Yb 24 - Bible en langue Bulu

Ekotekote ya bôt

¹ Amu jé Nyô A ne Ngul Ese a bo te naane biyoñ, a amu jé ba ba yeme nye be ne te yene melu mé?

² Bôt ba tyendé mekône ya minné, ba wube mimbame biyem a ve mie bidi.

³ Ba nyoñe ngal éjakase bobenyui, ba nyoñe nnôme nyaʼa nkus éban;

⁴ ba vôône minzôzoé bi bôte zen . Ba yemete bingôngole bi bôte ya si na be sobô nsamba wua bese.

⁵ Melendé me tyé, tame yen ane ba ke ésaé jap ane beyale bijakase yʼafan e nkôte si, amu na be bi bidi. Ozôm étam ñwô ô né asu ya ve bone bidi.

⁶ Ba tyiʼi mimbom bidi miap e mefup, a kôane bibuma mindiʼi bi mbia môt.

⁷ Ba lôt a alu sôsoé teke ngômesan. Be nji bi jôme ya buti nyô asu avep.

⁸ Mveñ ya minkô ja boté be nyô. A amu te vôme ya sobô, nde ba bi mekok a mo map.

⁹ Ba vaa monenyui abé anyu a ngul. Ba nyoñ éngôngole môt éban.

¹⁰ Ba bo na a wulu nsoé, teke ngômesan. Ba bo bewôʼô zaé na be beʼe mimbom bilok.

¹¹ Ba bu mbon e biluñ été. Ba tibi jôme ba miate bibuma a mebo, ve ba wôʼô évé.

¹² Nyône bôte ba wu wo ye wôʼé ô soʼo e tison, nsisime ya bôte be ne mbalane meveñ wo kuli ñyôn, ve Zambe teke nyoñe ngab a avale mbia mboone te!

¹³ Ba bevok be ne ngabe ya ba ben éfufup, be ne teke kandé mezene mé, nge tabe e bone mezene mé été.

¹⁴ Eyoñ éfufup ja yené, ñwôé bôt a kôlô si a wôé éngôngole môt a nzôzoé , wôna a alu a ne avalʼane ñwuwup.

¹⁵ Dise mbo mejian da bole fôfol ngôʼé a jô na: Môt éziñ a ye bo te yene ma, a a solé asu dé a éyañese.

¹⁶ Ba buʼu menda e dibi été, a amôs ba fete bebiene menda été; be ne teke yem éfufup.

¹⁷ Mfaʼa wop, mametyé me ne dibi awu. Ve nsa biôm a yembaneya bʼangôndô be mam ya dibi awu,

¹⁸ a yeñ ane e mendime yôp, bôte ya nlam ba yoʼé vôme wé a too. Ve nye a nji ke e zene mefube mindik!

¹⁹ Avale mfum a vian bia kee mendim metaʼa, avale te vôme ya miñwuan a kee môt a boya abé ?

²⁰ Abume nyia mon da vuane nye, ve minsoñ mia ye bo jôme mevaʼa mé, ba ye bo te beta simesane nye. Mboon abé wo ye buʼi anʼélé!

²¹ A mbe a wôléʼé nkôkôme minga ô ne teke bone biôm. A mbe teke belane nkuse mvaé!

²² Momo! Zambe a kôʼôlane melu bebo abé a ngule jé. Tame yen ane ba beta tebe tetele, éyoñe be nji fe buni na ba ye nyiñ.

²³ A ve be mvoʼé ane vôme ya yeʼebe. Mise mé ma fombô mezene map.

²⁴ Be nga bete bebiene yôp, ôyôme nté be ntoo momo; ba ku, biyoñe biap bia kui amané ane bôte befe. Be tyiʼibaneya ane minlô mi fôn.

²⁵ Nge nalé a ne momo, za a ye sôane ma? Za a ye yene nkobô wome zesé?