Yb 20 - Bible en langue Bulu

Sôfar a kobô Yob éyoñe baa

¹ Ane Sôfar môte ya Naama a nga nyoñe nkobô a jô na:

² Tame yen amu jé asimesan da ve ma biyebe nlem , da yemete me na me yalan: amu nlem wo vuñe ma abum été.

³ Me wôʼôya bijô bia ve mʼôsone nyô. Ajô te mvebe ya feʼe jam wo ye ve ma éyalan.

⁴ Nga wo yeme na biyoñ bise, nté ane môt a nga tébane si nyô,

⁵ ndañane bebo abé ô nʼétun, a mevaʼa me mbia môte ki ôyôme nté?

⁶ Toʼo na nté wé wo kui yôp, toʼo na nlô wé wo nnambe minkut

⁷ a ye jañe nnôm éto ane mbuane wé, a ba be mbe be yene nye ba ye jô na: A ne vé?

⁸ A ye yele ane biyeyem, a ba ye bo te fe beta yene nye, ba ye titane nye ane ñyenan yʼalu.

⁹ Dis e mbe e fombôʼô nye, da ye bo te beta fombô nye, e vôm a nga too a ye bo te beta yene nye.

¹⁰ Minzôzoé mia ye kubu bone bé nyô, a mo mé ma ye bulane jôm é mbe é vaʼa nye kum.

¹¹ Bibuʼa ya nyôle jé bi mbe njalan a ngul ésoé môt, ve baa ngul éte ba ye bômbô mbuluʼu été.

¹² Ngʼabé e ne mvaé anyu dé été, nge a solé de ôyeme vié si,

¹³ a kamaʼane de teke jôʼé de, ve bi de anyu dé été,

¹⁴ bidi bié bia ye koʼoban abume dé été, a kôñelane bo nsu akpwe e nyôle jé été.

¹⁵ A mineya akum, a ye yô de. Zambe a ye sôʼô dʼabume dé été,

¹⁶ a viʼi nsule mekpwe, ôyeme beta nyo wo ye wôé nye.

¹⁷ A boʼo teke beta fombô bone bʼasôé, beta bʼasôé, atôñe wôé a di mbon!

¹⁸ A ye bulane jôm a nga wu njuʼu ya bi a a ye bo te mine je; a ye bo te beta buʼuban akume dé ya makit.

¹⁹ Amu a nga fit a vuane minzôzoé, nda a nga kuli azoé, a ye bo te beta lôñe je.

²⁰ A nji tabe mvoʼé mbia ndiane wé été, e minyamete mié été jôm éziñ é nji fame nye mo.

²¹ E ndoʼo jé été teke jôm é nga liʼi, ve ntabane mvoʼé wé wo ye bo te libi.

²² Afoʼo dé été, ôlun via ye bi nye, mam mese me nʼabé ma ye kui be nye.

²³ Eyoñe nye a jalé abume dé, Zambe a ye lôm ayôñ yʼayaa dé be nye. A a ye noo nye mekoñ mʼélaé, me ve nyiin e minsône mié été.

²⁴ Nge a tube mengale mʼétyé, élaé mvot ja ye tulane nye nyô.

²⁵ Nge a vaa akoñ élaé é beme nye nyô, ngʼébaé nduan é beme nyʼések, beangôndô be mam ba ye kui be nye.

²⁶ Dibi ese e ne nnaan asu akume dé, nduane môt éziñ a se nguleya soo, ja ye mine nye.

²⁷ Yôp da ye kulan ékobe jé, a si ja ye tebe nye ngame yat.

²⁸ Ba ye vos akume ya nda jé, ba ye mane kee de e môse Zambe a ye yaa.

²⁹ Ngabe mbia môt ja so be Zambe nje le. A jôm a ye nyoñ e minkobô mié été é soʼo be Zambe nje le.