Yb 15 - Bible en langue Bulu

Elifaz a beta kobô Yob

¹ Ane Elifaz ya Téman a nga nyoñe nkobô a jô na:

² Ye mfefek wo yiane yalan a momoa ñyeman? A jalé émien abum a évuñulu ja so mfaʼa jôp da tôô?

³ Ye a kaman émien a bifia bi ne teke mfi? Nge a nkobô ô ne teke volô jam?

⁴ Wo wo tyam, toʼo na nkabetan mfaʼa mam ya Zambe a wo ndaman éto meyeʼelan ése asu Zambe.

⁵ Amu mbia mboone wôé a ne nyeʼele ya anyu dôé, a ô tobeya fatane nkobô mekute me bôt,

⁶ Sake ma vʼanyu dôé nde da ve wo mekua. Biyaé biôé mbie bi ne ngaa a boʼolô wo.

⁷ Ye wo ô nga taté bialé a bôte bese? Ye wo ô ne mvendé a minkô?

⁸ Ye ô wôʼôya minsolane mi mam mi Zambe? A telé feʼe nné ve be womien?

⁹ Jé wo yem nje bi ne te yem? Ngule ñwôʼane mam fé ô bili bi te je bi?

¹⁰ Bôt be bili nyuʼu nlô be ne zañe jangan, a minnôm mi bôt, be too mvendé a ésoo,

¹¹ ye wo biasé mvolane Zambe a volô wo nlem , a nkobô bia kobô wo a évôvoé?

¹² Amu jé nleme wôé wo dutu wo? A amu jé wo nyete mise môé?

¹³ Amu Zambe nye ñhe wo yaa nye, a nye fe anyu dôé da kobô kane minkobô wo kobô nyô.

¹⁴ Môt a ne jé ane a ne nguleya bo mfuban ? A nyô a nga bialé be minga ke jé ane a ne nguleya bo zôsôô ?

¹⁵ Nge Zambe a nji tabe mimfufube mié ndi, nge yôp e nji bo mfuban asu dé,

¹⁶ kô fé ététéa é ne abé a ndaman, môta binam, nyô a nyu abé ane mendim?

Asuʼulane mbia môt

¹⁷ Vôʼôlôʼô ma, ma zu liti wo, ma ye kañete wo jam me yeneya,

¹⁸ jam mimfefek mi nga kobô, jam be nga bo teke solé, e soʼo be bʼésaa bap;

¹⁹ si é nga veban ve be be étam, a teke mone bikuu a nga lôte be zañ.

²⁰ Mbia môt a lôte melu mese yʼényiñe jé vʼéndeñelaʼa été. Ntibili bôt a kôsa nyiñe abui mimbu,

²¹ metyiñ me woñ ve ndeñele melo mé. Eyoñ a nyiñ e mvoʼé été, nje ntyame mam a ye vasane be nye.

²² A nji buni na a ye kôlô dibi été, amu nkpwaté mekôn wo yabe nye.

²³ A ke a ndeñ asu ya jeñe bidi, a yeme na e môs ô ne dibi wo yange nye.

²⁴ Olun a biyebé bia bo nye na a ko woñ, bia kubu nye nyô ane njô bôt a ne nkômesane ya wosan.

²⁵ Amu a sameya wo wé na a wosane Zambe, a dañe Nyô-A-Ne-Ngulʼése.

²⁶ A nga kôme bo ayoʼo ya ke mbile be nye, a too ébene jé si,

²⁷ avoñ e yale nyʼasu, a mevele ki me to nye anen;

²⁸ ve a ye tabe bitison bi ne ntyaman, e menda me ne bifut, me ntoo bebé ya suʼulane si.

²⁹ A ye bo te beta bik, akume dé fe teke tabe, afoʼo dé da ye bo te fe beta mialane si nyô.

³⁰ A se nguleya kandane dibi, nkabaʼa nduan wo ye kôtô bifaʼalé bié, a Zambe a ye vaa nye a mvebe yʼanyu dé.

³¹ A boʼo te tabe momo mebun! A za duʼuban. Amu momo a ye vebane be nye ane maʼan.

³² Jame te da ye boban te na asuʼulane ya melu mé e kpwaan. A ntyaé wé wo ye bo te beta bo nyumi.

³³ A ye liʼi teke jôm, ane ndiʼi woon wo dimili bibuma bié bi too biyoé, same jé ja ye kutan ane nyô ôlivié.

³⁴ Nda bôte mbo abé ja ye bo nkôkôm, a nduan ja ye mine menda bindelé me môt a duʼubane tyiʼibi.

³⁵ Nsimesane ya simesan abé wo biaé bidim, a ve môte nleme meduʼan.