

²⁵ Etétéa ése é ne môt ja fombô nye ne yôaa! Môt ase a yene Nye a tele ôyap.

²⁶ Zambe a nʼanen, ve bi ne te yeme yemelane nye; tañe mimbu jé é ne te kʼayemé.

²⁷ A dutu metoé mendim e be Nye, kôñelane mveñ é bo ndutuu.

²⁸ Mveñ éte nje ja nnoñ é soʼo minkut été. E wuʼa metoé e be jama bôt.

²⁹ Za a ye yem ane minkut mia wulu, ane zoʼoyañ ja bam ébeme Zambe si?

³⁰ O lôô na Zambe nye a ndamé felevese je e nlô wé yôp, a buti bidoʼo bi mañ.

³¹ Mezene mete mme a belane me, asu ya tyiʼi meyoñ me bôte mejô. A ve ézuʼu bôte bidi.

³² A nyoñe feleves e mo mé été, a bendé je na é wosane nyô a zu té nye ntañete.

³³ Foé ya nzuane wé a kate je a zoʼoyañ, mbame biyeme wé wo wôʼôtane nye éyoñ a ntoo bebé.