Yb 19 - Bible en langue Bulu

Eyalane Yob

¹ Ane Yob a nga yalane na:

² Mia ye ve nleme wom ôlun nté avé? A nté avé mia ye koʼo ma a mejô menan?

³ A ntoo biyoñ awôm mi taa ma; ye mia wôʼô foʼo ôsone ya ndeñele ma?

⁴ Nge me ne foʼo ékob été, kʼékobe te é bete mamiene nlô yôp.

⁵ Nge mi ne foʼo me ngame yat, a nge mia jô ma amu ôsame wom,

⁶ ke mia yiane ñhe yeme na Zambe Nye a kpwé ma, a vule ma avote dé été.

⁷ Nge ma wôʼô ékpweʼele ba kpweʼele ma abé , teke môt a yalane ma; nge ma sili mvolan, teke môt a tyiʼi me ajô.

⁸ A dibeya me zen , me se nguleya lôt; a kuteya dibi e mezene mam.

⁹ A sôʼôya ma étôtoʼo jam, a vaaya ékate duma e nlô wom,

¹⁰ a kpwéya me si mimfaʼa mise, a me tame wu. A téya ndi nleme jam anʼélé.

¹¹ Ayaa dé é kalaneya me nyô, a nyoñeya ma ane wua ya besiñe bé.

¹² Minsamba bezimbi mié, mia suan éyoñe jia. Be kpwaʼéya zene jap a kui be ma. Be lôñeya minkane miap mbômaʼan a nda éndelé jam.

¹³ A boya bobejañe na be ke mʼôyap, a ba ba yeme ma be maneya tyamelan ke mʼôyap.

¹⁴ Bôte bam be liʼiya ma, ba bia be be bia dañe nlatan be vuaneya ma.

¹⁵ Beyeñe ya nda jam a bebo bisaé bam be ne binga, ba yene ma ane nneñ. E mise map me nʼéyoñe ji ve njin be nji yem.

¹⁶ Me ne loone mbo ésaé wom a ne fam, nye teke yalan; ma yiane yeʼelane nye a anyu dam.

¹⁷ Minga wom a vini mvebe wom, a me ntoo mbia ényum e be bone bia be be bi nga bilaé abume da.

¹⁸ Toʼo na ayôme bongô de fe da biasé ma. Nge ma kôlô si, e nga kobô mʼabé.

¹⁹ Ba be mbe be yeme minsolane mi mame miam ba yene ma angôndô, ba me mbe me nyekeʼe be kôñelaneya a wosane ma.

²⁰ Bivese biam bia kabetan ékôbe jam a minsoñe miam, a me liʼiya me bili ve tite mesôñ.

²¹ Koon éngôngo, koone mʼéngôngo, a mia bemvôé bam! Amu wo Zambe ô bibiya ma.

²² Amu jé mia kpweʼele ma ane Zambe a kpweʼele ma? Ye mebum me ngenan te kui mia minlem a minsône miam?

Nkôté bôt a vee

²³ Ngoʼé nge bifia biam bi nga ye tiliban! Nge bi nga ye kpweleban e kalatʼété!

²⁴ Nge bi ne nkpwelan akoʼo yôp éyoñ ése a nkôs étyé a afiti!

²⁵ Ve ma yeme na nkôté wom a vee, a na nye a bili éfia ja suʼulan e si nyô.

²⁶ Eyoñ ékôbe jam ja ye tyamban, mamien ma ye yene Zambe.

²⁷ E Nye ma ma ye nyeʼe me lôô, e nye mise mam ma ye yen sake môte mfe. Nleme wom ô ne nteʼan ya yange éyoñe te.

²⁸ Eyoñ mia ye jô na: Amu jé bia kpweʼele nye? Eyoñe te mia ye yem bebela yʼajô dam.

²⁹ Koone woñe na nkpwaté mekôn ô nnambe mia. Amu melebe ya ma boban a nkpwaté mekôn me nʼangôndô.