Yb 30 - Bible en langue Bulu

Minjuʼu mi Yob

¹ Eyoñe ji me ntoo éwoviôé ya ba be ne ma ayôme bongô mvus, ba me mbe nguleya futi bʼésaa bap, e nsamba bemvu ya mbame betite wom.

² Ve ngule ya mo map ja ye volô me jé? Be se nguleya kui minnôm.

³ Be ntoo minkôt amu njembane mam a zaé. Ba ke ba mate mimbi e mevôm me nʼayet, bilik a ndaman.

⁴ Ba ke ba té biloʼo ya fé si bebé mevôme mintut mi né. Bidi biab bi ne ve mindi mi anoñ.

⁵ Ba titane be vôme bôte be too, ba soo be mvus ane ba soo ñwuwup,

⁶ ndembene be ke ba tabe e beangôndô mimbiʼili été, e Mimbase mekoʼo ya si a e mekôm été.

⁷ Ba yôn ane bijakas e bisaé été. Ba bômbô mevis e mbia biloʼo zañ.

⁸ Be maneya titane be si nyô, amu be ntoo bitétéa ya biasé, e bi bi ne te nguleya totebane môé.

⁹ A éyoñe ji ba belane ma e bia biab été me ntoo nkana ya menyu map.

¹⁰ Ba vini ma, ba ke ma ôyap, teke ko woñe ya tui ma menden asu,

¹¹ teke jam ba kate bo vôm me né, amu Zambe a jôʼé ya nlimetane yʼélaé jam a bo ma abé .

¹² Bingôngole bi bôte bite bia kôlô si e mbo nnôme wom, a tindi mebo mam, ba tube mbia mezene ya bo mʼabé.

¹³ Ba tyii zene jame mamien a vuñe na me jañ, ba be nji tame bi mvolane be môt éziñ.

¹⁴ Ba kui be ma ane vôme bôt ba tulan abé be nga tup, ba bume ma nyô ane ntyôa mendim!

¹⁵ Woñ ô kôñelaneya mfaʼa me né, éto nti jam é keya ane vôm évuñulu ja kee jôm éziñ, nyiane wom ô lôteya ane nkut .

Zambe a keya me ngame yat

¹⁶ Eyoñe ji nsisime wom wo tabe ndi ve be mamien, melu ya mintaé me biya ma:

¹⁷ alu da tube ma bives e nyôle jam été a minsise miam mi nji bi awoʼon.

¹⁸ E ngômesane jam é maneya tyendé, ja kabetane me nyô ane tyiñe ya alôʼô dam.

¹⁹ Zambe a wuaya ma e mbotok été, a me nga funane mbuluk a asup.

²⁰ Ma loone wo na ô volô ma, wo teke yalan. Ma tebe tetele na ô yene ma.

²¹ O ntoo étua njete be ma. Wo jimbi ma a ngule ya wo wôé,

²² wo kee ma me bete e bikabela bi évuñulu a wo bo na me tyibelane ôkôse si.

²³ Amu ma yeme nalé na wo kee ma awu, e vôme biôme bise bi vee bia tôban.

²⁴ Ye môt a nga zu wu a ne same mo mé nga? Ye nyô a ne e bidim été a ne te sili mvolane nga?

²⁵ Ye mi nji kuli miliʼi mis asu nyô melu mé me nʼayet? Ye nleme wom ô nji wôʼôlun amu ajô nzôzoé ?

²⁶ Amu me nga yange mvom, ve bidim mbie bi vianeya so.

²⁷ Biôme yʼabume dam bia kundi teke awoʼon. Melu ya njuk me tôbaneya ma.

²⁸ Ma wulu me ntoo évindi, ve sa ñhe a vian. Ma tebe tetele ékôane bôt été a yôn.

²⁹ Me ntoo monyañe bemvak, nyô ba be beéngutu ba wulu nsamba.

³⁰ Ekôbe jam é ntoo évindi a ja ku, bivese biame ki bia dik a kôt.

³¹ E mvete jam ja yian éyoñe ji vʼa jia ôlun. A ndiñe wome ki wo luʼan a tyiñe ba ba yi du.