Yb 29 - Bible en langue Bulu

Nnôm a kum Yob a nga too

¹ Yob a nga beta liti ôsimesane vié a jô na:

² Ngoʼé nge me ne bulane bo ane bengone ya mvus, ane melu Zambe a mbe a baʼaleʼe ma,

³ éyoñ a mbe a boʼo na lambe wé a faé e nlô wome yôp a na me nyiine dibi été a éfufube jé!

⁴ Nge me ne beta bulane melu me nga bo nya môtô, éyoñe Zambe a mbe a baʼaleʼe nda éndelé jam ane mvôé.

⁵ Eyoñe bia Nyô A ne ngul ése bi mbe nsamba, a bisoé bi bone biam bi nga too ma mbômaʼan;

⁶ éyoñe mebo mam me nga duu avoñ été, a akôm é mialaʼan a tôñe mbon fefele jam.

⁷ Eyoñe me mbe me kui atan a ke e mbé tison. A bo na be kôme ma éto e vôme bôt ba tabe.

⁸ Bisoé bi bôt bi mbe bi yene ma a kôlô, minnôm mi bôt mi mbe mi kôlôʼô si a tebe tetele.

⁹ Bone be njô bôt be mbe be jôkéʼé minlañe miap, a buti wo wob anyu.

¹⁰ Tyiñe bivet é mbe é tabeʼévô, a be mbe teke fe nguleya kobô.

¹¹ Amu alo e mbe e wôʼô ma e mbe e jôʼô na me nʼébotan. A dis e nga yene ma e mbe me ngaa.

¹² Yaa me mbe me kôtéʼé éngôngole môt ja sili mvolan, a monenyui a mbe teke môt a volô nye,

¹³ ébotane ya nyô a nga zu wu, e mbe é keleʼe be ma; me mbe me jaléʼé mevak e nleme nkus.

¹⁴ Me nga jaé zôsôô wom ane ngômesan, a me nga bili zôsôa ntyiʼane mejô wom ane alôʼô a ane ntôm ba jaé nlô

¹⁵ me nga too mis asu ndindim, a mebo asu mbôbôk.

¹⁶ Me mbe ésaa minzôzoé; me mbe me fasek ajô nyô ma dimi;

¹⁷ me mbe me buʼu minkekeʼe ya nyô a nʼékotekot, a vaa jôm a nga bi e mesôñe mé.

¹⁸ Eyoñe te me mbe me jôʼô na: Ma ye suu mvebe e dumbaʼa dame yôp, ma ye tabe abui mimbu ane nselek;

¹⁹ minkañe miam mia ye yametan a kui mendim. E mfô mendim a ye lôte ngum alu e mintyaé miame yôp;

²⁰ duma dam da ye bo mfefé be ma, a élaé ja ye beta bo ngu e wo wom été.

²¹ Be mbe be vôʼôlôʼô ma, a be mbe be yangeʼe ma, be mbe be tabeʼe bivô a wôʼô feʼe jam.

²² Nge me mane kobô, teke môt a sôane ma, a nkobô wom ô mbe ô kalaʼane be be bese.

²³ Be mbe be yangeʼe ma ane ba yange mveñ, be mbe be yoʼé menyu map ane ba ba yange mveñ ésep,

²⁴ me mbe me muñuk a be, ve be teke tabe memuñe mete ndi. Be mbe te nguleya jañele éfufube yʼasu dam.

²⁵ Me mbe me kañeseʼe ke e nsamba wop, a tebe be ôsu; me mbe ane njô bôt ézezañe nsamba, ane nyô a jeʼe ba ba wôʼôlune minlem.