Yb 31 - Bible en langue Bulu

Yob a liti na a nji bi mekua

¹ Me nga bo élat a mise mam. Me mbe nguleya fombô éndune ngon aya?

² Ngabe fé Zambe a nga ye naane ma yôp? Ngabe fé Nyô A ne Ngul Ese a nga ye lôme ma yôp?

³ Ye bidim bi nji bo asu mbo abé , a mam me nʼabé ki asu bikotekote bi bôt?

⁴ Ye sa Zambe nyʼa fombô mezene mam, a lañe mendaa mebo mam?

⁵ Nge me nga wulu ékotekot été, nge abo dam e nga ke avô e meduʼan été,

⁶ Zambe a ntoo ve veʼe ma a kop é ne zôsôô , a a yeme nya mvoʼé wom!

⁷ Nge abo dam é kôlôya nya zene, nge nleme wom ô tôñeya mise mam, nge mvin éziñ é kabetaneya me mo,

⁸ Nge, me nga bé a ntoo ve môte mfe a di, a bifaʼalé biam bi ntoo ve tébane si,

⁹ nge nleme wom ô nga woneban ajô minga, nge me nga yabe me tele mbé môte mbok,

¹⁰ a ntoo ve minga wom a koʼo bidi asu fame fe. A befam befe be ntoo ve bômbô nye.

¹¹ Amu nalé a ne mbia mboon, étome betyiʼi mejô ba yiane ve melep .

¹² E nduane ja diʼi a kui mbiʼili ya njañ, é ntoo nguleya mane diʼi akume dam ese ne meñ.

¹³ Nge me nga biasé jôme mbo ésaé wom a ne fam, nge ji nyô a ne minga, e melu mangan été,

¹⁴ ma ye bo aya nge Zambe a kôlô si? Eyoñ a ye fas ajô ma ye yalan aya?

¹⁵ Nyô a nga kôme ma abume nyia wom, ye sa nye fe a nga kôme be? Ye sa Zambe wua nye a nga kôme bia abume benyia bangan?

¹⁶ Nge me nga bene ve bingôngole bi bôt jôm ba kômbô, nge me nga bo mise me nkuse na me tat,

¹⁷ nge me nga di éfus adi jam étam, monenyui teke jôm été,

¹⁸ amu aso ya mongô bia nye bi nga yaé nsamba, ane bôt be nʼésaa wua, ataté abume nyia wom, me nga volô nkus.

¹⁹ Nge me nga yene môt a kele a ndeñ a yii ngômesan, a nzôzoé ô jeñe jôme ya vute nyô,

²⁰ te na angeteñe dé é botane ma, te na mevule ya bone mintômba bam be vaʼa nyʼayôñe nyô,

²¹ Nge me nga bete wo a ke monenyui ngame yat, amu me nga yene na betyiʼi mejô be ne ngame jam,

²² wo wom ô ntoo ve kôlô étule jam, a étune wo jam é kandaʼan ékuteboñe jam, a é ntoo ve buʼi!

²³ Amu ma ko mbia jame Zambe a lôme woñ, a me se nguleya bo jôm éyoñe me tele éjijine jé ôsu.

²⁴ Nge me futiya ndi nleme jam e or, nge me jôya étyé é nʼédima na: Me veya ndi jam be wo;

²⁵ Nge me nga vak amu abui ya akume dam, amu akume wo wom ô nga kôan;

²⁶ nge me nga fombô éfufube jôp éyoñ é mbe é faék, a ngon éyoñ é mbe é wuluʼu é faék;

²⁷ a nge nleme wom ô nga woneban asoé; a nge me nga kee wo wom anyu asu mebatan,

²⁸ nalé fe a nʼétom ja yiane tyiʼiban ajô, a me nga ye ke e nkat bia e Zambe a ne ôyabe yôp.

²⁹ Nge me nga vak amu bidime ya môt a mbe a siñe ma, nge me nga fôn amu mbia jam a nga kui be nye,

³⁰ e ma me nji ve ôyeme wome ngule ya bo abé , nge sili awu dé a meyeʼelan mese;

³¹ nge bôt be too e nda éndelé jam be nji ye jô na: Môt a nji jaé tite jé a ne vé?

³² Nneñ a nji bômbô atan, me mbe me yoʼé mbé wom asu ñwulu dulu.

³³ Ye me nga solé mintyamane metiñe miam, ane môta binam mboʼo ase asu ya buti bikobe biam abume dam été?

³⁴ Amu me nga ye ko menyiñ me bôte woñ, amu ébiasé ya menda me bôt é nga ve me woñ; nde me nga ye ku évô, teke tulane mbé wom.

³⁵ Ngoʼé za a ye bo me na me yene môt éziñ a vôʼôlô ma? Efia jam ja suʼulan nje le Nyô A ne Ngul Ese a ntoo ve yalane ma! Esoman nsiñe wom a nga tili,

³⁶ ye ma ye bo te beʼe je étule jame yôp, ye ma ye bo te tiñeti je nyôle jam ane ékate duma?

³⁷ Ma ye kate nye tañe medaa mebo jam. Ma ye subu nye bebé ane mona njô bôt.

³⁸ Nge si jam é ne me ngame yat, a bisalaʼa bié bia kuli milik,

³⁹ nge me nga di ngule jé teke yaʼan, a a kooé na me wôéya e môt a ne je,

⁴⁰ wôna ndôé é kui été señe nlisi, a minsinik e señe fôn! Amané ya nkobô Yob.