Yb 18 - Bible en langue Bulu

Bildad a kobô Yob éyoñe baa

¹ Eyoñe te Bildad ya Kua a nga nyoñe nkobô a jô na:

² Wo ye telé kane nkobô éte nné éyoñ évé? Tukaʼa fas éyoñe te bia ye suʼulane kobô.

³ Amu jé bia yené ane betit? Amu jé bia yené mise môé ane bedimi mam?

⁴ A wo wo nyabe womien ayaa dôé été, ye wo yi na si é liʼi te môt amu wo? Nge na akôm é kôlô vôm e né?

⁵ Yaa, éfufube mbia môt ja ye dim, a nkabaʼa nduan wo so été wo ye bo te beta faé.

⁶ Efufub ja ye bo dibi e nda éndelé jé si, a e lambe wé a ye dim e nlô wé yôp.

⁷ Medaa mebo mé me ne ngul abui, ma ye bo mbametan, a e feʼe jé émien ja ye kpwé nye.

⁸ Amu mebo mé ma ye wua nye avot été, a a wulu e bikoé bi ôlame yôp.

⁹ ôlam ô biya nye étimekili, a bikoé bi lateya nye;

¹⁰ Nkol wo ye bi nye ô solô si été, a ôlam ô ne zen .

¹¹ Beangôndô be mam ba ve nye woñ ba yabe nye mimfaʼa mise, a ndeñele nye mfaʼa ya mvus.

¹² Zaé é nnambeya ngule jé, azoé é ne nye nkômane fefel.

¹³ Mefôla yʼékobe jé me maneya diban, ntôle mon yʼawu ô maneya di bibuʼa bié.

¹⁴ Be vaaya nye e nda éndelé a nga too je ndi a ngu, a ke a woʼotô émien e be njô bôte ya beangôndô be mam,

¹⁵ ô ntoo nguleya tabe e nda éndelé jé: é nji fe bo énjé; mbia nduan a ne mmiasane nda jé.

¹⁶ Mfaʼa ya si, minkañe mié mia kôt; mfaʼa ya yôp, mintyaé mia ye tyiʼiban.

¹⁷ Nsimesan ba simesane nye wo ye jañe si nyô, a nji beta bi jôé atan.

¹⁸ Be sôʼôlôya nye a soʼo dibi été, ba titane nye si nyô.

¹⁹ A nji liʼi bon nge bendaé e ayoñe dé été. Teke môt a liʼi a vee e mevôm a too.

²⁰ Bôte ya mfaʼa jôp da dim be ne feʼe ne vema ajô ya môse wé, a jame te da kuli ba ya jôbe da tôô ényunyui nyô.

²¹ Nalé ate menda me môt a nʼékotekot me né, a éto môt a nji yeme Zambe nje le!