Yb 17 - Bible en langue Bulu

¹ Ma dimili mvebe, melu mam ma dim, soñ ja yange ma.

² Ye bekpweʼele be nji bômane ma? A dise dam da yiane tabe é vee amu metaa map.

³ Ajô te boʼo ñhe ébene jam e be womien; za mfe a ye nyoñe mintyiʼan asu dam?

⁴ Amu ô feteya minleme miap be bo te nguleya yemelan; ajô te wo ye bo te kañese na be dañ.

⁵ Ba bañete bemvôé asu nkabane biôme ya nsa, ve ba bañete bon mbe mise map ma dik.

⁶ A nga telé me na me koobô meyoñ me bôt e nlô yôp. Ve me ntoo nyô ba tui menden asu,

⁷ Dise dam e ntoo évindi amu ôlun; bibuʼa biam bise bi ntoo ane nsisiñ.

⁸ Bezôsôô be bôt, be ntoo jame te feʼe ne vema, a môt a ne te bijô a kôlô si a wosane mbia môt.

⁹ Ve zôsôa môt a ngenan a yeme e zene jé été, nyô a bili mo me ne mfuban a dañe dañe bo ngu.

Nkana meyoñ me bôt

¹⁰ Ve mia bese, mi ntoo ve beta taté a zaʼane ñhe! Ma ye bo teke yene mfefeʼe be mia!

¹¹ Melu mam me lôteya, mam me nga kômbô bo me boya momo, minkômbane ya e nleme wom.

¹² Ba kôme yemete na alu nde e ntoo môs , a na éfufup é ntoo bebé, éyoñe dibi nde e ne valé!

¹³ Ye sa vôme ya miñwuan nye ma yange anʼétabaʼa jam? Ma ye kôm éjôʼôba jam e dibi été;

¹⁴ ma jô soñe jame na: wo ô nʼésaa wom! A ébole na: Nyia wom a kale jam.

¹⁵ Ndi nleme jam é ne vé? Ndi nleme jam, za a ne yene je?

¹⁶ Ja ye siliki mfaʼa bifetaʼa bi vôme ya miñwuan mi né, éyoñe bia ye ke nsamba a woʼon e mbuluʼu été.