Yb 32 - Bible en langue Bulu

Amu jé Eliwu a kobô?

¹ Ane bôte bete belaa be nga bo teke fe yalane Yob, amu a nga yen émiene zôsôô .

² Eyoñe te Eliwu, mone Barakil, môte ya Bilz, abume bôte Ram, a nga yaa Yob amu a nga yen émiene zôsôô asu Zambe.

³ A nga yaa fe bemvôé bé amu be nji fe bi éyalan a yene na Zambe nye a bili mekua.

⁴ Mbôlô be mbe bemvendé a nye, ndʼa nga yange na a kobô Yob.

⁵ Eyoñ Eliwu a yeneya na bôte bete belaa be nji fe bi jame ya yalan e menyu map, ajô te a nga yaa.

⁶ Nde Eliwu, mone Barakil a nga nyoñe nkobô a jô na: Me ne mongô, mia ki minnôm, ajô te ma te fôʼôban a ko woñe ya liti mia ñyemane wom.

⁷ Ma too me jôʼô na: Abui mimbu da ye yeme kobô, abui mimbu da ye liti ñyemane mam.

⁸ Ve bebela a ne na e be môt, nsisim , Mvebe Nyô A ne Ngul Ese ñwô wo ve nye atyeñ.

⁹ Abui mimbu e nji ve fek, a sake minnôm mi bôt mmie mia wôʼô nya ntyiʼane mejôô.

¹⁰ Ajô te nde ma jô na: Vôʼôlaʼane ma! Ma fe ma zu liti ñyemane wom.

¹¹ Ma te wôʼô asuʼulane ya nkobô wônan ma te kee alo e mimfasane mienan, me buniʼi na mia ye tuʼa wôʼô nkobô wé.

¹² Ma te tebe ne séé me vôʼôlôʼô mia, ve teke môte wua ya be mia, a te jô jam ma kañese. teke môt a te yalane nkobô wé,

¹³ ve te jôane na: Bia te koon a bili fek. Zambe nye a ne tooé nyʼévô sake môt!

¹⁴ A nji lume ma bifia, ajô te ma ye bo te yalane nye me belaʼane bifia bienan.

¹⁵ Ba ko woñ, teke yalan! Bifia bi ne be momo!

¹⁶ Me yangeya; a amu be nji fe kobô, amu be tebeya teke fe yalan,

¹⁷ ma fe me tame zu yalan éyoñe jam. Ma fe ma zu liti ñyemane wom.

¹⁸ Amu me ne njalan a bifia. Nsisim wo vuñe ma nyôl été,

¹⁹ ma wôʼôtan e nyôle jam été ane vôme woon a kui mesanaʼa. Ane vôme mimfefé mendek mia zu tôtan.

²⁰ Ma ye kobô asu ya vebe mvoʼé , ma ye kui biyaé biam a ma ye yalan.

²¹ Ma ye bo te semé ngumba môt, ma ye bo te ve môta binam meseʼesaʼa meduʼan.

²² Amu me nji yeme duk a mbamba nkobô, nyô a nga té ma a za jiʼa vaa ma.