Yb 27 - Bible en langue Bulu

Yob a suʼulane yalane bemvôé bé belaa

¹ Ane Yob a nga beta liti ôsimesane vié a jô na:

² Ane Zambe a vee, nyô a bene tyiʼi ma ajô, Nyô A ne Ngul Ese a ve ma nlem ôlun,

³ nté ôse ma ye bi mvebe wom, a nté évuñulu Zambe ja ye bo e mimbile mi môé miam,

⁴ biyaé biam bia ye bo te kobô ékotekot, a ôyeme via wo ye bo te kobô ôfôfoé ya jam é ne minsos.

⁵ ôsimesane ya jô mia na mia bele ô kele mʼôyap! Akekui me suuya mvebe, ma ye bo te kôlô e zôsôô wom été.

⁶ Ma bi zôsôô wom ne zeñ, maa ye ke tek. Te kʼalu da ya melu mam e nleme wom wo ve ma bijô.

⁷ Nsiñe wom a boʼok ane mbia môt, a nyô a kôlô si a wosane ma, a boʼok anʼékotekote môt!

⁸ Ndi nleme fé é liʼiya mbo abé , éyoñe ba vaa ényiñe jé? Eyoñe Zambe a vaa nyʼényiñe jé?

⁹ Ye Zambe a wôʼô ñyône wé, éyoñe njuʼu wo kui be nye?

¹⁰ Ye Nyô a ne Ngul Ese a ye bo mevaʼa mé? Ye a ye loone Zambe éyoñ ése?

Eliʼi ntibili bôt

¹¹ Ma zu yeʼele mia ajô ngule Zambe, ma ye bo te solé mia asimesane Nyô A ne Ngul Ese.

¹² Amu mia bese mi yemeya de, amu jé mia tôñe mame ya momo?

¹³ Ngabe ja so mbo abé be Zambe nje nyô, ngab éliʼi mbia môt a nyoñe be Nyô A ne Ngul Ese.

¹⁴ Nge a bili abui bon , be ne asu nkpwaté mekôn a bifaʼalé bié bi se nguleya jaé bidi;

¹⁵ ba ba ye nyiñ be soʼo be nye, awu da ye jame be, a minkuse miap mia ye bo te yône be.

¹⁶ Nge a kôane argent ane mbuluk, nge a kôane mengômesan ane metek,

¹⁷ nye a kôan, ve zôsôa môt nye a ye jaé me. Nyô a ne te bijô nye a ye nyoñe argent ane ngap.

¹⁸ A nga lôñe nda jé ane nyô évulebebas, anʼébeme mbaʼale afube ndik a lôñ.

¹⁹ A bômbô si a too kum, vʼa ke jambe a too nalé; éyoñ a kui mis a kooé teke fe jôm.

²⁰ Woñ wo bilane nye ane mendim. Olendé a vaa nye e zañ alu.

²¹ Evuñulu ya jôp da tôô ja beʼe a kee nye, ja vaa nye vôm a nga too mbia mvaan.

²² Ba wua nye mekoñ bilaé teke yeʼele. a yiane tube na bi bo te nnambe nye.

²³ Ba kute kôp ajô dé, bôt be ne njalan a mevak e vôm a nga too.