Yb 33 - Bible en langue Bulu

Zambe a kobô bôt a minjuk

¹ Eyoñe jina ñhe a Yob, vôʼôlôʼô nkobô wom, keʼe alo mfaʼa ya mejô mam!

² O lôô na ma kui anyu dam, ôyeme viam via ye kobô e anyu dam été,

³ minkobô miam mia ye liti zôsôô ya nleme wom, biyaé biam bia ye kuli ve nya ñyemane mam;

⁴ nsisime Zambe ô nga kôme ma a mvebe Nyô A ne Ngul Ese, wo bo na me nyiñ.

⁵ Yalaʼane ñhe nge ô ne nguleya bo nalé, kômʼ été mebo jôé, tebeʼe ôsu viam!

⁶ Me ne ane wo asu Zambe, be nga nyoñe fe ma metek;

⁷ Ajô te ma ve wo woñe nlem , a ma ye bo te vite wo a ngul éjôé jam;

⁸ Ve wo te jô melo mam me wôʼôk, ma te wôʼô éduñe ya nkobô wôé na:

⁹ Me ne teke bijô, teke abé , me ne mvoʼé , teke ékobe be ma.

¹⁰ A Zambe a té ma ntañete, a yene ma ane nsiñe wé,

¹¹ a futi ébom e mebo mam, a fombô jam ese ma bo.

¹² Mfaʼa ôte, ma ye yalane wo na: Wo duk , amu Zambe a nʼanen a dañe môt.

¹³ Amu jé wo kômbô wômane Zambe? Amu môt a se nguleya yalane mejô mé mese.

Zambe a kobô mezene mezen

¹⁴ Ve Zambe a kobô, anaʼana avale di, anaʼana avale di, wo teke yem.

¹⁵ A kobô biyeyem, ñyenane yʼalu, éyoñ ôyo melom ô biya bôt, éyoñe be bôô ôyo binoñe biap.

¹⁶ Eyoñe te ñhe a liti bôte mam, a yemete ayéʼé dap.

¹⁷ Nalé a ye bo môta biname na ba mimboone mié be kandan; a bo ngungule môte na ô saʼale mebun.

¹⁸ Nalé nsisime wé wo ye bo te fuban ébé. A kaman ényiñe jé na é bo te jañ a nkpwaté mekôn.

¹⁹ Eyoñ a bôô énoñe jé, môt a ne fe nyoñe mbeman a zene ya mintaé, éyoñe bivese bié bia ke ôsu a bi mewosan.

²⁰ Eyoñe te a wôʼô bidi abé , toʼo na bidi môt a ne dañe kômbô di,

²¹ minsône mié mia sibi a jañ mise me lôô, bivese bié bi mbe te yené, bia ngônôbô atan;

²² nsisime wé wo subu bebé ébé a ényiñe jé ja subu bebé be ba ba ve awu.

²³ Ve nge Engele a yeʼelan ajô dé, Engele wua e Beéngele toyini été, a too nyô a kate môt e jam a yiane bo,

²⁴ éyoñe te a ye mvamane nye a jô na: Kôtéʼé nye a za sis ébé été; me yeneya ngôtô!

²⁵ A minsône mié mia beta bo, ane éyoñ a nga too ésoé; a beta bulane melu a nga too nkpwaʼa ndôman.

²⁶ A yeʼelan e Zambe a yene nye mvaé, a yen asu dé a miñyône ya mevak. Zambe a bulane môt e zôsôô wé.

²⁷ A yia bia a tele bôt ôsu a jôʼô na: Me boya abé , a vite jôm é mbe mvoʼé , a be nji ke bo ma avale e nga yiane ma.

²⁸ Zambe a kôtéya nsisime wom, ô bo te ke ébé été, a nsisime wom wo ye beta yen éfufup.

²⁹ Mame Zambe a bo mme le, biyoñ bibaé, bilaa, baa môt.

³⁰ Nalé a ye bo na nsisime môt ate ô bo te ku ébé, asu ya faé nye éfufube ya bevevee.

³¹ Tabeʼe ntyel a Yob, vôʼôlôʼô ma! Tabeʼe évô a ma ma ye kobô!

³² Nge ô bili mejô mʼéziñe ya kobô, yalaʼane ma! Kobôʼô amu ma ve wo mekabe,

³³ nge nalé momo, wôna wo vôʼôlôʼô ma! Tabeʼe évô a ma ye yeʼele wo fek.