Yb 26 - Bible en langue Bulu

Yob a yalane Bildad

¹ Ane Yob a nga yalane na:

² Ô buʼu yeme volô nyô a ne ngule momo! O buʼu yeme nyii wo ô ne fôʼô momo!

³ O buʼu yeme lebe nyô a ne te fek! Za ngule mfasan wo liti nyô!

⁴ Wo kobô za? Za ki a sone wo?

⁵ Miñwuan mia fôʼôbane mendime si a biôme bi too été;

⁶ vôme ya miñwuan a yoo e mise mé, jôm éziñ é nji buti yee ya njañ.

⁷ A sam akôé e vôm é nji bo, a tyelé si e momo yôp.

⁸ A fete mendim e minkute mié été, a minkut mi nji tui amu adite dap.

⁹ A solé asu abôme ngon, éyoñ a yalé nkute wé été yôp.

¹⁰ A nga tene njiñelete e mendime yôp, a kui nnéa éfufup a dibi,

¹¹ beta mekône ya yôp ma fumi si a ko ayaa dé woñ.

¹² Ngule jé ja fôʼô mañ, a atyeñe dé da buʼu mebune mañ mete.

¹³ Mvebe wé wo fubu yôp, wo wé ñwô ô lumeya nyo ja tup.

¹⁴ Nge bone mimboone mié be ne avale te, abim avé minkumutu bia nyoñ mi nʼéveves. Nde ñhe za nyʼa ye wôʼô zoʼoyañ ya ngule jé?