Yb 34 - Bible en langue Bulu

Zambe a nji bo jam e nʼékotekot

¹ Ane Eliwu a nga nyoñe nkobô a jô na:

² A mimfefek vôʼôlaʼane nkobô wom! Mia mi bili ñyeman keʼane melo menane be ma!

³ Amu melo ma yemelane minkobô , aval anyu da tyeʼe bidi.

⁴ Ntamane ñhe tobane zôsôô mfaʼa wongan, ñyemelaʼane jam e ne mvaé e zañe jangan.

⁵ Yob na: Me ne zôsôô , ve Zambe a vaaya zôsôô wom,

⁶ akôsa bo zôsôô wom, ma yené éyoñe ji ane nlaa minsos. Fôle jam é ntoo nkômekutu, teke na me boya abé .

⁷ Ye môt éziñ a funane Yob, nyô a nyu ékpweʼele ane mendim,

⁸ a wuluʼu e nsamba ya ba ba bo ékotekot, ba be bebo abé be wuluʼu nsamba wua?

⁹ Amu a maneya jô na: E ne te mvolan be môte na: A yene mvaé jé be Zambe.

Zôsôô ya be ngungule môt

¹⁰ Vôʼôlaʼane ñhe ma, a mia bôt mia yeme wôʼô ma! Zambe a nji bo nkpwala , ékotekot é ne Nyô a Ne Ngul Ese ôyap!

¹¹ A bulane môt ase ane mimboone mié mi né. A yaʼane môt ase avalʼane mezene mé me né.

¹² Bebela na Zambe a nji bo abé , Nyô A ne Ngul Ese a ne te viti zôsôô .

¹³ Za a nga ve nye nguleya jôô si? Za a nga ve nye émo ése?

¹⁴ Nge a too ye simesan vʼEmien. Nge a too ye bulane nyoñe Nsisime wé a mvebe wé,

¹⁵ minsône mise mi nga ye jañ éyoñe jia, a môta binam a nga ye bulan e mbuluʼu été.

¹⁶ Nge ô bili fek, vôʼôlôʼô jame di, keʼe alo dôé éduñe ya nkobô wom!

¹⁷ Ye nalé a ne bebela na nyô a vini zôsôô a ne nguleya jôô? Ye wo ye ve nyô a ne zôsôô a éwôlô mekua?

¹⁸ Ye ba ye jô njô bôte na: Zesé jôm, a jô fe benya bôtô na: Bebo abé ?

¹⁹ Zambe a nji semé bone bejô bôt, avale ba yené mis, nge kandé nkukum ba nzozoé, amu bese be ne ésaé ya mo mé,

²⁰ ôyôm éyoñ, ba mane wu; e zañ alu, ayoñe bôt da tébane si a wu; ba vaa nyô a nʼéwôlô teke ve beta ngul éziñ.

²¹ Amu Zambe a fombô mezene me môt, avale te fe a fombô medaa mebo mé mese.

²² Teke dibi nge nsisiñ yʼawu ba ba bo ékotekot be ne nguleya sobô.

²³ Asu ya na Zambe a kee môt ntyiʼane mejô, a voʼo dimili ayab éyoñe ya fase nye.

²⁴ A kpwé mingungu teke fase be ajô, a a telé mife éjiane jap;

²⁵ Amu a yemelane mimboone miap. A bôôé be kayale a alu, a be fitebaneya.

²⁶ A bibi be ane bebo abé e vôm be ne nguleya yene be.

²⁷ Amu be nga kandane nye, a amu be nga bo te yeme yemelan mezene mé mese.

²⁸ Be nga bo na ñyône nzôzoé ô kui be Zambe, a a ye wôʼô ñyône bingôngole bi bôt.

²⁹ Nge a ve awoʼon, za a ye ve mekua? Nge a solé asu dé, za a ye bo nguleya fombô nye? Nalé a ne bebela asu ayoñ a asu môt;

³⁰ ndembene môt a ne mbo abé a ye bo te jôô, nalé fe te fe beta bo ôlam asu ayoñ.

³¹ Amu na ye a tameya jô Zambe éyoñ éziñe na: Me jibiya njuʼu wom, ma ye bo te beta bo abé;

³² jam me ngenane te yen, litiʼi ma de; nge me nga bo bikotekote bi mam, ma ye bo te beta taté na ma bo bie.

³³ Ye avalʼasimesane dôé e né, nde Zambe a ve maʼan? Amu wo ve mekua; wo wo top, ve sa ke ma. Kañeteʼe ñhe jam wo yem!

³⁴ Bôte ba yeme fas ba ye kate ma, nalé fe mfefeʼe môt wo vôʼôlô ma wô fe wo ye kate ma.

³⁵ Yob a kobô, ve ñyemane momo be nye, nkobô wé wo jembane mfasan.

³⁶ Ajô te Yob a kele ñhe ôsu a tôbane meveʼele , amu a yalan ane bikotekote bi bôt bia bo!

³⁷ Amu a betéya beta ékop abé dé yôp; a kute kôp e zañe jangan, minkobô mia wosane Zambe mia so nyʼanyu abui abui.