Yb 35 - Bible en langue Bulu

Ye môt a ne zôsôô e mise me Zambe

¹ Ane Eliwu a nga beta nyoñe nkobô a jô na:

² Ye wo buni na ô bili mekabe, ye ô ne nguleya jô na: Zôsôô wom a ne be Zambe?

³ Amu wo jô na: Ye nalé a ne wo mfi? Da volô ma jé na me bo te bo abé ?

⁴ Ma ma zu yalane wo, mia benyo bemvôé éyoñe jia.

⁵ Fombôʼô yôp a yen! Fombôʼô minkut ane mi ne wo yôp!

⁶ Nge wo bo abé , jame te da bo nye jé? Nge wo tyame metiñ abui abui, wo bo nye jé?

⁷ Nge ô ne zôsôô , wo ve nye jé? Jé a nyoñ e wo wôé été?

⁸ Esase jôé ja ndeñele fe ve môt a ne ane wo, zôsôô wôé a ne fe mfi ve be môta binam.

⁹ Bôte ba yôn amu jama bekpweʼele, bôt ba sili mvolan amu mboon évô ya beta tañe bôt;

¹⁰ ve teke nyô a jô na: Zambe a ne vé? Nyô a nga kôme ma, Nyô a ve ma nsisime ya té bia a alu,

¹¹ Nyô a ve bia nyeʼelan a lôte betite ya si nyô, a ve bia fek a dañ abim a ve anone ya yôp?

¹² Ajô te ñhe ba yôn, vʼa a nji yalan, amu mebune ya ba ba bo abé .

¹³ Ba yône zezé: amu Zambe a nji ke wôk, Nyô A ne Ngul Ese a nji fombô dili,

¹⁴ akôsa bo wo jô na ô ngenane te yene Nye, ajô ô bili e nʼôsu vié: yangeʼe nye!

¹⁵ Eyoñe ji amu ayaa dé e ngenane te so, a A too ane nyô a nji yeme na môt a bene njôan,

¹⁶ ajô te Yob a kui anyu e zezé, mejô ma kui nyʼanyu ane duʼu a bi nyo. Me too teke ñyemane mam été.