Yb 21 - Bible en langue Bulu

Eyalane Yob a yalane Sôfar

¹ Ane Yob a nga yalane na:

² Vôʼôlaʼan, vôʼôlaʼane nkobô wom, vaʼane ma ve mvolane nleme wu.

³ Vaʼane ma nguleya kobô a éyoñ me maneya kobô, ô ne nguleya woé.

⁴ Ye ma tat a môt éziñ? A amu jé nsisime wom wo ye bo te bo ôjejaʼa?

⁵ Kôñelaʼane be ma a semé, a butaʼane wo anyu

⁶ éyoñe ma simesane jame te, ma ko woñ, a ényunyui ja kui ma nyô.

⁷ Amu jé bôt be nʼabé ba nyiñ? Amu jé ba yômbô, Nge beta ke nyoñe ngu?

⁸ Mvoñe bôte jap ja bo ngu ba be be bebien be too, a bifaʼalé biap bia bi mefok mise map mebien me lôô.

⁹ Mvoʼé nje é ne menda map, saake woñ; nkasa Zambe ô nji bo be ngame yat,

¹⁰ nnôme nyaʼa wop a vʼabum teke selan, ngale nyaʼa wop a biaé abum teke kui atan,

¹¹ ba suu ayôme bone dap e mate mimbil, ane mintômba a bikela, a bone bap ba ke ba vôman.

¹² Ba yia bia ngom a éngombé bi kobôʼô. Ba vak éyoñe ba wôʼô tyiñe ndiñ.

¹³ Melu map ma man e mevaʼa été, vʼôyôm étun, awu da sise be.

¹⁴ Ve be mbe be jôʼô Zambe na: Kele bia ôyap, bi nji kômbô yeme mezene môé.

¹⁵ Nyô a ne ngul ése a ne za ane bia yiane saane nye? Bi bili za mfi ya yeʼelane nye?

¹⁶ Yaa! Mvome jap é nji foʼo bo e mo mab été. Feʼe mbia be bôt é ne ma nya ôyabe!

¹⁷ Ve ye da kui biyoñ biyoñe na: Lambe mbia be bôt a dim, na azoé e kui be be, na, Zambe, ayaa dé été, a ve be ngabe jap,

¹⁸ na be bo ane mbuan évuñulu ja kee wô, avalʼane bivua ôlendé a beʼe?

¹⁹ Ye Zambe a naan melebe mé, asu bone be mbia môt? Nye Zambe a yiane ve fonos, asu ya na a yeme nye;

²⁰ mise mé ma yiane fombô vʼéto éngôngole jé ébien, e nye a yiane nyu ayaa Nyô A Ne Ngul Ese.

²¹ Nda jé é ne nye mfi jé éyoñ a wuya, éyoñe tañe bengone jé é ne nlañan?

²² Ye Zambe nye ba ye yeʼele ñyeman? Nyô a jôô bevevee ba dañ ôyabe yôp.

²³ Wua a wu te bijô, ntute mvoʼé été, a too te jôme ja tyelé nye nleme yôp,

²⁴ mevel njalan a avoñ, foñ ya bivese bié njalan a mbon;

²⁵ Nyô mbok a wu, nleme njalan a ôlun, teke tame tyeʼe mvaé môs éziñ.

²⁶ Ba bômbô mbuluʼu été nsamba wua, a bitum bia buti be yôp.

²⁷ Ma yem asimesane denan a avale mia fas asu ya ve ma mekua.

²⁸ Eyoñ mia sili na: Nda mona njô bôt é ne vé? Nda éndelé bebo abé be nga too é ne vé?

²⁹ Jé! Ye mi nji sili belôtan minsili? A ye mi nji kômbô kañese jam ba liti;

³⁰ na e môse bidim bia kui, ba kamane mbia môt, e môs ayaa da yené,

³¹ za a kpwaane nye mbia ntabane wé? Za a bulane nye jam a nga bo?

³² Ba kee nye afube mesoñ, be beʼe nye; a ba ye mombô e soñe jé yôp.

³³ Bibañ meteʼe ya mbiʼili bi ne nye éveves. Bôt bese ba zu nye mvus; bôt tekʼalañé ba wulu nyʼôsu.

³⁴ Amu jé ñhe mia ve ma zesé mvolane nlem ? Jôme ja liʼi e biyalane biôé été é ne ve meduʼan.