Yb 28 - Bible en langue Bulu

Fek ja nyoñe mesekaʼa

¹ Vôm éziñ a ne asu ya faʼa argent, vôme mfe asu ya fubu or.

² Etyé ja nyoñebane mbuluʼu été, akoʼo ba te nyemen da ve mvot.

³ Bôt ba vaa dibi a ba jeñe mekoʼo me solô e dibi été, a e nsisiñe dibi yʼawu akekui mevôm ma dañ édok.

⁴ Ba faʼa ésalak ôyab a mevôme bôt be too, mebo teke fe volô, me tyele yôp, me ndeñek ôyab a bôt.

⁵ Si, e vôme bidi bia so, é ne mbulekan, mevôme mé ma dañ édok, éfunan ane vôme nduan ja te bo ésaé!

⁶ Mekoʼo mé me ne e vôme ba koon akoʼo e nʼédima ba loone safir a ndube or.

⁷ Anone da bi biôm e ne te yeme zene yʼété, a dise violô e nji yene je.

⁸ Betit be ne ayok be nji tibi je a mebo map, a ngbwengbwem é nji ke tame lôt été;

⁹ môt a nnambe akoʼo e nʼayet; a a kpwé minkôle si ataté minkañ;

¹⁰ a bo mimbôʼôlé e mekoʼo été, a dise dé e ne yene jôm ése é nʼédima;

¹¹ a telé mendim me bo te beta lôt, a zuu jôm é solô éfufub été.

¹² Ve fek jé é ne vé? E vôme ñyemane mam ô né a ne vé?

¹³ Môt a nji yeme tañe yʼété, é nji ke bo e si bevevee.

¹⁴ Vôm a nʼédok a jô na: Fek é nji bo be ma. Mañ ki ma jô na: Bia fek bi nji bo nsamba.

¹⁵ Be se nguleya ve or a ne mfuban éjiane fek nge veʼe argent asu ya kuse je.

¹⁶ O se nguleya veʼe ba or ya ôfir kop, nge ba akoʼo e nʼédima ba loone ônit, nge ba Safir.

¹⁷ O se nguleya veʼane fek a or nge éyet, nge folane je a beʼe a ne mboon a or a dañ abeñ

¹⁸ kôraé a kristal (bidima mekok) bi nji bo atoté; éyoñe môt a bili fek, nalé wo dañe bidima bi biôm.

¹⁹ O se nguleya veʼane fek a tôpaze yʼEjipte. nge veʼe ba or a ne mfubane kop.

²⁰ Nde ñhe fek ja so vé? Nne ñyemane mam ô too vé?

²¹ Mise me jôm ése é vee ma kate yene je, ja sobô fe jaʼana anone ya yôp.

²² Mbiʼili ya njañ a awu bia jô na: Melo mangan me nga wôʼô be kobôʼô ajô yʼété,

²³ Zambe nye a wôʼô zene fek, nye fe a yeme vôm é too,

²⁴ amu nye a fombô a kui mekuʼu me si, a yene jôm ése e jôbe si va.

²⁵ Eyoñ a nga telé adit évuñulu, a veʼe mendim abim,

²⁶ éyoñ a nga liti mveñ avale ja yiane wulu, a liti fe feleves a zoʼoyañe zen ,

²⁷ nje ñhe a nga yene fek a liti je, a nga bôôé mimbôkaʼa yʼété, a tuʼa yeme je.

²⁸ Wôna a nga jô môte na: Ô lôô, nkoone Zambe woñ ñwô ñhe ô ne fek, nsaʼalan abé ki ñyemane mam.