Yb 3 - Bible en langue Bulu

Yob a yône be Zambe

¹ Mvus éte, Yob a nga kui anyu a yoʼé môs a nga bialé,

² Yob a nga jô na:

³ E môs me nga bialé ô jañek a alu e nga jô na: Monafam a nyoñebaneya abum.

⁴ Môs ôte ô boʼo ñhe dibi! Zambe a boʼo te simesane wô a too yôb été a éfufup é boʼo te faé wô!

⁵ Dibi a nsisiñe yʼawu bi tame vane wô minkut mi boʼo te faé.

⁶ Dibi e tame wôlé alu te! A be boʼo te lañe de e melu ya mbu! A be boʼo te lañe de éyoñe ba lañe bengon!

⁷ Ya! Alu te e boʼo nkôkôm, ôyenga mevak ô boʼo momo été.

⁸ Bôte bese ba yoʼé mimôs be yokéʼé alu te! Ba ba yeme vele Léviatañ ôyo fe be boʼo de nalé!

⁹ Ateté dé ya dibi tyé e boʼo dibi éfufub alu te da yange é boʼo te so. A é boʼo te yene biyakolô bi tyé!

¹⁰ Amu e nga bo te dib abum me nga nyoñebane de été! Nge solé mise mam njuk.

¹¹ Amu jé me nga bo te wu abume be nyia wom? Amu jé me nji ke wu éyoñ me nga vame nye abum?

¹² Amu jé me nga koone mebo ya nyoñe ma, a mebé ya nyaa ma?

¹³ Vʼéyoñe ji me nga ye bômbô si a tabe mvoʼé , me kele ôyo a woʼon,

¹⁴ bia be bejô bôt a bebôndé befeʼe ya si, mbe ba beta lôñe menda me ntoo ntyaman,

¹⁵ bia be bejô bôt be bili or a mbe ba jalé menda map a argent.

¹⁶ Nge na me nji ye nyiñ ane nsolekane mon ô solô, ane minkeñelé mi bon mi nji tame yen éfufup.

¹⁷ Vôm ate mbia be bôt ba jôʼé abui mfôʼôsane dap, a vôm ate bôt be teʼeya te fe ngu ba woʼon;

¹⁸ Mimbôʼô fe mi too mvoʼé mise, mi ne teke wôʼô tyiñe betibili bôt;

¹⁹ mone môt a beta môt be ne valé, a ôlo ô kôlôya éjôé masa wé si.

²⁰ Amu jé Zambe a ve môt a bili njuʼu éfufup, a ényiñ e be ba be ne minleme ntyaʼan,

²¹ mbe ba yange awu ve de teke so, a nyamete de a dañ akum,

²² mbe be nga ye dañe vak a fôn nge ba tôbane soñ?

²³ Me ne avalʼane môt a nji yem e vôm a ke a Zambe a feteya ma avalʼane môt a tele e mvuse mfin

²⁴ éyoñ ma yiane di, me bili ve minjuk, a ñyône ya mintaé miam wo bet éyoñ ése.

²⁵ Nge ma ko jam éziñe woñ, de ve kui; jam me mbe me tyeléʼé nleme yôp nde da kui be ma!

²⁶ Evôvoé, mvoʼé a awoʼon bi ne momo be ma ve me ne mbiban a mam ma juʼulane ma nsisim .